Uani malinnaagit: - Kalaallit Nunaat ullumikkutut ittoq toqqarparput, Jens-Frederik oqarpoq

Jens-Frederik Nielsen Mette Frederiksenilu nunatsinni nalunaaqutaq naapertorlugu ullup qeqqanut Københavnimi tusagassiortunik katersortitsissapput.

Ministeriuneqarfik tusagassiutitigut nalunaarummi ima allappoq:

- Ministeriuneq Naalakkersuisullu siulittaasuat pissutsit maanna atuuttut pillugit oqaaseqassapput, aggersaassummi allassimavoq.

USA-p præsidentiata Donald Trumpip Kalaallit Nunaat pillugu oqaaseqaatai pissutigalugit pissutsit ilungersunartut Naalakkersuisut siulittaasuata ministeriunerullu oqaluuserissagaat naatsorsuutigineqarsinnaavoq.

Nutartitaq nal. 12.05 - Tusagassiortunik katersortitsineq aallartippoq - ajornakusoornerpaaq suli nalliutinngilaq

Tusagassiortunik katersortitsineq aallartippoq Mette Frederiksenilu oqaaseqaqqaartuulluni.

USA pissutaalluni ukioq unammilligassaqaraluartoq ilungersunarnerpaaq suli nalliutinngitsoq oqarpoq:

- Danmarkimut kunngeqarfimmullu tunngaannanngilaq. Pissaanermik atuilluni killeqarfinnik allannguisoqarsinnaannginneranut tunngassuteqarpoq. Inuiaat allat pisiarineqarsinnaannginnerat nunallu mikisut nunat angisuut ersigisariaqassannginnerannut, Mette Frederiksen oqarpoq.

Washingtonimi ataatsimiinnissaq pingasunngornermi pisussaq pillugu Danmarkip Kalaallit Nunaatalu ataatsimoornissartik aalajangiusimagaat ministeriunerup erseqqissaatigaa:

- Ataatsimoorlutik ataatsimiittarfimmukassaagut. Ataatsimuussaagut. Ataatsimoorlutalu ingerlassalluta, oqarpoq Kalaallit Nunaat aamma tuniniagaanngitsoq oqariartuutigineqassasoq aamma naqissuserpaa.

Issittumi isumannaallisaanerup pitsanngorsarneqarnissaa soorunami kissaatigineqartoq, aamma oqarpoq.

- Nato-p Kalaallit Nunaat nunatut allatulli illersortussaavaa, Mette Frederiksen oqarpoq.

Nutartigaq nal. 12.08 Jens-Frederik: Kalaallit Nunaat tuniniagaanngilaq

Mette Frederiksen oqaaseqareermat Jens-Frederik Nielsen oqaaseqarpoq.

Kalaallit Nunaat tuniniarneqanngitsoq aallarniutigalugu oqaatigaa, aamma Naalagaaffimmut ilaasoq.

- Nunaavugut inatsisit tunngavigalugit tamat oqartussaaqataanerannik tunngavilimmik namminersorlutik oqartussaasut, Kunngeqarfiup Danmarkip ataaniittut.

Pissutsit ilungersunartut, nunanilu allani politikkikkut pissutsit Kalaallit Nunaannut tatisingaatsiartut aamma oqaatigaa.

- Nato-mi iligiit tapersersuisullu tatigingaarpagut.

- Danmarkilli Europamilu iligisatta tapersersuineri pissutsini makkunani pingaaruteqarluinnarput, Jens-Frederik Nielsen oqarpoq.

Kalaallit Nunaata tunngaviusumik inissisimaffianik ataqqinnittumik, aammattaaq inuit pisinnaatitaaffiinik kalaallillu namminneq aalajangiisinnaatitaanerannik ataqqinnittumik oqaloqatigiittoqarnissaa kissaatigingaa anguniagaringaalu Jens-Frederik oqarpoq.

Aalajangiusimavorlu:

- Ataaserli kikkut tamarmik paasisariaqarpaat. Kalaallit Nunaat USA-mit pigineqarusunngilaq. USA-mit aqunneqarusunngilaq. USA-mut ilanngukkusunngilaq, naalakkersuisut siulittaasuat sakkortuumik oqarpoq.

- Kalaallit Nunaat ullumikkutut ittoq, tassa Danmarkip Kunngeqarfianut ilaasoq, toqqarparput.

Nutartigaq nal. 12.13 Toqqaassaguttali

Kalaallit Nunaat maanna toqqaassagaluarpat Kunneqarfik, EU Natoluunniit toqqarneqassasut Jens-Frederik Nielsen nangilluni oqarpoq.

- Isumaqatigiinnginneq avissaartuunnerlu piffissaanngillat. Ataatsimoorneq nalunngisarput taassumalu ineriartortinnissaa pisussaavoq, oqarpoq.

Nutartigaq nal. 12.18 - Danmarkip Amerikamiut sumik neqeroorfigisinnaavai?

