EU-p Kalaallit Nunaatalu suleqatigiinnerisa nukittorsarneqarnissaanut nalunaarut Von der Leyenip tikeraarnerani atsiorneqassaaq

Nuuk politikkikkut ataatsimiinnerni nunanit allaneersunit tikeraarfigineqartutut sapaammiit ullualuit ilanngullugit, qitiussaaq.

EU-p kommissioniata siulittaasua Ursula von der Leyen aamma Danmarkip ministeriunerata Mette Frederiksenip Nuummut tikeraarnerat sapaammi aallartissaaq.

Naalakkersuisut siulittaasuat Jens-Frederik Nielsen (D) tusagassiutitigut nalunaarummi ilisimatitsivoq tikeraartoqarnermi ilaatigut EU-p Kalaallit Nunaatalu suleqatigiinnerisa nukittorsarneqarnissaannut ataatsimut nalunaarut atsiorneqassasoq:

- Nunarsuarmi politikikkut pissutsinut tunngatillugu EU-p erseqqissumik tapersersorluta nalunaarutigaa peqatigisaanillu suleqatigiinnitta annertusarnissaanik kissaaterput akorluarpaat. Ullut aggersut assut qilanaaraakka aamma Kalaallit Nunaannut ataatsimoorullugu suleqatigiinnermik isumaqatigiissut pillugu itinerusumik oqaluttuarnissara qilanaaralugu, Naalakkersuisut siulittaasuat Jens-Frederik Nielsen oqarpoq.

Naalagaaffeqatigiit ukiup affaani ataatsimiinnerat, Nuummi ataasinngornermi ingerlanneqassaaq ingerlanneqassaaq. Savalimmiuni lagmandiat, Beinir Johannesen, Danmarkimilu ministeriuneq Mette Frederiksen matumani peqataassapput.

Naalagaaffeqatigiit ataatsimiinneranni politikkikkut aningaasaqarnikkullu soqutigisat oqallisigineqartarput.

– Ukiuni makkunani pisussaaffilerneqarpugut qanimut suleqatigiissalluta. Soorlu inuit pingasut umiatsiami ataatsimoorlutik ipoqatigiittariaqartut ataatsimoorussamik anguniagaqarnissarput qulakkeerniarlugu, taamatut aaqqissugaanerput inissisimavoq, Jens-Frederik Nielsen oqarpoq.

Nunanut allanut, Sillimaniarnermut Illersornissamullu Attaveqartitat tamatuma kingorna marlunngornermi ataatsimiissapput.

Nunanut allanut, inuussutissarsiornermut aatsitassanullu naalakkersuisoq Múte B. Egede (IA) aamma aningaasaqarnermut naalakkersuisoq Aqqaluaq B. Egede (IA) Savalimmiuni Danmarkimilu naalakkersuisut siulittaasui ministerillu arlallit peqatigalugit ataatsimeersuarnermi peqataassapput.

Nunarsuarmi allanngorartupilussuarmi ataasiussuseqarnissaq pingaaruteqartoq, ataatsimiinnissat pillugit ministeriuneq Mette Frederiksen nalunaaruteqarpoq:

– Kalaallit Nunaata, Savalimmiut Danmarkillu ataatsimoornerat nukittuumik inissisimavoq. Toqqaannartumik tatigeqatigiinnermillu attaveqarnerput nukittuumik inissisimanerup toqqammavigaa. Ajornartorsiutit ammasumik oqaluuserisarpavut. Paasivarput assigiinngitsuugaluarluta amerlasuunik ataqatigiissuteqartugut. Nuummi oqaloqatigiinnerup nanginnissaa qilanaaraara, ministeriuneq Mette Frederiksen oqarpoq.