Inatsisartut Siulittaasuat illuatungiliutullu isumaqatigiinngeqisut

Inatsisartut Siulittaasuat, Kim Kielsen (ATT), tusagassiorfinnut marlunngornermi nalunaaruteqarpoq. Taassuma nalunaarummini naalakkersuisoqatigiit partiivi illersorpai. 

 - Naalakkersuinermik sulialinnik qatsussineq qinersereernerup kingorna takornartaaneq ajorpoq. Danmarkimi pissutsit ullutsinni taamaapput, tamannalu aamma uagutsinni tusartarparput: ”Sooruna partiit qinikkallu pissaanermik tigusisut qineqqusaarutitik qimarratigiuaraat?”

- Apeqqummut tassunga akissut – imaluunniit akissutip ilaa – tassaavoq kisitsit 16-i! – tassa Inatsisartuni amerlanerussuteqarniaraanni ilaasortat pisariaqartinneqartut, Kim Kielsen allappoq.

Taassuma erseqqissaatigaa naalakkersuisoqatigiit partiivisa ataasiakkaat kissaatitik tamaasa piviusunngortissinnaanngikkaat – imminnulli paaseqatigiittariaqartartut ataatsimoorfissaminnillu nassaarlutik.

Siulittaasoq illuatungiliuttunut toqqaannartumik aamma uparuaavoq.

- Partiinut naalakkersuisuutitaqalersunut illuatungiliuttut neriorsuutinik eqquutsitsinnginneraaneri naleqqutinngitsutut paasiuminartutulli isikkoqarsinnaapput. Pissaanermilli tigusaqarnertik – killiliussat tamatuma malitsigisai tamaasa ilanngullugit - partiit taakkua tuppallersaatigiinnartariaqarpaat, Kim Kielsen oqarpoq.

Naleraq: Siulittaasoqarfik politikkerfinngorpoq

Illuatungiliuttuni partiit annersaata, Naleqqap, Inatsisartut Siulittaasuata avammut taama nassiussaqarnera tupigusuutigeqaa.

- Inatsisartut Siulittaasuata, Kim Kielsenip, illua tungiliuttut sulinera Naalakkersuisullu ingerlatsinerat pillugit tamanut saqqummiussaa tupinnangaartoq siulittaasoqarfik politikkerfinngorsimasoq uppernarsillugu takoqaarput.

- Demokratiimi ingerlaaseqarnermi illua tungiliuttut suliassarinngilluaasarpaat naalakkersuisooqatigiit qujaniarfiginissaat imaluunniit akuersaaginnatumik malinnaaffigineqaannaarnissaat, Jens NapãtôK´ (N), tusagassiorfinnut nalunaarummi oqarpoq.

Inatsisartut Siulittaasuata pisussaaffianut ilaasoq tassaavoq, ilaasortat tamaasa assigiimmik sullinnissaat. Tamannali maanna piujunnaariartortoq Naleraq isumaqarpoq.

- Politikkikkut ingerlaaserineqalersoq ernumanartoqarpoq, tassa Inatsisartut Siulittaasoqarfiat annertunerujartuinnartumik politikkikkut oqallinnermut peqataasalermat aammalu Naalakkersuisunik tamanut ammasumik illersuisutut inissisimalermat, demokrratiimik tunngaveqarnitsinni ingerlaaseqarsimanitsinnut illersuinerunanilu innarliilerpoq,  Jens NapãtôK´ oqarpoq.

Siumut: Siulittaasoq immikkoortitsisussaanngilaq

Illuatungiliuttut aappaata, Siumukkut, Inatsisartut Siulittaasuannit appisaluunneqarnertik aamma iluarinngeqaat.

- Siumumiit akuerinngilluinnarparput aammalu taamatut iliortoqarnera Inatsisartuni atuuffimminik immikkoortitsisinnaannginneranik ersersitsisuusutut nalilerneqarsinnaalluni.

- Inatsisartut Siulittaasuat Inatsisartunit qinigaavoq Inatsisartut aqutsisuussalluni Inatsisartullu sulinerannik siuarsaasussaalluni. Atuuffimmi tassani nalinginnaasumik ataatsimiinnerit immikkoortitsiviunngitsumik aqussallugit, Inatsisartut tamakkerlugit, tassalu naalakkersuisooqatigiit aamma illuatungiliuttut sinnerlugit sinniisuussalluni, Erik Jensen (S), partiip tusagassiorfinnut nalunaarutaani oqarpoq. 

Taakkua Inatsisartut Siulittaasuata qanoq suleriaaseqartussaaneranik kissaateqarput.

- Siumup kissaatigaa Inatsisartut siulittaasuat tassaassasoq arlaannaanulluunniit attuumassuteqarani Inatsisartuni ilaasortanut tamanut proffessionaliusumik sullissisoq, inatsisartuutitat kissaataannik suliakiussaannillu naalaarsinnaassuseqarlunilu sullisserusuttorlu, Erik Jensen oqarpoq.

Sermitsiap isornartorsiorneqartoq, Kim Kielsen, isornartorsiutinut akitikkumallugu attaveqarfigaa. Allaaserisalli suliarineqarnerani tamanna iluatsinngilaq.