Politikeriunikoq, partiimik pilersitsisoq Naalakkersuisunullu ilaasortaanikoq Vittus Qujaukitsoq KNAPK-mi pisortaanertut soraarsitaavoq.
Aalisartut piniartullu kattuffiata KNAPK-p siulittaasua Pele Blytmann tusagassiuutitigut taama nalunaaruteqarpoq.
Politikeriunikoq, partiimik pilersitsisoq Naalakkersuisunullu ilaasortaanikoq Vittus Qujaukitsoq KNAPK-mi pisortaanertut soraarsitaavoq.
Aalisartut piniartullu kattuffiata KNAPK-p siulittaasua Pele Blytmann tusagassiuutitigut taama nalunaaruteqarpoq.
Ulluinnarni aqutsisut Niels Boassen pisortaagallartussatut toqqarpaat.
Taanna Kommuneqarfik Sermersuumi atorfimmeersuuvoq.
Vittus Qujaukitsoq KNAPK-mi 2022-mi februaari siunnersortitut atorfinitsinneqarpoq. Tamatuma kinguninngua pisortaaneq Bjarne ‘Ababsi’ Lyberth soraarsitaammat pisortaanerugallartunngortinneqarpoq.
Aningaasatigut ajornartorsiorneq
KNAPK-mi aningaasaqarnerup amigartooruteqarnerata ajornartorsiutaanera saqqummiunneqaqqammersoq Qujaukitsoq soraarsinneqarpoq. Aningaasarliorneq aqutsisunut kinguneqartinneqartariaqartoq immikkoortortaqarfiit arlallit piumasarinikuuaat.
Tamanna pillugu Vittus Qujaukitsoq Sermitsiamut qanittukkut ima oqarpoq:
- Kattuffiup siulersuisuuneri taakkuupput uanga pisortaanertut atorfeqarninnut naggataani aalajangiisussat. Uanga siunissara allamiissasoq aalajangertoqassagaluarpat soorunami inuunera ingerlaqqissaaq.
Siulittaasoq nutaaq millioninillu akileeqqusilluni eqqartuussivilersuineq iluatsinngitsoq
KNAPK-mi piffissami kingullermi annertuunik arlalinnik pisoqarpoq.
Kattuffiup ukioq manna ataatsimeersuarnerani siulittaasoq nutaaq qinerneqarpoq. Pele Blytmannip siulittaasoq Nikkulaat Jeremiassen unammilleramiuk ajorsartippaa.
Aammattaaq KNAPK eqqartuussivimmi oktobarimi ajorsarpoq, tassami Nunatsinni Eqqartuussiviup KNAPK-p kattuffinnut kapisilinnik illersuinianut marlunnut 9,5 millionit koruuninik akileeqqusinera itigartitsissutigaa.
