Kalaallit nittartagaat saassunneqartut - russininngaanniit

Kalaallit nittartagaat maannakkut internetikkut saassunneqarput - DDoS-imik taaneqartartunik. Inuiaqatigiit Isumannaatsuunissaannut Aqutsisoqarfik Ritzauimut paasissutissiivoq.

- Pisut malinnaaffigilluarpavut, Danmarkimilu Kalaallit Nunaannilu oqartussaasut saassussinerit pillugit qanimut oqaloqatigalugit, Aqutsisoqarfik allakkatigut akissummini paasissutissiivoq.

DDoS-imik saassussineq tassaavoq nittartakkat internettikkullu attaveqaatit ajoquserniarnerisigut attaveerutsitsiniaaneq.

Nittartakkat sorliit pineqarnersut Inuiaqatigiit Isumannaatsuunissaannut Aqutsisoqarfiup oqaatiginngilaa.

Kommunip nittartagaa ajornartorsiuteqartoq

Kommune Kujalliup nittartagaa tallimanngornermi ullaap tungaani iserfigineqarsinnaannginnera qarasaasiakkut saassussinermit pissuteqarnersoq ilisimaneqanngilaq.

Kommuneqarfik Sermersuup nittartagaa aamma taamaaligaluarpoq.

Kommuneqarfik Sermersuup nittartagartik aamma ajornartorsiuteqarsimagaluartoq tallimanngornerup ullaap-tungaani ilisimatitsissutigaat, taannali maanna ajorani.

Pisortaqarfiit pingaarnerit nittartagaasa iserfigisaqattaarnerisigut maanna ajoquteqanngitsut paasinarsivoq.

Russit suleqatigiit: Ukrainemut timmisartunik sorsuutinik tunniussisoqarneranut akiniaaneq

DR-ip paasissutissat pissarsiai naapertorlugit russit qarasaasiatigut saassussisartut NoName057 (16) pisuupput.

Taakku qarasaasiakkut saassussinerit akisussaaffigigaat, tamannalu oqarasuaatikkut attaveqaqatigiittarfiani paasinarsarunaarsakkami Telegramimi attaveqatigiinnerisigut paasinarsisoq, TV2 nutaarsiassiinermini allappoq.

Qarasaasiakkut saassussisartut Danmarkip Ukrainemut timmisartunik sorsuutinik tunissuteqarnera akiniaaffiginiarlugu saassussisoqartoq TV 2 allappoq.

NoName057 (16) marsimi 2022-mili aallartippoq, oqartussaasullu suliffeqarfiillu Nato-mi nunani Europamilu nunani allaniittut, Ruslandip soqutigisaanut akerliusutut isigineqartut, DDoS-imik saassuttarlugit.

Qarasaasiakkut peqquserluttut taakkua Danmarkimi kommuninut siorna novembarimi qinersisoqarnerani danskit kommuniisa ministeriaqarfiillu nittartagaannik aamma saassussipput.