Kangaatsiami eqqaavissuaq imaarneqalersoq

Kangaatsiami eqqaavissuaq eqqakkanik takusassaaleqiffiunngilaq. Eqqakkat arrortinneqarsinnaasut arrortikkuminaatsullu ikigisassaanngitsut takussaapput. Kangaatsiamili innuttaasunik eqqakkanik eqqaavissuarmiittunik qatsussisoqassappat, taava nuannaarutissaqartoqarsinnaavoq.

Kommune Qeqertalimmi kommunalbestyrelsip Kangaatsiami eqqaavissuup imaarneqarnissaa juunip aqqarngarni ataatsimiinnermini isumaqatigiissutigaat. Suliassap qanoq suliarineqarlunilu naammassineqarnissaa ataatsimiititaliami Inoqarfimmi siulittaasup pissanngatigaa.

- Eqqaavissuarmik imaarsiniarneq pilersaarusiorneqalerpoq. Suliap taassuma ilusinikkiartornissaa uatsinnut pissanganartorujuuvoq, Kristian Jeremiassenip (IA) Sermitsiamut oqarpoq.

Suliffeqarfik siunnersuinermik pilersaarusiornermillu suliaqartartoq, Inuplan A/S, kommunimut siunnersortaalluni eqqaavissuup imaarneqarnissaanut suliariumannittussarsiuussissaaq.

- Suliap nutaap aallartinnerani ilisimasalinnik suleqateqartariaqarpugut. Kommuniminngaanniit misilissimanngilarput eqqaavissuarmik imaarsineq, taamaammat suliakkiuteqarnikuuvugut, Kristian Jeremiassen oqarpoq.

Suliffeqarfiup Inuplan A/S-ip kommunimut sullissinera  137.500 koruuninik akeqassaaq.

ESANI assartuissasoq

Kalaallit Nunaanni eqqagassalerineq kommuninit tamakkiisumik akisussaaffigineqarpoq, tamannali sumiiffinni amerlaqisuni kommunit namminneq naammassiuminaatsittaqaat. Ilaatigut sulisussaqarniarneq tamatumunnga peqqutaaqataasarpoq.

Kangaatsiami eqqaavissuup suliassartai Kommune Qeqertalimmit akisussaaffigineqarput. Eqqaavissuulli imaarnissaanut kommuni kisimi suliaqarsinnaanngitsoq siulittaasoq nassueruteqarpoq. Taamaattumik Inuplan Kangaatsiami eqqaavissuarmik imaarsisussanik maanna suliariumannittussarsiuussissaaq.

Suliffeqarfik eqqaavissuup imaarneranik suliaqartussaq juulip naanerani nassaarineqariissasoq kiisalu Kangaatsiami eqqaavissuarmik imaarsineq aggutsip qiteqqunneranit novembarip naaneranut suliarineqassasoq pilersaarutaavoq. 

Eqqakkallu suliffeqarfiup suliariumannittussarsiuussinermi ajugaajumaartussap katersugai, kommunit eqqagassalerineq pillugu suliffeqarfiutaata, ESANI A/S-ip umiarsuaataanit aaneqarnissaat pilersaarutaavoq.

- ESANI-mut isumaqatigiissuteqarpugut eqqakkannik aallertassasoq, Kristian Jeremiassen oqarpoq.

Suliffeqarfik suliaqarumalluni akikinnerpaamik neqeroortoq suliassamik naammassinnittussaassasoq, qinikkat ataatsimiissutaanni allaqqavoq.