Ittoqqortoormiit nuna tamakkerlugu akerliussutsimik takutitsinissamut kajumissaarivoq: Tapersersuinissarsi pisariaqartipparput

“Navianartorsiortutut tusaanngitsuusaarneqartutullu maanna misigivugut, ikiorneqarnissatsinnik tapersersorneqarnissatsinnillu qinnuigaatsigit.”

Ittoqqortoormiini najukkami ataatsimiititaliap siulittaasua, Hans Brønlund, Kalaallit Nunaata sinneranut allappoq.

Najukkami ataatsimiititaliap Kalaallit Nunaanni kommunit allaffiisa, illoqarfinniluunniit katersuuffiit, saavanni ataasinngornermi juulip 13-ianni nalunaaqutaq 19.00 akerliussutsimik takutitsisoqarnissaa kaammattuutigaa.

Nunap Qeqqani (Jameson Land, aaqq.) uuliasiornermut akerliussutsimik takutitsinissaq pilersaarutaavoq.

AAMMA ATUARUK

Borgmesteri uuliasioqatigiiffiup pisortaanut: Oqariartuutigineqartoq sorleq Kalaallit Nunaanni innuttaasut upperissavaat?

Amerikamiut ingerlatseqatigiiffiat Greenland Energy Company pineqarpoq, taakku tuluit suliffeqarfiutaat White Flame Energyp ataaniittoq 80 Mile suleqatigalugu, kisiartaallutik Kalaallit Nunaanni uuliasiornissamut akuersissutituanik pingasuusunik piginnittuuvoq.

Nunap Qeqqani akuersissutit immikkut ittuupput. Naalakkersuisut 2014-imi akuersissut tunniussaat, misissuinissamut piiaasinnaanermullu akuersissutaavoq. Ingerlatseqatigiiffik uuliamik naammattumik nassaassaguni niuerutigisinnaanissaanik tassa akuersissutaateqarpoq.

Tamannalu pissutigalugu innuttaasut aallaqqaammut suliniummut isumalluarsimagaluartut maanna ernummateqarput. Greenland Energy Companymi pisortaaneq Robert Price aamma 80 Mile-mi pisortaq Olga Solovieva innuttaasunik ataatsimiititsineri kingorna isumaat allanngorput, tassani innuttaasut uupakaatinneqartutut misigipput.

- Nunat allamiut suliffeqarfiutaat nunatatsinni, Jamesonlandimi, siunissarput soqutiginagu uuliasiornissamik pilersaaruteqartut maanna paasivarput. Nunat allat politikerii nuimasut nunatta pisuussutai namminneq pigisamittut eqqartortarpaat. Nunali manna uagut pigaarput. Umartatsinni ilualiaqartumi uuliakoortoqassagaluarpat pinngortitaq kisiami mingutsinneqassanngilaq – Ittoqqortoormiini piniarnermut kulturi, inussuteqarput Ittoqqortoormiinilu siunissarput piuneerunneqassapput, Hans Brønland allappoq.

AAMMA ATUARUK

Najukkami siulittaasoq Ittoqqortoormiini innuttaasunik ataatsimiititsinerup kingorna: Naalakkersuisut uuliasiortitseqatigiiffimmik oqaloqateqarneq tigusariaqarpaat

Politikerinut: Uagutsinnut tapersersuigitsi

Najukkami ataatsimiititaliaq Naalakkersuisut siulittaasuannut Jens-Frederik Nielsenimut (D), nunanut allanut tunngasunut naalakkersuisumut Muté B. Egedemut (IA) folketingimilu ilaasortanut Naaja Nathanielsenimut (IA) Qarsoq Høegh-Damimullu (N) ikioqqulluni saaffiginnippoq.

- Politikikkut sunniuteqarsinnaassuseqarnikkut nunaniit allaniit soqutigineqarnitsinnut illersussagitsigut pisariaqartipparput. Uagutsinnut tapersersuigitsi, uuliasioqqusinnginnerput illersorsiuk, Jameson Landillu allanngortinneqannginnissaanik ikiorluta.

Greenland Energy Company aamma 80 Mile naapertorlugit sumiiffik nunarsuarmi uuliasiorfiit sinneruttut annersaasa 13-issaraat, tassa nappartat 13 milliardit missaanniittunik uuliaqassangatinneqarluni.

Jameson Landimiilli niuernissamut ilimanaat paasissutissat pioreersut tunngavigalugit suli piviusunngorallarunnanngilaq.

Taamaammat suliffeqarfiit nuna misissoqqissaaqqaarniarpaat. Aatsitassarsiornermut oqartussaasunut qillerillutik misissueqqissaarnissamik aamma 3,5 kilometerisut ititigisumi marlunnik qillerinissamut akuersissummik qinnuteqarput. Aatsitassanut naalakkersuisoqarfik Sermitsiamut juunip aallartilaarnerani ilisimatitsivoq.