Inatsisartut Siulittaasuat: Naalakkersuisut  narrujuummisillugit aamma isummersorsinnaavunga

AAMMA ATUARUK:

Inatsisartut Siulittaasuat illuatungiliutullu isumaqatigiinngeqisut

Inatsisartut Siulittaasuata, Kim Kielsenip (ATT), naalakkersuisoqatigiit qineqqusaarutiminnik piviusunngortitsisarsimanngitsutut illuatungiliuttunit pasilliutigineqarmata tusagassiorfinnut nalunaarummini siusinnerusukkut illersorpai. Illuatungiliuttut Siumut aamma Naleraq tamassumunnga taamani aamma akerlioqaat. Illuatungiliuttummi taamani nalunaarutaat naapertorlugit Inatsisartut Siulittaasuat Inatsisartunut ilaasortanut assigiimmik sullissinngilaq. 

Inatsisartut Siulittaasuat maanna aamma tusagassiorfinnut nalunaaqqippoq. Taassuma kikkut tamat takusinnaasaannik isummersortarnissani piareersimaffigineqassasoq oqariartuutigaa.

- Qisuariarnerit apeqqutaatinnagit taava partiit taakku, partiillumi allat, naatsorsuutigisariaqarpaat uanga Inatsisartut Siulittaasuattut aamma siunissami ilaanneeriarlunga innuttaasut oqartussaaqataanerat eqqarsaatigalugu atugassarititaasut ineriartornerillu pillugit isummersortassagama, isummersuutikkalu tamanut saqqummiuttarlugit, Kim Kielsen allappoq.

Taassuma illersornikuusani, tassa naalakkersuisoqatigiit, narrujuummisissinnaallugit maanna nalunaarutigaa.

- Taamaaliornikkut ilaatigut illuatungiliuttut partiivi – ilaatigullu partiit naalakkersuisuutitaqartut Naalakkersuisulluunniit – narrujuummisinneqarsinnaapput, kisiannili aamma tamanna innuttaasut akornanni eqqarsaatiginnilluaqqinnissamut oqallinnermillu pilersitsinissamut peqataasinnaalluni, siulittaasoq allappoq.

Illuatungiliuttut ippiginngikkai

Inatsisartut Siulittaasuata illuatungiliuttunik isorinnilluni naalakkersuisoqatigiinnik illersuisimanini illuatungiliuttunit isorineqarmat paasisinnaallugu maanna allaaseraa. Illuatungiliuttuneersut taamani oqarnerat naapertorlugit Inatsisartut Siulittaasuat illuatungiliuttunut nipangersaavoq. Naalakkersuisoqatigiinnillu illersuisimanini nassuerutigaa.

- Tusagassiorfinnut nalunaarutiga taamatuttaaq naalakkersuisuutitaqartunik illersuinertut oqaatiginiarneqarpoq, tamannalumi aamma ilumoortortaqartutut oqaatigineqarsinnaavoq, tassami atugassarititaasut naalakkersuisuutitaqartunut kikkuugaluartunulluunniit, taamalu aamma ullumikkut naalakkersuisuutitaqartunut, atuuttut ilaat tikkuarniarsimavakka. Taamaattorli partiinit aalajangersimasunit qineqqusaarnermi neriorsuutigisat isummerfiginngilakka, tamannalumi aamma Inatsisartut Siulittaasuannut pissusissamisoortussaanngilaq, Kim Kielsen allappoq.