Jens-Frederik aqqartartoq pillugu: Pisussaaffigut soorunami eqquutsikkusuppagut
Naalakkersuisut siulittaasuat Jens-Frederik Nielsen (D) Amerikamiut aqqartartuat pillugu paasissutissanik amerlanerusunik KNR-imut oqaaseqarpoq.
USS Delaware 50 meterisut ungasitsigisumiittoq.
Assi: Nammineq pigisaq
Jens-Frederik Nielsen (D) Amerikamiut aqqartartuani inuttaq perululluni napparsimammat Kalaallit Nunaata imartaanut isersinnaallutik tallimanngornermi februaarip 20-anni qinnuteqarsimasut KNR-imut nassuiaatigaa:
- Inuk aqqartartumi imartatsinniittumi nunattalu eqqaaniittumi peruluttoq pineqarpoq.
- Taamaattumik ikiuinissarput pisussaaffigaarput. Illersornissaq pillugu suleqatigiinnermi ataatsimooqataanerput eqqaamassavarput, taamaattumik ikiuinissatsinnut pisussaaffigut soorunami eqquutsikkusuppagut, Jens-Frederik Nielsen KNR-imit apersorneqarluni oqarpoq.
Taamaalilluni Naalakkersuisut siulittaasuat aqqartartumut atomip nukinganik ingerlatilimmut USS Delawaremut, arfininngormat Nuummit 7 sømilinik ungasitsigisumiitilluni puttallartumut, tunngasunik nutaanik paasissutissiivoq.
Pisoq politikikkut qaqinneqartoq
Issittumi Sakkutooqarfiup inuttap peruluttup aqqartartumiit Dronning Ingridip Napparsimmavissuanukaappaa, taannalu tassani nakorsarneqarluni.
Pisop politikerimit akuleruffigineqarluni Siumumi ilaasortap Erik Jensenip §37 naapertorlugu Naalakkersuisunut apeqquteqarteqarluni, amerikamiut aqqartartuata Kalaallit Nunaata imartaani sulerinersoq Siumumiit akissutiserusunneqarpoq.
Apeqqut præsident Donald Trumpip Kalaallit Nunaannik tiguaaniarluni oqariartuuteqartarnera pissutigalugu USA-p Kalaallit Nunaatalu akornanni pissutsit ilungersunarsinnaasarnerata nalaani qaqinneqarpoq.
Jens-Frederik Nielsenili aqqartartoq ernumalernissamut pissutissaqanngitsoq KNR-imut oqarpoq. Jens-Frederik Nielsenip suliaq illersornissaq pillugu suleqatigiinnerup, Kalaallit Nunaata USA-llu aqqartartuata ilaaffigisaa, ilaatut iliuuseqarfigineqartoq oqaatigaa.
