Nunanut allanut politikkimut nunatta oqartussaassuseqarnerunissaa kissaatigaat

Kalaallit nunanut allanut tunngasutigut oqartussaassuseqarnerunissamik aamma Danmarkimit sinniisoqaratik nunanut allanut tunngasuni oqaluussinnaanerunissamik kissaateqarput.

Naaja Nathanielsen, IA-meersoq, DR-imut taama oqarpoq.

- Nunanik allanik ataatsimeeqateqarnermi tapersersorteqarnissaq pingaaruteqarpoq, taanna tusagassiorfimmut oqarpoq nangillunilu: 

- Nunatta politikkikkut ingerlatseqqinnissaminut pisariaqartitaminik "pissaaneqartinnissaa" matumani pineqarpoq.

Tunngaviusumik inatsit namminersornermullu inatsit naapertorlugit danskit naalakkersuisui naalagaaffeqatigiinneq sinnerlugu nunanut allanut tunngasunik akisussaaffeqarput.

Nunanut allanut tunngasuni oqartussaassuseqarnerulernissamik kissaat saqqummiunneqarpoq, Atlantikup avannaani Folketingimut ilaasortat naalakkersuisunngortitsinissamik isumaqatiginninniartoq Mette Frederiksen marlunngornermi naapinnissaa sioqqullugu. Taanna sapaatip-akunnerani kingullermi folketingimut qinersisoqareernerata kingorna danskit naalakkersuisuinik pilersitsiniarluni ataatsimeeqateqartaarpoq.

Naalakkersuisunngortitsinissamik isumaqatigiinniarnerit tallimanngormat aallartinneqarput.

Tassani Mette Frederiksenip ministeriunertut angerlarsimaffigisaani partiit arfineq-marluk ataatsimiipput.

Isumaqatiginninniarluni qaaqquneqartut tassaapput SF, Enhedslisten, De Radikale, Alternativet, Moderaterne, Venstre aamma De Konservative.

Naalakkersuisunngortitsiniarnermi isumaqatiginninniarnerit ministeriunerup najugaani Marienborgimi marlunngornermi pingasunngornermilu nanginneqassapput.

Ministeriunerugallartup Mette Frederiksenip aamma Atlantikup avannaaneersut, kalaallit marluk saniatigut Savalimmiormiut marluk, marlunngornermi ullaap tungaani ataatsimeeqatigissavai.

Tamatuma saniatigut Enhedslistenip TV 2-mut ilisimatitsissutigaa partii Mette Frederiksenimik marlunngornermi ataatsimeeqateqassasoq.

Partiip nalunaarutigaa tamanna Marienborgimi nalunaaqutaq 14.00 pissasoq.

USA-p præsidentiata Donald Trumpip nunatsinnik tiguaanissaanik sioorasaariuarneranut atatillugu kunngeqarfiup nunanut allanut politikkia Kalaallit Nunaannut immikkut attuumassuteqarpoq.

Nunanut allanut tunngasunut Naalakkersuisuusimasoq Vivian Motzfeldt USA-mik isumaqatiginninniarnermi peqataangaatsiarpoq.

Danmarkip nunanut allanut ministeria Lars Løkke Rasmussen (M) peqatigalugu januaarimi Washington D.C.-miippoq.

Tassani USA-p vicepræsidentia J.D. Vance aamma USA-p nunanut allanut ministeria Marco Rubio naapippaat.

Ataatsimiinneq Lars Løkke Rasmussen peqataatinngikkaluarlugu taamaalillunilu Danmark peqataatinneqarani ingerlanneqarsimasinnaagaluartoq pillugu, Naaja Nathanielsen oqaaseqartinneqanngilaq.

Qarsoq Høegh-Dam, N, aamma Folketingimut qinigaavoq.

Taassuma siusinnerusukkut oqaatigaa naatsorsuutigalugu Kalaallit Nunaata ataatsimut nipeqarluni qallunaat naalakkersuisussaannut, qanorluunniit isikkoqaraluarpata, piumasaqaatinillu ersarissunik saqqummiussissasoq.

/ritzau/