Ilisimatooq: Kalaallit Nunaata Danmark toqqarneratigut USA-mut nalunaarut ersarilluinnarpoq
Naalakkersuisut siulittaasuat naapertorlugu Kalaallit Nunaata Danmark toqqarpaa, tamannalu USA-mik pingaarutilimmik ataatsimeeqalinnginnermi ersarissumik nalunaaruteqarneruvoq.
Kalaallit Nunaat USA-mit Danmark-imilluunniit qinersinnaappat, Naalakkersuisut siulittaasuat Jens-Frederik Nielsen maanna Danmark qinerumavaa.
Foto: Tom Little/Reuters
USA-mik Det Hvide Husimi pingasunngornermi ataatsimeeqateqarnissaq sioqqullugu Kalaallit Nunaat marlunngornermi ersarilluinnartumik nalunaaruteqartoq, Ilisimatuup Ulrik Pram Gadip nalilerpaa.
Nunarput USA-mik Danmarkimilluunniit toqqaasariaqalissaguni, Danmark toqqarneqassasoq Naalakkersuisut siulittaasuat Jens-Frederik Nielsen oqarpoq.
Dansk Institut for Internationale Studier-imi, DIIS, ilisimatooq naapertorlugu tamanna erseqqinnerusumik oqaatigineqarsinnaanngilaq.
- USA-mut erseqqilluinnartumik nalunaarutigineqarpoq ataatsimoorluni orniguttoqassasoq, ataatsimoornerlu anilernermi aamma kipineqassanngitsoq, Ulrik Pram Gad qallunaat kalaallillu aallartitaat pingasunngornermi USA-mik ataatsimeeqateqartussat pillugit oqarpoq.
Ministeriuneqarfimmi marlunngornermi tusagassiortunik katersortitsinermi Jens-Frederik Nielsen siornatigornit erseqqinnerusumik oqariartuuteqarpoq.
- Nunat akornanni politikkikkut ilungersunartumik inissisimavugut. USA Danmarkilu arlaat maannakkorpiaq toqqartariaqalissagutsigu, taava Danmark toqqarparput. Nato, Kunngeqarfik, Danmark EU-lu toqqarpagut, oqarpoq.
Jens-Frederik Nielsenip Europamit Danmarkimillu tapersersuineq „pingaaruteqangaartutut“ oqaatigaa.
Ilisimatooq Ulrik Pram Gad isumaqarpoq oqariartuut pitsaanerusumik oqaatigineqarsinnaanngitsoq.
- Siunissaq ungasinnerusoq eqqarsaatigalugu namminiilivinnissaq suli pilersaarutigaat, USA-llu iliuusii aarlerinartorsiortitsinertut isigalugit, oqarpoq.
Nunanut allanut ministeri Lars Løkke Rasmussen (M) aamma nunanut allanut tunngasunut naalakkersuisoq Vivian Motzfeldt USA-mut angalapput.
Tassani Washington D.C-mi Det Hvide Husimi USA-p vicepræsidentia J.D. Vance aamma nunanut allanut ministeri Marco Rubio ataatsimeeqatigissavaat.
Ataatsimiinneq nunatsinni nalunaaqutaq malillugu 13.30 pissaaq, kinguartinneqarsinnaallunili.
/ritzau/
