EU-p Kalaallit Nunaat qaninnerusumik attaveqarfigileraa

EU-kommissionip siulittaasua Ursula von der Leyen danskit ministeriunerat Mette Frederiksen peqatigalugu sapaammi ataasinngornermilu Kalaallit Nunaannut tikeraarpoq. Tikeraarneranut atatillugu ataatsimut nalunaarut nutaaq, ilaatigut EU-p 200 millionit euronik aningaasaliissuteqarnissaanik imaqartoq, atsiorneqarpoq.

EU-kommissionip siulittaasua Ursula von der Leyen Nuummi mittarfimmi danskit ministeriunerannit Mette Frederiksenimit aamma Naalakkersuisut siulittaasuannit Jens-Frederik Nielsenimit tikilluaqquneqarpoq. Tikeraarnermi EU-p Kalaallit Nunaanni attaveqarneranut, aatsitassanut, mingutsitsinngitsumik nukissiornermut ilinniartitaanermullu 200 millionit euronik aningaasaliissuteqarnissaa pillugu ataatsimut nalunaarusiortoqarpoq.

Assi: Oscar Scott Carl

Trine Juncher Jørgensen Trine Juncher Jørgensen TUSAGASSIORTOQ

Saqqummersinneqarpoq 12. Septembari 2026 - 11:46

Ussassaarut

EU-kommissionimi siulittaasoq Ursula von der Leyen sapaammi ullup qeqqata qaangilaaraa Nuummut tikippoq, tassanilu danskit ministeriunerannit Mette Frederiksenimit aamma Naalakkersuisut siulittaasuannit Jens-Frederik Nielsenimit tikilluaqquneqarpoq.

Taakku Nuup Kangerluani Qoornumut angalareerlutik Illersornissaqarfiullu umiarsuaa Thetis Nuummi umiarsualivimmi takuniareerlugu isumaqatigiissut nutaaq ataasinngornermi ullaakkut atsioqatigiissutigaat, tassanilu EU-p Kalaallit Nunaatalu suleqatigiinnerisa annertusarneqarnissaa sammineqarpoq.

Isorliunerusuni internetsi pitsaanerulissasoq

Digitalimik attaveqaatit ukkatarineqartut ilagaat, tassani EU 5 millionit euronik, Danmark 2 millionit euronik Kalaallit Nunaallu 2 millionit euronik sinneruttunik – katillugit 9 millionit euronik Kalaallit Nunaanni satellitsikkut attaveqaatitigut internetsimik sukkanerusumik pilersitsinissamut tapiissuteqassapput.

EU Tusass aqqutigalugu digitalimik attaveqarnermut aningaasaliinerup saniatigut aatsitassanut pingaarutilinnut aamma aningaasaliivoq.

Ussassaarut

- Aningaasaliissuteqarnikkut ineriartorneq, Kalaallit Nunaanni suliffissaqarneq nunamilu nalitusaaneq qulakkeerneqassapput, Ursula von der Leyen ataasinngornermi tusagassiortunik katersortitsinermi oqarpoq.

Ministeriunerup Mette Frederiksenip, Naalakkersuisut siulittaasuata Jens-Frederik Nielsenip aamma EU-kommissionimi siulittaasup Ursula von der Leyenip sumiiffinni avinngarusimasuni internettimik pitsaanerulersitsinissamut aningaasaliissuteqarnissaq pillugu isumaqatigiissut ataasinngornermi atsiorpaat.

Nukissiorneq mingutsitsinngitsoq ilinniartitaanerlu

EU-p Kalaallit Nunaanni namminersorluni piujuartitsisumillu nukissiornissaq qulakkeerniarlugu mingutsitsinngitsumik nukissiornermut aningaasaliinissamut aammattaaq piareersimavoq.

- Aningaasaliinerullu pitsaanerpaartaraa. Inuusuttut Eramus Plus aqqutigalugu nunani allani ilinniagaqarsinnaanissaat qulakkeerneqassaaq, taamaalillunilu nunatsinni ilinniarnerup pitsaassusiata qaffasissuunissaa qularnaarneqassalluni, kommissionimi siulittaasoq oqarpoq, EU-llu Kalaallit Nunaat tapersersoraa, aamma EU-p Kalaallit Nunaata siunissami nammineq aalajangiisinnaatitaanera tapersersoraa naggataatigut oqaatigaa.

Jens-Frederik Nielsen naapertorlugu EU-mik qaninnerusumik suleqateqarneq nunap innuttaasuisa iluaqutigissavaat.

– Nunatta siunissaa nammineq ilusilersorparput, innuttaasunik qitiutitsisarluta namminerlu nuna aqullugulu allanik suleqateqartarpugut. Suleqatigiinnissamut isumaqatigiissut nutaaq atsiorparput. Tamannalu Kalaallit Nunaanni innuttaasunut tamanut iluaqutaassaaq, Jens-Frederik Nielsen ilaatigut oqarpoq, taassumalu EU-mut ilaasortanngornissaq oqaluuserineqanngitsoq kingorna naqissuserpaa.

Ukiuni 40-ni suleqatigiinneq

Kalaallit Nunaata EU ukiuni 40-ni suleqatigisimavaa. Suleqatigiinneq aalisarnermut ilinniartitaanermullu tunngassuteqarneruvoq, ukiunili kingullerni takornariaqarnermut, attaveqarnermut aatsitassanullu pingaarutilinnut tunngasut aamma ilanngunneqarput.

Aningaasat 200 millionit eurot EU-p Kalaallit Nunaannut tunniutereersimasaanut, tassa piffissami 2021-mit 2027-mut nunanut nunallu ilaannut (OLT) suleqatigiinneq pillugu isumaqatigiissummut aamma 2025-miit 2030-mut aalisarneq pillugu isumaqatigiissummut ukiumut 17,3 millionit euronik, tassa 129 millionit koruuninik, tapiissutigineqartunut, ilanngunneqassapput.