Juulliaqqami piareersimasuuneq

Ilaqutariit kalaallit juulliaqqami mamartutuutileruttorfianni Issittumi Sakkutooqarfiup Nuummi umiarsualiviup qulaaniittumi qullersaqarfiani igalaat qaamapput.

Tassani sulisut ukioq kaajallallugu ulloq unnuarlu – aamma juulliaqqami – sulisarput. Issittumi Sakkutooqarfiup nakkutilliisoqarfia suliassanik piareersimaffiuvoq, tassanilu ulloq unnuarli aammalumi ulluinnaat nalliuttullu apeqqutaatinnagit sulisoqartuaannarpoq. Arlaannik pisoqariataartillugu inunnik ikiuisoqartariaqalissagaluarpat tassani piareersimasoqartuaannarpoq.

Kalaallit Nunaata isorartuup sakkutuunit nakkutigineqarnera soorunami pineqarpoq, akeqqat nunap immikkoortuaniinneranut nakkutilliiviulluni. Taamatulli umiarsuaq timmisartorluunniit ajutoorpat piareersimanissaq ikiuinissarlu pingaaruteqarluinnarpoq. Ajutoortoqarpat sukkasuumik iliuuseqartoqartariaqarpoq – sulisullu iliuuseqartussat ataqatigiissarnissaanut suliarujussuaq aallartinneqartarluni. Tassa inuuneq toquluunniit apeqqutaalersarpoq – sekundillu tamarmik pingaaruteqarput.

Juulliaqqami eqqissisimaneq

- Juulliaqqami sakkutooqarfinni eqqissisimanartarpoq, qujanartumik siorna aamma taamaappoq, sakkutuut naalagaat Nikolaj Bruun Værnskjold, siorna pigaartuusoq oqaluttuarpoq.

- Unnuarsiortuuvunga. Nakkutilliivimmi sulisut nalunaaquttap akunneri aqqaneq-marlukkaarlugit sulisarput, ullaakkut qulingiluanut unnukkullu qulingiluanut paarlaaqatigiittarluta. Juullikkunnili suleqatikka nereqatigiumallugit nalunaaqutaq tallimanut suliartujaarpunga.

- Misigisaq immikkuullarilluinnartarpoq – tamatta juulliaqqami sulisarnissaq sungiusimagaluarlugu piareersimagaluarlutalu ilaquttavut eqqarsaatiginngitsoorsinnaanngilavut. Amerlanerpaartatta ilaqutaat Danmarkimiipput. Tamanna eqqartulaartarparput ilaquttagullu qanoq juullisioqatigisimassagaluarnerlugit oqaluttuuttaattarluta.

- Ullukkoortut ilaat sulisullu sinneri nereqatigisarpagut. DMI-mimi Naviairimilu aamma juulliaqqami sulisoqartarpoq.

- Ataatsimuualaarneq annertunngikkaluartoq sulisut ataqatigiinnerannut pingaaruteqarluinnartuuvoq. Uanga ilaquttakka – nuliara meeqqagullu marluk mikisut – Nuummi najugaqarput, sulisulli allat Kalaallit Nunaanni ilaqutaqanngillat, taakkualu suleqatitik nuannarisatik peqatigalugit juullimi nereqatigiittarput.

SØMA-mit juullisunnitsut mamartut

- Quliulluta SØMA-meersunit juullisiutinik nereqatigiippugut. Qeerlutooq, naatsiiat kajortitat, miseraq kajortoq ris a’lamandellu – ilaquttat nereqatigisarnerattut. Unnuk taanna nakkutilliivimmi immikkorluinnaq illuni nuannerpoq.

- Qujanartumik arlaannik pisoqanngilaq. Issittumi Sakkutooqarfiup nakkutilliiviani pisortaq portviinnimik pajulluni pulaarnera eqqaassanngikkaanni. Portvinimik pajunnera sakkutuut imarsiortut ilarpassuatta najugaqarfigisaanni ileqquusoq. Sulinitsinnili imigassartortannginnatta portviniutittuusaakkatsinnik najoqqaalluni immitsinnut isigiinnarsinnaavugut.

Ullukkoortut ilaat juullimut nereqatigiinnermi SØMA-miillu ris a’lamandamik sassaalliutigineqartumi peqataasut ilagaat overkonstabel Amalia Cirkeline Pryter Hansen.

- Anaanaga Hjørringimiit juullisioriaqqagaluartoq, suleqatikka juullimi nereqatigiumallugit aalajangerpunga — anaanagalu juullimut tunissutimininnguanik pajuppoq.

- Taava anaanagalu juullimi angerlarsimaffitsinni qeerlutuutorlutalu ris a’lamandenik nerivugut.

Kalaallit Nunaat alutorigaa

- Kalaallit Nunaanni siullerpaamik juullisiorama juullip inuata nunaani juullimi nuannaarneq alutorilluinnarpara. Nuanneqaaq, tamannalu Issittumi Sakkutooqarfimmi atorfima sivitsornissaanut kajungilersippaanga.

- Ukiuni marlunni maaniinnissara aallaqqaammut pilersaarutaasimavoq, nuanninaarakkuli suliinnassaanga. Nuuk sungiulluarpara – aamma sunngiffimmi suliffittaarpunga. Sulinngikkaangama Bibi Chemnitzip pisiniarfiutaani ikiortaasarpunga.

- Maani Kalaallit Nunaanni pisariaqartitakka tamaasa nassaarivakka. Kisimiillunga pinngortitami pisuttuarneq nuannaraara – aamma Kalaallit Nunaanni kiffartuussininni sakkutuutut unamminartut immikkut ittut misigisarpakka, taamaattumik tamakku ingerlatiinnarusuppakka.

Nikolaj Bruun Værnskjold ukioq manna juullikkunni sulinani ilaquttani Danmarkimi juullisioqatigissavai.

Amalia Cirkeline Pryter Hansenili juulliaqqami unnuarsiortuulluni nakkutilliisoqarfimmi sulissaaq, arnaalu ukioq manna Hjørringimi angerlarsimaannassaaq.

- Taamaaliornissannut piumassuseqarpunga, nakkutilliisoqarfimmimi sulinerput Kalaallit Nunaanni inunnut tamanut pingaaruteqarpoq. Tamanna nuannaraara – sulilu ukiorpassuarni taamaaliorusuppunga, Amalia Cirkeline Pryter Hansen oqarpoq.