Naalakkersuisut Siulittaasuata danskit Issittumi suliniarnerat naammaginngikkaa

Ukiup ataatsip affallu matuma siorna Kalaallit Nunaannut Issittumi umiarsuarnik nutaanik sanaartornissamut pilersaarut danskit naalakkersuisuisa saqqummiuppaat.

Issittumi umiarsuarnut taakkununnga sanaartortussanik suli isumaqatigiissummik atsiortoqanngilaq, Kalaallillu Nunaanni naalakkersuisut siulittaasuat Jens-Frederik Nielsen naapertorlugu tamanna ”naammaginanngitsoq”, DR allappoq.

- Maanna umiarsuit atorneqartut pisoqaavallaarnerat pissutigalugu, umiarsuarnik alapernaarsuutinik sanaartussalluni aalajangeranni, taava taakku nukingiunneqartariaqarput. Oqallinnerli tamanna tusagassiuutitigoortinnagu, danskit naalakkersuisuinik oqaloqatiginnissutigissavara, taanna DR-mut oqarpoq.

Alapernaarsuutit aserfallassimasut maanna Kalaallit Nunaata eqqaani atorneqartut, umiarsuarnik nutaanik tallimanik taarserneqarnissaat pilersaarutaavoq.

Illersornissamut ministereqarfiup februaarimi tusagassiuutinut nalunaarummini, naalagaaffik Frederikshavnimi umiarsualiorfimmi, issittumi alapernaarsuutinik tallimanik sanaartortussamik pilersitsisoqassasoq allaaseraa.

Umiarsuarnut teknikikkut piumasaqaatit aalajangersarneqareerpata aatsaat isumaqatigiissutinut isumaqatiginninniarnerit aallartissinnaasut, nalunaarummi allassimavoq.

Umiarsuit piginnaasassaannut sakkutooqarnikkut inassuteqaateqartoqarnissaa, kikkullu umiarsuarnik sanaartussanersut isumaqatigiissutigineqassasoq, illersornissamut ministereqarfik peqatigisaanik ilisimatitsivoq.

Pilersuisussamik suli isumaqatigiissusiortoqarsimannginnera, politikerit arlallit siusinnerusukkut isornartorsiorpaat.

Umiarsualiornerit suli aallartissimannginnerat aamma nunatsinni Inatsisartuni politikerinit aamma naammagineqanngilaq.

DR naapertorlugu Inatsisartut Nunanut allanut Sillimaniarnermullu ataatsimiititaliaanni siulittaasup, Pipaluk Lyngep Danmarkip sukkanerusumik suliamik ingerlatsinissaa umiarsuarnillu sanaartornermik aallartitsinissaa kaammattuutigaa.

Umiarsuit nutaat pingasut ungasinnerusoq isigalugu Danmarkip nakkutilliissutai Thetis-ikkut sisamat aserfallassimasut ukiunillu 40-ngajannik pisoqaatigisut taarsissavaat. 

Umiarsuarnik nutaanik Kalaallit Nunaata eqqaani alapernaarsuinissamut aningaasaliinissamut pilersaarutit Issittumi illersornissamut isumaqatigiissutip nutaap ilaatut 2025-mi saqqummiunneqarput.

Isumaqatigiissutikkut ilaatigut Danmarkip Issittumi Atlantikullu avannaani najuunnera nukittorsarneqassaaq.