Kalaallit Nunaanni piffissamut killiliisoqanngitsoq: Umiarsuup takornariartaatip umiuneranit nalunaarut ukiut pingasut sinnerlugit utaqqineqartariaqarpoq

Umiarsuup takoriartaatip Ocean Explorerip nunatta kangiani 14. september 2023 Alpefjordimi ikkarlinneranit ukiut pingasungajaat qaangiuttut, Den Maritime Havarikommissioni suli pisumik misissuinerminik naammassinninngilaq.

Havarikommissionip siusinnerusukkut nalunaarutip 2025-mi saqqummiunneqarnissaa naatsorsuutigaa, taamatulli pisoqanngilaq. Nalunaarusiaq aamma ikkarlinnerup ukiut pingasunngorneranni piareersimanavianngilaq.

– Pissutsit maannakkutut isikkoqartillugit Havarikommissionip Ocean Explorerip Alpefjordimi ikkarlinneranit nalunaarusiaq ukiup nikinnerata missaanni piareersimassasoq ilimagineqarpoq, tamatumalu kingorna akuusunut tusarniaassutigineqassasoq, misissuinermi pisortaq Thomas Davidsen Sermitsiamut oqarpoq.

Ocean Exploreri Pinngortitaleriffiup umiarsuaanit ikiorneqarluni ikkarlummit kaanngartinneqarmat, inuit 206-it umiarsuarmi ilaapput.

Umiarsuup Ocean Explorerip immap naqqani marullummut ikkanninnera pillugu nalunaarusiaq suli piareerneqanngilaq

Ajutoornermi inunnik ajoqusertoqanngilaq. Pisulli sumiiffinni avinngarusimasuni umiarsuit takornariartaatit isumannaassusaat sammineqaqqilersippaa. Havarikommissionip qulaajaanera siunissami assingusumik ajutoortoqannginnissaanut iluaqutaasinnaanera neriuutigineqarpoq.

MELEMRUBRIK: Danmarkimi Kalaallillu Nunaanni malittarisassat assigiinngitsut.

Danmarkimi imaani ajutoornermi misissuisarnernut malittarisassat, Kalaallit Nunaanni taamatut atuutinngitsut Thomas Davidsenip ilisimatitsissutigaa.

Immikkoortumi EU-p peqqussutaa danskit inatsisaanni atortussanngortinneqartup, misissusussaatitaasut ajutoornermit qaammatit aqqaneq marluk iluanni sapinngisamik nalunaarusiaminnik tamanut takusassiarinnissasut aalajangersarpaa. “Ajutoornerit annertuut” assersuutigalugu toqumik kinguneqartut, umiunerit annertuumillu mingutsitsinerit misissorneqarnissaannut pisussaaffeqartoqarpoq.

– Inatsit alla Kalaallit Nunaannut atuuppoq, ilaatigut Kalaallit Nunaata EU-mut ilaasortaannginnera pissutigalugu, taamaammallu peqqussummut ilaanani, Thomas Davidsen oqarpoq.

MELLEMRUBRIK: Ajutoornerit annertunerit salliutinneqartartut

Kalaallit Nunaanni nalunaarut malillugu imaani ajutoornerit suut misissorneqassanersut, Havarikommissionip nammineerluni aalajangertarpaa. Nalunaarutinut killiliisoqarnanilu ajutoornerit aalajangersimasut misissorneqarnissaannut pisussaaffeqartoqanngilaq.

– Sapinngisamik ajutoornerit “annertoorujussuartut” taaneqartut misissorneqartarnerat, ukiorpassuarni Havarikommissionip ileqqoraa, assersuutigalugu toqumik kinguneqartut umiunerillu, misissuinermi pisortaq oqaluttuarpoq.

Den Maritime Havarikommissionili killilimmik isumalluuteqarmat, suliassat akulikitsumik pingaarnersiorneqartariaqartarput, taanna oqaluttuarpoq imalu nangilluni:

– Tamanna assersuutigalugu ajunaartoqarnertalinnik ajutoornermik misissuinerit ilaatigooriarluni ajutoornermit taamaallaat pigisat ajuserneqarfigisaanni inatsimmiluunniit erseqqissumik misissuinissamik pisussaaffeqarfigineqanngitsut tunulliunneqartariaqartarput, Thomas Davidsen oqarpoq.

Kalaallit Nunaanni ajutoornermik nalunaarut kingulleq raajarniummut Lomurimut, Sisimiut avataani umiusumut tunngavoq. Tassani umiuneq 2024-mi pivoq nalunaarusiarlu 2026-mi saqqummerluni.