Kommune Qeqertalik millionilikkaanik atuivallaartoq
Kommunip ukioq manna ukiup sisamararterutaani siullermi aningaasanik atuinera missingersuutaasunit allaaneruvoq. Kommuni 18 millionit koruuninik aningaasanik atuinerulluni missingersuutiminik sippuivoq.
Kommune Qeqertaliup ukioq manna qaammatini siullerni isertitai aningaasartuutaanit ikinnerupput.
Assi: Kommune Qeqertalik
Kommune Qeqertalik ukioq manna qaammatini siullerni pingasuni aningaasaqarnikkut aqutsinermini unammillernartoqartitsingaatsiarpoq. Tamanna kommunalbestyrelsep juunip 11-ni ataatsimiissutissaanni allassimavoq.
Kommuni ukiup sisamararterutaani siullermi, 18 millionit koruuninik aningaasanik atuinerulluni missingersuutiminik sippuivoq.
- Piffissami pineqartumi atuivallaarnermi 18,1 mio. kr.-it pineqarput. Ukiup sinnerani taamatut atuinermut periuseq ingerlaannassappat, missingiut naapertorlugu ukiumut atuivallaarneq katillugu 72,2 mio. kr.-iussasoq naatsorsuutigineqarpoq, kommunimi atorfilittat qinikkanut allapput.
Sippuinerit agguataarnerat
Ingerlatsiviit arlallit aningaasanik atuivallaarsimasut naatsorsorneqarsimapput.
Ingerlatsivik Inuit 9,7 millionit koruuninik, Inoqarfik 5 millionit koruuninik Inualu 4,6 millionit koruuninik aningaasanik missingiussinermit atuinerupput. Timi Tarnilu allatorluinnaq inissisimasoq, missingersuutaasunit 1,3 millionit koruuninik atuinikinnerusimagami. Tamanna aningaasaqarnermut ataatsimiitaliap, INUA-p, ilaasortaanit maajip 28-ani tusaatissatut tiguneqarpoq. Piumasaqaateqarpulli.
- Maannamit aningaasanik atuineq taama ingerlaannassappat ukiup naaneranut aningaasanik annertuumik atuivallaarnissaq pinaveersaartinniarlugu iliuusissanik pilersaaruteqarnissaq piumasaraarput.
Isumaginninnermut, soorlu utoqqarnik passussinermut, avatangiisinut ingerlatsinermullu tunngasut atuivallaarnerni peqqutaanerpaasut ataatsimiissutissap nassuiaataani atuarneqarsinnaavoq.
Isertitat aningaasartuutinit ikinnerusut
Kommuni piffissami tassani, ukioq manna januaarip aallaqqaataanit marsip naaneranut katillugit 162,2 millionit koruuninik aningaasartuuteqarpoq. Isertitat taakkunannga ikinnerupput, 159,2 millionit koruuniugamik.
