Innuttaasut piffissami aalajangersimasumi atsiornernik katerseriarlutik Inatsisartunut toqqaannartumik suliassanngortitsillutik siunnersuuteqarsinnaalersinnaassapput.
Oqaluuserisassaq Naalakkersuisut aaqqissuussinermik pilersitseqqullugit peqquneqarnissaannik, Inatsisartut aalajangiiffigisassaattut Mariane Paviasen Jensenimit siunnersuutigineqartoq, pilersaarutit malillugit ullumi sisamanngornermi juunip sisamaani Inatsisartuni Pipaluk Lyngemit saqqummiunneqassaaq.
Innuttaasut piffissami aalajangersimasumi atsiornernik katerseriarlutik Inatsisartunut toqqaannartumik suliassanngortitsillutik siunnersuuteqarsinnaalersinnaassapput.
Oqaluuserisassaq Naalakkersuisut aaqqissuussinermik pilersitseqqullugit peqquneqarnissaannik, Inatsisartut aalajangiiffigisassaattut Mariane Paviasen Jensenimit siunnersuutigineqartoq, pilersaarutit malillugit ullumi sisamanngornermi juunip sisamaani Inatsisartuni Pipaluk Lyngemit saqqummiunneqassaaq.
Siunnersuut aqqutigalugu innuttaasut atsiornernik katersinermikkut ajornannginnerusumik Inatsisartuni oqaluuserisassatut siunnersuuteqarsinnaalissapput, Pipaluk Lynge oqarpoq.
KOMMUNEQARFIK SERMERSUUMI INNUTTAASUT SIUNNERSUUTEQARSINNAANERAT
Kommuneqarfik Sermersuumi inuttaasut Kommuneqarfiga.sermersooq.gl aqqutigalugu siunnersuuteqarsinnaanerat periarfissaavoq.
- Nuummi innuttaasut atsiornernik 250-nik katersisimanissaat piumasaqaataavoq
- Illoqarfinni nunaqarfinnilu Nuup avataaneersut atsiornernik 50-nik katersisimanissaat piumasaqaataavoq
- Ullut 90-it iluanni atsiornerit katersorneqarsimasussaapput
- Internetsimut attaveqarnissaminnut periarfissaqanngitsut, innuttaasunik sullissivik aqqutigalugu allakkatigut atsiornernik katersisinnaapput.
Najoqqutaq: kommuneqarfiga.sermersooq.gl
- Taamaaliorneq tassaavoq innuttaasunik ullumikkorniit annerusumik peqataatitsinermik kinguneqartussaq, tamallu oqartussaaqataanerannik nukittorsaasussaq, Pipaluk Lynge siunnersuummini allappoq.
Atsiornernik qanoq amerlatigisunik ulluni qassini katersisimanissamik piumasaqaateqarnissaq siunnersuummi allaqqanngilaq.
- Atsiornernik 200-nik imaluunniit 500-nik katersisoqartassanersoq nalilersorneqarsinnaavoq eqqartorneqartariaqarlunilu, Pipaluk Lynge oqarpoq.
Millionilinnik naleqarsinnaasoq
Nittartakkamik pilersitsineq ineriartortitsinerlu 1,87 million koruuninik akeqassangatinneqartoq, kingornalu nittartakkamik ingerlatsineq ukiumut 570.000 koruuninik naleqassangatinneqartoq, allaffissornikkullu ukiumut 500.000 akeqassasoq, Pipaluk Lynge siunnersuummini allappoq.
Innuttaasut siunnersuuteqarsinnaalernissaasa piviusunngortinneqarsinnaanera anguneqassappat aningaasat minnerpaamik 2,94 million koruunit pisariaqartinneqassapput. Qanorli aningaasalersorneqassanersoq Pipaluk Lynge iluamik nassuiaatissaqanngilaq.
- Ataatsimiititaliamut ingerlateqqinneqaqqissappat 1 million koruunit atorneqassasut ataatsimiititaliaq aalajangersinnaavoq, taava aningaasat taakkua ujartorsinnaassavagut, Pipaluk Lynge oqarpoq.
Tamat oqartussaaqataanerannik nukittorsaassasoq
Illoqarfiit ilaanni Inatsisartuni ilaasortaatitaqarfiunngitsuni, soorlu Qaanaami Uummmannamilu innuttaasut, una periuseq atorlugu siunnersuuteqarsinnaalernermikkut oqaloqataallutik, sunniuteqarlutik tusaaneqarlutillu misigilissasut, Pipaluk Lynge isumaqarpoq.
- Innuttaasut umiarsualiveqarnikkut, pisiassat akiisa appartinneqartariaqarnerannik, mittarfitsigut allarpassuartigullu aaqqiisoqartariaqartoq isumaqarunik, atsiornernik katerseriarlutik Inatsisartuni oqaluuserisassanngortitsisinnaalissapput, Pipaluk Lynge oqarpoq.
BORGERFORSLAG.DK
Danmarkimi folketinngimut innuttaasut siunnersuuteqarsinnaanerat periarfissaavoq. Folketinngimut qinersisinnaasut Borgerforslag.dk aqqutigalugu ulluni 180-ini atsiornernik 50 tusindinik katersinermikkut siunnersuuteqarsinnaapput.
Najoqqutaq: borgerforslag.dk
Nunatta isorartunera tunngavigalugu inoqarfiit tamarmik Inatsisartunit Naalakkersuisuniillu qinigaaffiup ataatsip iluani tikinneqarnissaannik periarfissaqarnatik, Pipaluk Lynge siunnersuummini allappoq.
- Imaanngilaq illoqarfiit nunaqarfiillu tikikkusunnginnatsigit tikinneq ajorigut, innuttaasut qinikkallu imminnut qaninnerulernissaat uani pineqarpoq, Pipaluk Lynge erseqqissaavoq.
Innuttaasut qinikkallu qanimut suleqatigiinnerulissasut
Inuit ataasiakkaat soqutigisaqaqatigiilluunniit tusaaneqarnissaminnut periarfissagissaarnerulernissaat anguniarneqartoq Pipaluk Lynge oqarpoq.
- Una eqaallisaataasussaallunilu tamat oqartussaaqataanerannik nukittorsaassaaq. Sinerissamit innuttaasuninngaanniit kissaatit, pingaartitat naleqartitallu suuneranik aamma tusarnaartussanngortussaassagatta, Pipaluk Lynge oqarpoq.
Innuttasut politikerinngunngikkaluarlutik atsiornernik katersinermikkut Inatsisartuni oqaluuserisassamik siunnersuuteqarsinnaalernissaat periarfissanngussasoq Pipaluk Lyngep oqaatigaa.
- Assersuutigalugu innuttaasut politikeriunngikkaluartut, soorlu uranisioqqusinngitsut, qineqqusaaqqaartariaqartarpugut inuiaqatigiinni sunniuteqarsinnaanissarput anguniarlugu, Pipaluk Lynge oqarpoq.
Pipaluk Lyngep siunnersuut tigulluarneqassasoq neriuutigalugu oqarpoq.
- Inatsisartuni qinikkat ataasiakkaat oqariartuutigisartagaat, soorlu “sianerfigineqarama imatut imatullu pisoqarporooq” - atorunnaarlugu, taamaalilluta una periuseq atorlugu tunngavissaqarnerulluta takussutissaqarnerullutalu qaqitsisartussanngussagaluarpugut, Pipaluk Lynge oqarpoq.
Inatsisartuni oqallinneq Sermitsiamit malinnaaffigissavarput.
