EU-p Issittoq pillugu periusissiaq nutaaq saqqummiuppaa

Europami Kommissionip Issittoq pillugu periusissiaq nutaaq ullumikkut saqqummiuppaa.

Periusissiami nunat assigiimmik isumallit politikkikkut suleqatigiinnissaannut nutaamik sinaakkuteqarpoq, tassani inuit, isumannaatsuuneq, silap pissusia pigissaarnerlu pingaarnerpaatinneqarput.

Sisamanik tassani pingaarnersiuisoqarpoq: Issittumi isumannaatsuunerup qajannaassutsillu nukittorsarnissaat, silap pissusiata allanngoriartornerata akiornissaa, Issittumi inunnut najukkamilu innuttaasunut atugarissaarnissaq periarfissanillu pilersitsineq.

AAMMA ATUARUK

EU-p Kalaallit Nunaat qaninnerusumik attaveqarfigileraa

- Issittumi nunat Europap avannaaniipput — qanittuararsuit, uagutsinnut attuumassuteqarluinnartut siunissatsinnullu pingaarutillit. Sumiiffik allanngoriartorpoq. Umiarsuit aqqutaasa pisuussutillu nutaat unammillernarneraluttuinnarput.

- Periusissiami nutaami isumannaallisaanermut, attaveqarnermut aningaasaqarnermullu periarfissanut aningaasaliivugut. Issittumi najugaqartunut, sumiiffinnilu ataatsiloorfigisatsinnut iluaqutaassaaq, EU-mi kommissionip siulittaasua Ursula von der Leyen oqarpoq.

Issittumi isumannaatsuuneq Europami isumannaatsuunermut attuumassuteqarpoq

EU-mi innuttaasut millionit affaannit amerlanerusut Issittumi najugaqarput. Kunngeqarfik Danmark, Finland Sverigelu EU-mut ilaasortaapput nunani issittuneersut, EU-llu Norge, Island, Tuluit Nunaat, Canada USA-lu qanimut attaveqarfigivai. Taamaattumik Issittumi pisut Europap isumannaatsuuneranut, silap pissusianut pigissaarnermullu toqqaannartumik sunniuteqartarput.

Kaja Kallas, EU-p nunanut allanut sillimaniarnermullu politikkianut akisussaaffillip qullersaa aamma Europami Kommissionip siulittaasuata tullia oqarpoq Issittumi isumannaatsuuneq tassaasoq Europami isumannaatsuuneq.

Ruslandip Kinallu nunarsuarmi pissaaneqarnerujartornerat anguniakkamillu annertusiartornerat ilutigalugu Issittoq nunarsuarmi naalagaaffissuartut unammillerfiulerpoq. Periusissiaq nutartigaq piviusunik nutaanik taakkuninnga ersersitsisuuvoq tassanilu isumannaallisaaneq pingaartinneqarluni, oqarpoq.

Issittoq allanngoriartupallappoq, nunarsuarmili sukkanerusumik agguaqatigiisillugu sisamariaammik kissakkiartorluni, pinngortitap uumasullu ataqatigiinnerannut aamma inuit najukkami inuuniarnerannut sunniuteqartarluni.

Periusissiaq nutaaq Issittup patajaatsup siunissamilu isumannaatsup siuarsarnissaanut, issittumi suleqataasut inuiaqatigiillu, ilaatigut nunap inoqqaavi, qanimut suleqatigalugit taakkununngalu iluaqutaasumik, siunertaqarpoq.

Dan Jørgensen: Issittumi periusissiaq Kalaallit Nunaata EU-mut qaninnerulernissaanut iluaqutaassaaq

Periusissiaq naapertorlugu Kalaallit Nunaata EU-mut qaninnerulernissaa anguniarneqarpoq. Taama oqarpoq Danmarkip EU-mi nukissiornermut ineqarnermut kommissæria Dan Jørgensen.

- Qularutissaanngilaq Issittoq pillugu periusissiaq tamanna EU-p Kalaallit Nunaatalu iluaqutissaqarlutik ataqqeqatigiillutillu imminnut qaninnerulernerannut takussutissaasoq, Dan Jørgensen Ritzauimut oqarpoq.

EU-kommissionip siulittaasuata Ursula von der Leyenip, Naalakkersuisut siulittaasuat Jens-Frederik Nielsen aamma danskit ministeriunerata Mette Frederiksen suleqatigiinnerup nukittorsarneqarnissaa pillugu ataatsimut nalunaarut septembarimi atsiorpaat.

- Tamanna pimoorussinitsinnut takussutissaavoq. Digitaliseerinissaq mingutsitsinngitsumillu nukissiorneq suleqatigiissutigissavavut, aamma siunissami qaninnerulernissarput EU-p aamma Kalaallit Nunaata soqutigigaat ersarissumik paasivarput, Dan Jørgensen oqarpoq.

Periusissiami nutaami Kalaallit Nunaata namminiilivinnissamut pisinnaatitaaffia akuerineqarpoq.

- EU-miit soqutigivarput qanimut attaveqatigiilernissarput, namminiilivinnissarli Danmarkip Kalaallit Nunaatalu aalajangigassaraat.

- EU-p tamanna akuliuffiginngilaa, aningaasallu Kalaallit Nunaata siunissami pisussaaffilerneqarneranik piumasaqaateqaratik tunniunneqarput, Dan Jørgensen oqarpoq.

EU-Kommissionip periusissiaani aamma Kalaallit Nunaata, Danmarkip USA-llu qanittukkut isumaqatigiissutigisaat akuerineqarpoq, taannalu EU-Kommissionip oqaasii naapertorlugit "Issittumi ataatsimut isumannaallisaanermik nukittorsaataassaaq."