Aarhusimi kommunip Eskimovejip aqqa allanngortippaa
Eskimovej Silavejimik marsip aappaaniit ateqalissaaq.
Assimi talerperlerniit:
Jesper Kjeldsen, Kulturimut Innuttaasunullu Kiffartuussinermut Siulittaasoq. Marie Annelise Kahlig, Aarhusimi Kalaallit Illuutaanni pisortaq. Tupaarnaq Egede Thorleifsen, Avalak Aarhusimi siulersuisunut ilaasortaq. Nicolaj Bang, Teknikkimut Avatangiisinullu Siulittaasoq. Anouk Holm Jensen, Avalak Aarhusimi siulersuisunut ilaasortaq.
Assi: Aarhus Kommune
Aarhus
Kommunep kommunimi aqquserngit taaguutaasa ilaat
allanngortippaa. Tassani Eskimovej pineqarpoq, taannalu Silavejimik
marsimi 2026-mi ateqalissaaq. Aqquserngup taaguutaata
allanngortinneqarnissaa Avalak Aarhus kiisalu Kalaallit Illuanniillu
kissaatigineqarpoq. Taakkua aqquserngup aqqa immikkoortitsinngitsumik
peqataatitsinerusumillu ateqarnissaa kissaatigaat.
Aarhus
Kommune najugaqartut soqutiginnittullu allat tusarniaaffigereernerisa
kingorna taama aalajangerpoq.
Aqquserngup
taaguutaa allanngortinneratigut naalagaaffeqatigiinni naleqartitat
ersersinneqartut, Teknikkimut Avatangiisinullu siulittaasoq oqarpoq.
-
Naalagaaffeqatigiinneq aatsaat taama tatineqartigaaq, taamaattumik
immitsinnut ataqqinnittumik pisarnissarput aatsaat taama
pingaaruteqartigaaq.
-
Kalaallit Illuutaannit Avalammillu aqqusernup taaguutaa
allanngortinneqassasoq kissaatigineqarpoq, maannalu tamanna
isumaqarluartumik taalliortorpalaartumillu allannguinikkut allatut
aqqusineq taaguuserneqarpoq, Aarhus Kommunemi Teknikkimut
Avatangiisinullu siulittaasoq Nicolaj Bang oqarpoq.
Silavej
sooq toqqarneqarpa?
Taaguut
Silavej kalaallit oqaasianniit aallaaveqarpoq, taanna inuit, nunap -
silap, nunarsuup aamma anersaap ataqatigiinnerannik isumaqarpoq.
Atermik toqqaaneq Avalak Aarhus kiisalu Kalaallit Illuata
siunnersuuteqarnerinik aallaaveqarpoq.
Silavej
Riisvangenimi Issittumut tunngasuni aterni ilaalissaaq, aqquserngit
allat issittumut tunngasunik atillit allat tassaapput: Knud
Rasmussens Vej, Mylius Erichsens Vej aamma Jørgen Brønlunds Vej.
Ateq illoqarfimmi kikkut tamarmik peqataatinneqarnerunissaannik
ataqqinninnermik, naleqartitsinermillu imaqarnera Kalaallit
Illuutaanni pisortap Marie Annelise Kahligip oqaatigaa.
-
Aqquserngup aqqa taaguutaannaanani ataqatigiinnerup iluani
kissaatinut alloriarneruvoq pingaarutilik. Silavej silamut,
nunarsuarmut naleqartitanullu tunngassuteqarpoq, aamma inunnut
pinngortitamullu attaveqarnitsinnut tunngaviusumik tikkuussivoq.
-
Aarhusimi nutaamik atsiinikkut illoqarfiup inunnik tamanik
peqataaffigineqarsinnaanerulernissaanut alloriarneruvoq
pingaarutilik, kikkut tamarmik ataqqineqartutut naleqartutullu
misigisinnaaffigisassaat – qanoq tunuliaqutaqarneq
apeqqutaatinnagu, Marie Annelise Kahlig, Aarhusimi Kalaallit
Illuutaanni pisortaq oqarpoq.
