Ittoqqortoormiini unnummut akerliussutsimik takutitsisoqalerpat illoqarfinni tallimani tapersersuisoqassaaq 

Ittoqqortoormiini unnummut nalunaaqutaq 19.00 akerliussutsimik takutitsinissamut piareersaatit kingulliit inississorneqaleruttorput.

Illoqarfimmilu taama pisoqajuimmat akerliussutsimik takutitsinissamik aaqqissuisoq, aamma najukkami ataatsimiititami siulittaasoq Hans Brønlund pissangavoq. 

- Pissangavunga, aatsaat siullerpaamik maani ingerlatsileratta. Aamma taakkua akerliussutsimik takutitsivissagut imaannaanngitsorsuugamik, Hans Brønlund ataasinngornerup ullaavani taama oqarpoq.

Taassuma akerliunissaminni illoqarfiit allat tapersersueqqullugit kaammattornikuuai. Kaammattuineralu iluatsilluarsimarpasippoq.

Illoqarfinni tallimani tapersersuisoqassaaq 

Akerliussutsimik takutitsinissami illoqarfinni tallimani tapersersuilluni katersuuttoqassasoq akerliussutsimik takutitsinissamik aaqqissuisup oqaatigaa. Illoqarfiit pineqartut tassaapput: Tasiilaq, Nuuk, Qaqortoq, Nanortalik Narsarlu.

AAMMA ATUARUK

Ittoqqortoormiit nuna tamakkerlugu akerliussutsimik takutitsinissamut kajumissaarivoq: Tapersersuinissarsi pisariaqartipparput

Kommune Kujallermi tapersersuilluni akerliussutsimik takutitsinissamik nalunaaruteqartoq tassaavoq kommunimi borgmesteri Malene Vahl Rasmussen (D). Qaqortumi tapersersuerusuttut tissaluttup eqqaani nalunaaqutaq 19.00 naapissapput. Narsami Nanortalimmilu akerlioqataaniartut kommunit allaffiisa eqqaani naapissapput.

- Takkulluarisi, Erfalasorput nassarlugu takutitsigu nunarput pigiuaannarusukkipput. Aamma oqartussaaffik taanna paariuaannarusukkipput. Taamaammat Ittoqqortoormeermiit tapersersorlugit takutitsigu, Kommune Kujallermi borgmesteri Malene Vahl Rasmussen Facebookikkut videomi siammartikkamini taama oqarpoq. 

Nuummi tapersersuiniartut Kûnguak Cafe Nuutoqqamiittoq naapiffigissagaat tapersersuinermik aaqqissuisoq Aqqalukkuluk Fontain Facebookimi quppernermini nalunaarpoq. 

- Nunatta siunissaa pineqarpoq. Tullissatta kingornutassaat pineqarpoq. 

- Nuummi pisussami borgmesteri oqalugiartussaavoq, taava aamma uanga tuluttut oqalugiarumaarpunga, Aqqalukkuluk Fontain videomi Facebookikkut ikkussamini taama oqarpoq. 

Amerikamiut ingerlatseqatigiiffiata Greenland Energy Companyp tuluit suliffeqarfiutaata White Flame Energyp ataaniittoq 80 Mile suleqatigalugu uuliasiornialersaartuupput.

Taakkununngalu kisimiillutik akerliusussaajunnaaramik Ittoqqortoormiini akerliussutsimik takutitsinissamut aaqqissuisoq oqiliallappoq.

- Toqqissinaq taamatut tapersersorneqarluni. Iluaq kisimiinnani misigaluni. Qujanarpoq taamatut sineriammiit tapersersorneqarluni, Hans Brønlund oqarpoq. 

Tasiilami tapersersuiniartut illoqarfiup qeqqani kommunip saavatungaaniittumi naapissasut tapersersuinissamik aaqqissuisoq Aron Kristiansen nalunaarpoq.