Illersornissamut ministerip sakkutuut Nuummiittut tikeraarpai

Obs: Allaaserisaq naqqani nutarterneqarpoq.

Nuummi sakkutuut ministerimit pingasunngornermi pulaarneqassapput.

Illersornissamut ministerip Jeppe Bruusip Nunanullu Allanut Tunngasunut Naalakkersuisup Múte B. Egedep (IA) sakkutuut Nuummi sungiusartut maanna pulaassavaat.

Illersornissaqarfiup sakkutuut Nuummi Kangerlussuarmilu maannakkut inississimavai, ministerilli Nuuk kisiat ullumikkut tikeraassavaa, tassani sakkutuut ineqarfii sungiusartarfiilu takuniarneqassapput.

Taama Issittumi Illersornissaqarfik Sermitsiamut ilisimatitsivoq.

Qallunaat illersornissamut tunngasutigut Kalaallit Nunaanni iliuuserisimasaat oqallisigineqarnerata kingorna, danmarkimi ministerip tikeraarnera sapaatip-akunnerata naanerani pivoq.

Issittumi Illersornissamut umiarsuaannik nutaanik Kalaallit Nunaanni atortussanik pilersuisussamik isumaqatigiissuteqartoqanngitsoq, DR-ip oqaluttuaraa. Naalakkersuisut siulittaasuata Jens-Frederik Nielsenip (D) pissutsit ”naammaginanngilluinnartutut” oqaatigai.

AAMMA ATUARUK

Naalakkersuisut Siulittaasuata danskit Issittumi suliniarnerat naammaginngikkaa

Umiarsuarnik nutaanik tallimanik umiarsuarnut alapernaarsuiartortartunut Kalaallit Nunaata avataani maannakkut alapernaarsuisunut, taartaasunik pilersitsisoqarnissaa, pilersaarutaavoq.

USA-p præsidentiata isumannaallisaanermut apeqqut aallaavigalugu Kalaallit Nunaat USA-mit pigilerneqartariaqarneranik oqariartuuteqareersorlu Illersornissaqarfiup Kalaallit Nunaanni iliuuseqarnera annertusineqarpoq.

Sakkutuut inaannut pulaarneq

Ministerip tikeraarnerani Qinngutsinni sakkutuut inissiaataat pulaarneqarput.

Sermitsiap tusagassiortua takornariaqataavoq, oqaluttuarporlu ministerip ilaatigut sakkutuunngorniat qanoq ineqarnersut ulluinnarnilu qanoq inuunersut takugaa.

Sakkutuut sinittarfeqarput, aamma inerujussuaqarpoq sunngiffimmi sammisaqarfiusinnaasunik atortulimmik, soorlu nerrivimmi arsaararfik.

Najugaqarfiit takuneqareermata, Nuup eqqaani sungiusarnissap tungaanut Tamumi ulloqeqqasioqatigiittoqarpoq.

Ministerip sakkutuut Kalaallit Nunaannut aallartitaanerminni tapii qaffanniarpaa

Illersornissamut ministeri Jeppe Bruus tikeraarnermini Ritzauimut oqarpoq sakkutuunngorniat Kalaallit Nunaanni akissarsiaannut tapii qaffanniarlugit.

Aggustip aallartinnerani Berlingske-mi allaaserineqarpoq Kalaallit Nunaanni sakkutuunngorniat ullormut 14 koruunit 17 koruunillu akornanni ilassutitut aningaasarsiaqartut.

- Sakkutuunngorniartut atorfillit assigalugit atugaqarnissaat eqqarsaatigineqanngilaq, Jeppe Bruus Ritzauimut oqarpoq nangillunilu:

- Qanorli iliorsinnaanersugut misissorusuppara, ilaatigut Kalaallit Nunaanniinneranni tapiissutaat qaffanneqarsinnaanersut.

Illersornissamut ministerip maannakkut aningaasat qanoq amerlatigisut pineqassanersut oqaatigisinnaanngilaa.