Jens-Frederik Nielsen nalunaaqutaq 14.00 tusagassiortunik katersortitsissaaq
Donald Trumpip Kalaallit Nunaat pillugu siunissami isumaqatigiissummut sinaakkutissaq inissinneqartoq ippassaq nalunaarutigaa, Naalakkersuisut tamanna sioqqullugu tusagassiortunik katersortitsinissamut qaaqqusipput.
Jens-Frederik Nielsen tusagassiortunik nunanit tamalaaneersunik katersortitsinissamut qaaqqusivoq.
Assi: Oscar Scott Carl
Naalakkersuisut siulittaasuat Jens-Frederik Nielsen (D) nunanit tamalaanit tusagassiortunik ualeru
nalunaaqutaq 14.00 katersortitsissaaq.
Tusagassiortunik katersortitsineq Nuummi Katuami pissaaq.
USA-p præsidentiata Donald Trumpip nalunaarutaa kingulleq sammineqangaatsiassagunarpoq. Nato-mi generalsekretæri Mark Rutte ippassaq ataatsimeeqatigereerlugu Kalaallit Nunaat pillugu siunissami isumaqatigiissusiornissamut sinaakkutissat inissinneqartut oqarpoq.
Isumaqatigiissutit qanoq imaqarnersoq suli naluarput.
Trumpip Davosimi isumaqatigiissutip imarisaa erseqqissumik oqaatiginngilaa, oqarporli "kissaatigisatsinnik tamanik naammassinnittoq. Naalagaaffimmut nunallu tamalaat sillimaniarnerat ilanngullugu."
Ministeriuneq: Danmark Kalaallit Nunaallu kisimik aalajangiisinnaapput
Donald Trumpip Kalaallit Nunaannut “tamakkiisumik isersinnaanissaq” pillugu isumaqatigiinniartoqartoq oqaatigaa. USA-li Kalaallit Nunaanniinnissamut siammasittorujummik sinaakkutaqarpoq.
Ministeriuneq Mette Frederiksen (Socialdemokraterne) Danmarkip Kalaallit Nunaatalu oqartussaassusaat isumaqatigiinniutigineqanngitsoq oqarpoq. Ataatsimiinnermut peqataanngilaq, Mark Rutteli ataavartumik attaveqarfigisarpaa. Danmark Kalaallit Nunaallu Kalaallit Nunaat Danmarkilu pillugit kisimik aalajangiisinnaasut naqissuserpaa.
Jens-Frederik Nielsenili Donald Trumpip nalunaaruteqarnissaa sioqqullugu tusagassiortunik katersortitsinissamut qaaqqusivoq.
Folketingimi nunanut allanut tunngasunut ataatsimiititaliaq tallimanngorpat nunatta nalunaaqutaa malillugu 05.00 ataatsimiissaaq, tassanilu "kunngeqarfiup USA-mut attaveqarnera“ oqaluuserineqassalluni.
