Inuiannik nungusaanerup oqallisigineqarnerani inuit pisinnaatitaaffiisa unioqqutinneqarnerat puigorneqassanngilaq

Arnat niviarsiaqqallu, akuersiteqqaarnagit piumassuserinngisaannillu naartunaveersaasersorneqarsimasut inuttut pisinnaatitaaffii tunngaviusut arlallit unioqqutinneqarsimapput.

Naartunaveersaasersuinikuunermut tunngatillugu inuit pisinnaatitaaffii pillugit akuliusimaffigineqanngitsumik nalunaarusiaq saqqummiunneqareersorlu, Inuit Pisinnaatitaaffii Pillugit Siunnersuisoqatigiinni (IPPS) siulittaasoq Tukumminngiaq Olsen Lyberth taama isummerpoq. Nalunaarusiaq innersuussutigisaa Dalee Sambo Doroughimit Miriam Cullenimillu suliarineqarpoq.

Naalakkersuisut spiralilersuisarsimaneq pillugu nalunaarusiat marluk tallimanngormat saqqummiuppaat. Aappaa inatsisilerituumit Jonas Christoffersenimit tarnillu pissusaanik immikkut ilisimasalimmit Jensine Nedergaardimit suliarineqarpoq. Taakku misissuinerup nalaani isumaqataajunnaarlutik nalunaarusioqatissaraluatik suleqatigiumajunnaarpaat. Nalunaarusiaalli Naalakkersuisut akueriumanngilaat. Tukumminngiaq Olsen Lyberthip isummersornermini Dalee Sambo Doroughip Miriam Cullenillu nalunaarusiaat tunngavigaa.

Suliaq oqaluttuarisaanermi peqqissutsimut tunngassuteqaannarani, inuit pisinnaatitaaffiisa unioqqutinneqarnerannut tunngassuteqartoq IPPS-imit tikkuarpaat, nunasiaatilittummi oqartussaaffiup nalaani naartunaveersaasersuisoqarpoq.

- Nalunaarusiat eqqartorneranni pingaarnerpaaq puigunngisaannartariaqarparput: Inuit pisinnaatitaaffiisa unioqqutinneqarnerat, Tukumminngiaq Olsen Lyberth oqarpoq.

Arnat nammineq aalajangiisinnaatitaanerat, peqqissutsimut kinguaassiuutitigullu peqqissusaat, nammineq ilaqutariittullu inuunermut tunngatillugu aalajangiisinnaanerat unioqqutinneqarsimasoq nalunaarusiami ilaatigut erserpoq.

Akuersinermut tunngassuteqaannanngilaq

IPPS-imit oqaatigineqartut naapertorlugit suliaq naammattumik ilisimatitsinani akuersiteqqaaranilu iliuuseqarsimanermut tunngaannanngilaq.

Arnat kalaaliupput Inuit, taamaammat nunap inoqqaavisa ataasiakkaarlugit ataatsimoorussamillu pisinnaatitaaffii unioqqutinneqarsimanerat siunnersuisoqatigiit tikkuarpaat.

- Arnat nakorsiartutut naammattumik paasissutissinneqarsimanngitsutut taamaallaat isigineqassanngillat. Pisinnaatitaaffinnik piginnittuupput, Tukumminngiaq Olsen Lyberth oqarpoq.

Unioqqutitsineq inuiannik nungusaasoqarsimanera pillugu oqallinnermi puiguinnarneqassanngilaq

Naartunaveersaasersuisoqarnerani inuiannik nungusaasoqarsimanersoq pillugu annertuumik oqallittoqarpoq. Inuiannik nungusaasimanermut apeqqut inatsisitigut pisariullunilu ilungersunartuusoq, naartunaveersaasersuinerli kisiat tunngavigalugu tunngavigalugu inuiannik nungusaasoqarsimanera inerniliunneqarsinnaanngitsoq IPPS-imit isumaqarput.

AAMMA ATUARUK

Spiralilersorneqarsimasut: Soriarsinnaanngitsutut eqqugaanikuujunnaarpugut

Illuatungaanili apeqqut taanna mattutivissinnaanngilaat, matumani kalaallit Inuit meerartaarnissaat pinngitsoortinniarlugu siunertaqartoqarsimaneranik toqqaannartumik allassimasumik peqannginnera tunngavilersuutigalugu.

Taarsiullugu suliaq tamakkerlugu isiginiarneqartariaqarsoraat.

- Inuiannik nungusaaniarrnissamik apeqqut innarliinernut uppernarsaaserneqartunut assiaqutaassanngilaq. 

- Pisimasut tamarmiusut ataatsimut isigalugit nalilersorneqartariaqarput: Suna piva? Qanoq annertutigisumik piva? Kikkut eqqorneqarpat? Sooq piva? Aamma pissutsit qanoq ittut iluanni piva?, Tukumminngiaq Olsen Lyberth allappoq.