Ineqarnermut akiliutit qaffaqqilerput: Attartortut qaammammut 101 koruuninik akiliinerusalissapput

Namminersorlutik Oqartussat inissiaataanni najugaqaruit, februaarip aallaqqaataat 2027 aallarnerfigalugu ineqarnermut akiliuteqarnerusalissaatit.

Qaffaaneq agguqatigiisillugu qaammammut 101 koruuniussaaq. Qaffaatigineqartussaq ukiumut 1.212 koruunit missaaniissalluni. Tamanna Ineqarnermut, Attaveqaasersuutinut Isorliunerusunut Upalungaarsimanermullu Naalakkersuisoqarfiup Facebookikkut quppernerani atuarneqarsinnaavoq.

Aningaasat qaffaanermit isertinneqartussat inissiat iluarsartuunnissaannut aserfallatsaaliornissaannullu atorneqassapput.

Sivisuumik pilersaarutaanikuusoq

2024-mi septembarimi Naalakkersuisuusut ineqarnermut qaffaanissamik pilersaarut saqqummiuppaat. Ineqarnermut akiliutit 2027-miit 2041-p tungaanut ukiumut 3,8 procentimik qaffanneqartarnissaat pilersaarutaalluni. Namminersorlutik Oqartussat inissiaataasa aserfallatsaaliorneqarnissaanut kinguaattoorutit 2,5 mia. koruuninut taamani naatsorsorneqarput.

Kinguaattoorutit ineqarnermut akiliutit qaffannerisigut ilaatigut akilerneqassasut taamani Ineqarnermut Naalakkersuisuusup Hans Peter Poulsenip oqaatigaa. Ineqarnermut akiliutit 2022-miilli qaffanneqarnikuunngillat, piffissami tassani Namminersorlutik Oqartussat aningaasartuutit matussuseeqataanikuullutik.

AAMMA ATUARUK 

Ineqarnermut akiliutit qaffarujussuartussanngortut

Inissiat 8.400-t missaaniittut INI A/S-ip aqutarai, taakkunannga  5.600-t missaanniittut Namminersorlutik Oqartussanit pigineqarlutik. Sinneri kommuninit ilaatigut pigineqarput.

Taakku saniatigut Illuut A/S 2024-mi kisitsisit naapertorlugit inissianik 850-it missaanniittunik pigisaqarpoq. Suliffeqarfiup inissiaatai Agerskov Consultingimit aqunneqarlutik.

Ineqarnermut tapiissutit qaffaavigineqassasut

Ineqarnermut akiliutit qaffannissaannut qaammat ataaseq sioqqullugu ineqarnermut tapiissutit aamma qaffanneqassapput.

Naalakkersuisummi ineqarnermut tapiissutit amerlanerpaamik tunniunneqarsinnaasut qaffanneqarnissaat aalajangiukkamikku.

Illoqatigiit qanoq isertitaqartiginerat, najugaqatigiit qassiunersut aamma inissiap qanoq angitiginera naapertorlugu ineqarnermut tapiissutit naatsorsorneqartarput.