Kommune Kujallermi taxanik ingerlatsisinnaanermut akuersissummik tunineqartut nutaat 50-it
Illoqarfinni pingasuni taxanik ingerlatsisinnaanermut akuersissutit agguaanneqarput, taxanullu malittarisassat nutarterneqassallutik.
Assi: Leiff Josefsen
Kommune Kujalleq taxanik
50-inik nutaanik akuersissuteqarniarluni
aalajangerpoq. Tamanna kommunalbestyrelsip immikkut ittumik
tallimanngornermi marsip 20-ani ataatsimiinnerani
aalajangiunneqarpoq.
Innuttaasut amerlassusaat aallaavigalugu akuersissutit
aalajangersarneqarput, tassa innuttaasut 1.000-iutillugit qulit
akuersissuteqarsinnaapput. Qaqortumi 30-nik aamma Narsami
Nanortalimmilu qulinik akuersissuteqartoqarsinnaalluni.
- Akuersissutit tunniunneqarsinnaasut amerlassusaat massakkut aalajangiunneqartut amerlavallaarnersut ikippallaarnersulluunniit ukiukkaartumik nalilersorneqartassapput, massakkullu Qaqortup mittarfittaalernerani Qaqortumi taxat amerlisinnaanissaat pisariaqarmat manna taama amerlassusiliivugut, borgmester Malene Vahl Rasmussen kommunip
nittartagaani tusagassiuutitigut nalunaarummi oqarpoq.
Tamatuma saniatigut kommunip taxanik ingerlatsinermut
malittarisassat atuuttut, 2023-mi novembarimi atuutilersut,
nutarterniarpai.
Maleruagassat nutarterneqassasut
Kommuni naapertorlugu maleruagassat naammaginartumik
malinneqarsimanngillat, taamaammallu taxartartut suleqatigalugit
aaqqissuusseqittoqassaaq.
- Naluarput malittarisassat 2023-mi novembarimi atuutilersut
naammaginartumik malinneqarsimanngitsut. Taamaattumik allaffeqarfiit
taxanik ingerlatsisut qanimut suleqatigalugit
aaqqissuusseqqinniarlutik suliaqarput. Tamatuma saniatigut
ingerlatseqatigiiffiit ataatsimeeqatigisimavagut malittarisassat
pitsanngorsarniarlugit nutarterniarlugillu, tamannalu aasap
ingerlanerani pissasoq naatsorsuutigineqarpoq, kommunaldirektør
Randi Vestergaard Evaldsen nassuiaavoq nangillunilu:
- Malittarisassat novembarimi 2023-mi atuutilersimasut iluamik malinneqannginneri paasisimalerparput, maannalu taxartitisunik qanimut suleqateqarluta kommunimiit torersaanerit ingerlallutigit. Taakku saniatigut malittarisassat pitsanngorsarlugit nutarsaarusunneq siunertaralugu taxartitsisunik naapeqateqarsimalerpugut, malittarisassanillu nutarterinissarput aasap ingerlanerani pissasoq siunniullugu.
Kommunip Qaqortumi taxartartut tamanna pillugu allaffissornermik
politikkerinillu peqataaffigineqartumik marsip 26-ani
ataatsimiinnermi oqaloqatigai.