Tusagassiortut apeqquteqartussanngorput.

Pissutsit maanna atuuttut eqqarsaatigalugit Danmark USA-mut qanoq neqerooruteqarsinnaanersoq, DR-imi tusagassiortup Mette Frederiksen.

Danmarkip iliulluarsinnaanini neqeroorutigisinnaagaa ministeriunerup akissutigaa.

- Issittoq illersortussaavarput, issittumilu isumannaatsuunissaq soqutigisarilluinnarlugu, oqarpoq, nangipporlu:

- Naalagaaffiit namminersortut imminnut ataqqeqatigiillutik innuttaminnullu pitsaanerpaamik iliuuseqartut akornanni tamat oqartussaaqataanerat tunngavigalugu suleqatigiinnissaq neqeroorutigisinnaavarput.

Jens-Frederik Amerikamiut kisimiilluni oqaloqatigiumappanni qanoq oqassanersoq aamma aperineqarpoq:

- Naatsumik akissutissaqarpunga. Ataatsimoorpugut, ataatsimoorluta ataatsimiittarfimmukassaagut, ataatsimoorluta ingerlaqatigiissaagut amerikamiullu ataatsimoorluta oqaloqatigissallugit.

Amerikamiummi neqerooruteqassappata?

Marco Rubio aamma JD Vance pingasunngornermi ataatsimiinnermi Kalaallit Nunaata siunissaa pillugu aalajangersimasumik neqerooruteqassappata imaluunniit isumaqatigiinniarniartoqalersaassagaluarpat, Kalaallit Nunaat qanoq periassanersoq Sermitsiap tusagassiortua aperaaq.

Kalaallit Nunaata siunissaa sinaakkutinik maanna atuuttunik ilusilersorneqassasoq Jens-Frederik Nielsenip erseqqissaqqippaa:

- Kalaallit Nunaata siunissaa ullumikkut inatsit tunngaviusoq malillugu aalajangerneqassaaq.

- Kalaallit Nunaat tuniniagaanngilaq, inuillu pisiarineqarsinnaanerat pillugu oqalunneq ataqqinninnginneruvoq. Sulimi inuuvugut, tamannalu aqagu USA-mik ataatsimeeqateqarnitsinni oqariartuutigissavarput.

Ministeriuneq sooq ataatsimiigianngila?

Mette Frederiksen sooq Amerikamiut præsidentip illorsuani ataatsimiittoqartussanngormat sooq tassungarniannginnersoq tusagassiortunik katersortitsinermi aperineqarpoq.

Kikkut peqataanerat apeqqutaanani oqariartuut taannaaginnassasoq ministeriunerup naqissuserpaa.

Jens-Frederik Nielsen Danmark toqqarneqarmat Kalaallit Nunaat namminiilivikkusukkunnaarnersoq aamma aperineqarpoq.

Nunap iluani pissutsit eqqartornissaannut maanna piffissaanngitsoq, Jens-Frederik Nielsen oqarpoq:

- Kalaallit Nunaat Danmarkip Kunngeqarfianut ilaavoq, tunngaviusut illersorniarlugit ataatsimoorpugut.

- Kalaallit Nunaat pisut assoralisiimaarfiusut qeqqanniippoq. Kalaallit innuttaasut piffissami sivisuumi tatineqaqqapput. Nunarsuarmi pissutsit atuuttut nalunngisavut pinearput.

- Najoqqutassiat ukiuni amerlasuuni ineriartortinneqarsimasut allanngortinnialerutsigit Kunngeqarfik Kalaallit Nunaallu, nunarsuullu sinnerani unammilligassanik akioruminaatsunik nalaataqartussanngussapput.

USA-p præsidentiata tullia J.D. Vance USA-p, Danmarkip Kalaallit Nunaatalu nunanut allanut ministeriisa pingasunngornermi ataatsimiinnissaannut aamma peqataassasoq ullumi siusinnerusukkut nalunaarutigineqarpoq.

Donald Trumpip Kalaallit Nunaat pillugu oqaaseqaatini sapaatip-akunnerata ingerlanerani sakkortusivai. Kalaallit Nunaat USA-mik isumaqatigiissuteqartariaqartoq, taamaanngippat Ruslandip Kinalluunniit piffissap ingerlanerani Kalaallit Nunaat tiguassagaa ilaatigut oqarpoq:

- (Kalaallit Nunaata, aaqq.) piffissami sivikitsumi piginissaa pinnagu pisiarinissaa eqqartortarparput. Pisiarinissaa eqqartortarparput. Taamaaliunngikkutta Ruslandip Kinalluunniit tiguassavaat, uangali præsidentiutillunga taamaaettoqassanngilaq, Trump oqarpoq.

Tusagassiortunik katersortitsinerup aallartinnerani allaaserisaq Sermitsiamit nutarterneqarumaarpoq.