Spiralilersorneqarsimasut: Soriarsinnaanngitsutut eqqugaanikuujunnaarpugut

Siullermik arnat naartunaveersaasersorneqarsimasut taarsiivigineqarnissaat Folketingimi akuersissutigaat, kinguninngualu nalunaarusiat saqqummiunneqarlutik. Pisorpassuit kingorna arnat maanna eqqissisimatinneqarnissartik kissaatigaat. Nalunaarusiat oqaaseqarfigerusunngilaat apersorneqarusunnatillu. Ukiorpassuarnimi ilungersorsimanermik kingorna eqqissillutik tarnikkut katsoriartornissartik eqqissillutik piffissaqarfigerusuppaat.

Naja Lyberth spiralilersorneqarsimasut suliniuteqarneranni ukiorpassuarni siuttunut ilaavoq. Aqutsisooqatigiinnut ilaasortat allat tassaapput: Marie Louise Andersen, Arnaq Johansen, Hedvig Frederiksen, Marie Petrussen aamma Karla Egede Bisgaard.

Assiliisoq: Oscar Scott Carl

Arnaq Nielsen Arnaq Nielsen Tusagassiortoq

Saqqummersinneqarpoq 31. Aggusti 2026 - 13:21

Ussassaarut

Spiralilersuisimanermut tunngatillugu suliat arlalissuit sapaatip-akunnerata ingerlanerinnaani pipput.

Arnat 1960-imiit 1991-imut akuersitinneqaqqaaratik naartunaveersaasersorneqarsimasut taarsiivigineqarnissaat Folketingimi sisamanngormat akuersissutigaat. Taamaalilluni arnat taarsiivigineqarnissamut piginnaatitaasut 300.000 koruuninik taarsiivigineqarnissaminnut qinnuteqarsinnaalerput.

Tallimanngormat allamik aamma pisoqarpoq. Spiralilersuisimanermi inuit pisinnaatitaaffii unioqqutinneqarsimanersut misissorneqarput, aamma inuiaqatigiinnik nungusaasoqarsimasinnaaneranut apeqqut akissutisiniarneqarluni. Nalunaarusiat taakkua arnat pineqarsimanerat pillugu ukiorpassuanngulersuni oqallittoqareersorlu saqqummiunneqarput.

Maanna spiralilersorneqarsimasut aqutsisoqatigiivi qisuariaateqarput. Nalunaarusialli oqaaseqarfigerusunngilaat aamma apersorneqarnissartik kissaatiginagu.

Aqutsisoqatigiit tusagassiorfinnut nalunaarutaat Sermitsiamit issuaavigisinnaagipput Naja Lyberthip akuersissutigaa.

Ussassaarut

- Eqqissilluta mamisarusuppugut

Arnat ukiorpassuarni ilungersorsimagamik eqqissillutik mamisarnissartik kissaatigigaat aqutsisoqatigiit tusagassiorfinnut nalunaarumminni erseqqissaatigaat.

- Tusagassiortunit apersorneqarnerit tamaasa tamatigut ikeq ammarneqartarmat, taamaammat massakkut kissaatigaarput tarnikkut katsoriartornissatsinnut eqqissisimatitaassalluta, taamaattumik tusagassiortunit eqqissisimatitaanissarput kissaatigaarput, taakku allapput.

Arnat sorsuutiginninnerminni aniguinikuusut aqutsisoqatigaat aamma erseqqissaatigaat.

- Ullumikkut pineqarsimanitta sorsuutiginerani aniguinikuuvugut iliuuseqarnikkut. Soriarsinnaanngitsutut eqqugaanikuujunnaarpugut. Eqqissisimatitaanissarput kissaatigiinnarparput katsoriartornissarput pillugu.

Naalakkersuisut misissuinermut akisussaapput

Spiralilersuinermi Naalagaaffiit Peqatigiit inuit pisinnaatitaaffiinut isumaqatigiissutaa unioqqutinneqarsimanersoq pillugu Naalakkersuisut misissuititsinerat saqqummiunneqaqqammiinnartoq arnat taama oqariartuuteqarput.

Misissuititsineq arnanit eqqugaasunit suliniuteqarsimasunillu akisussaaffigineqanngitsoq, Naalakkersuisulli akisussaaffigigaat arnat naqissuserpaat.

- Arnat piumassuserinngisamik spiralilersugaasimasut aqutsisoqatigiianniit matumuuna nalunaarutigissavarput FN’ip inuit pisinnaatitaaffii pillugit isumaqatigiissutaat tunaartaralugu Naalakkersuisut qulaajaatitsinermut piginnittuummata. Uagutsinniinnanili eqqugaasuni suliniuteqarsimasuniiinnani.

Qulaajaanerli pingaarutilittut isigaat, pineqartunummi pisut qanoq kinguneqarsimaneri uppernarsaaserlugit saqqummiunneqarmata.

Nalunaarusiat pillugit oqaaseqarusunngillat

Nalunaarusiat saqqummiunneqartut aqutsisoqatigiit oqaaseqarfigerusunngilaat - inuiannik nungusaasoqarsimasinnaanerannut apeqqut oqaaseqarfigerusunngisaannut ilaalluni.

- Inuiaat nungusarniarneqarnerannik eqqartorneqarnera pillugu oqaaseqarusunngilagut.

Eqqartukkap sakkortunera eqqugaasunut utersaartitsisarmat taama aalajangersimapput.

Nunatta, Danmarkip USA-llu akornanni pisut pineranni suliap Danmarkimut politikkikkut akerliusunit atorneqannginnissaa aqutsisoqatigiit kissaatigaat. - Eqqissilluta Kalaaliorusuppugut, Nunatsinni Kalaallit Nunaanni inunngortugut. Qallunaajorusunngilagut aamma amerikamioorusunngilagut, arnat allapput.

- Eqqugaasuulluni taamatut naliliineq sakkortummat sakkortuumillu utersaartitsisinnaalluni eqqugaasunut. Taamammamat aqutsisoqatigiittut taamatut naliliineq isummerfigerusunngilarput – eqqugaaqatigut paarerusunnerugatsigit.

Maannakkut naalakkersuisuusut pineqanngillat

Aqutsisoqatigiit peqatigitillugu erseqqissarpaat oqaluttuarisaanermi iliuuserineqarsimasut Danmarkimi imaluunniit Kalaallit Nunaanni naalakkersuisut maanna atuuttut akisussaaffiginngikkaat.

- ERSEQQISSAATIGISSAVARPULLI ullumikkut Qallunaat Nunaanni naalagaaffik aamma ullumikkut Nunatsinni Naalakkersuisut pisuunngimmata uagutsinnut iliuuserineqarsimasut pillugit, aqutsisoqatigiit allapput.

Nunatta, Danmarkip USA-llu akornanni politikkikkut pisut pillugit suliaq sakkussatut atorniarneqassanngitsoq aqutsisoqatigiit kissaatigaat.

- Eqqissilluta Kalaaliorusuppugut, Nunatsinni Kalaallit Nunaanni inunngortugut. Qallunaajorusunngilagut aamma amerikamioorusunngilagut, arnat allapput.

Danmarkimi naalakkersuisut maanna atuuttut pisimasunut aaqqiiniarlutik utoqqatsernermikkut taarsiissuteqarnermikkullu akisussaaffimmik tigusisimasut, aqutsisoqatigiit oqaatigaat.

Assingusumillu pisoqaqqinnginnissaa qulakkeerneqartariaqarpoq.

- Massakkut Qallunaat Nunaanni Naalakkersuisut aamma Nunatsinni Naalakkersuisut qulakkeerinnittussaapput assingusaanik pisoqaqqinngisaannarnissaa ullumikkut siunissamilu.