Angut pineqaatissinneqarsimasunut
inissiisarfimmiittussanngorlugu pineqaatissinneqassanngitsoq, Nunatta
Eqqartuussisuuneqarfiata aalajangiiffigaa, naak kommunefogedimut
nakuusersimasutut eqqartuunneqarsimagaluartoq.
Nunatta
Eqqartuussisuuneqarfia suliaq pillugu marsip sisamaanni
aalajangiussivoq. Sermitsiaq eqqartuussivimmi najuutinngilaq,
eqqartuussisuuneqarfiullu aalajangiinera aatsaat kingusinnerusukkut
paasineqarluni.
Angut pineqaatissinneqarsimasunut
inissiisarfimmiittussanngorlugu pineqaatissinneqassanngitsoq, Nunatta
Eqqartuussisuuneqarfiata aalajangiiffigaa, naak kommunefogedimut
nakuusersimasutut eqqartuunneqarsimagaluartoq.
Nunatta
Eqqartuussisuuneqarfia suliaq pillugu marsip sisamaanni
aalajangiussivoq. Sermitsiaq eqqartuussivimmi najuutinngilaq,
eqqartuussisuuneqarfiullu aalajangiinera aatsaat kingusinnerusukkut
paasineqarluni.
Nakuuserneq
nunaqarfimmi 2020-mi juulip 17-ianni pivoq. Eqqartuussivimmi
nassuiaatigineqartutut angut pineqaatissinneqartoq aalisariarniarluni
aalajangersimavoq. Kommunefogedip tikkuarpaa, angut
aalakoorpallaarami umiatsiamik aallartariaqanngitsoq.
Angutip
pinerliisup kommunefogedi nuilaatigut tiguaa ilullialu sissorlugu.
Tamanna nakuuserneruvoq, naak kommunefogedi timimigut
ajoquserneqanngikkaluartoq.
Nakuuserfigineqartoq
pinerliisorlu imminnut ilisarisimalluarput. Eqqartuussisuuneqarfimmit
isumaqartoqarpoq, kommunefogedi atorfini naapertorlugu
iliuuseqarsimasoq, taannami inatsisinik unioqqutitsilluni umiatsiamik
angalaarniartoq unitsinniarlugu iliuuseqarsimammat.
Eqqartuussivik
suli isumaqarpoq kommunefogedi peqquserluttumik angallassisoqarnissaa
pinngitsoortinniarlugu akuliulluni oqartussaassutsini atorsimallugu.
Taamaalilluni
pinerluuteqartoq pinerluttulerinermi inatsit naapertorlugu pisortani
oqartussaasumik narrunarsaasimasutut pineqaatissinneqartussaavoq.
Tamannalu nalinginnaasumik kinguneqartarluni taama nakuusertut
pinerluuteqarsimasunut inissiisarfimmiittussanngortinneqartarlutik.
Matumanili taama pisoqanngilaq.
Najoqqutassiamut
naleqqutinngitsoq
Nunatta
Eqqartuussisuuneqarfia isumaqarpoq, 2020-mi pisup kingorna piffissaq
sivisooq qaangiussimammat, angutip ulluni 60-ini
pineqaatissinneqarsimasunut inissiisarfimmiittussanngortinneqarnera
allanngortinneqartariaqartoq. Suliassaq siullermeersumik 2025-mi
oktobarimi suliarineqarmat najukkami eqqartuussivik aamma taama
aalajangiussivoq.
Eqqartuussiviup
allagaataanni takuneqarsinnaasutut allakkat unnerluutiginnissutit
ukiut pingasut sinnerlugit qaangiuttut novembarimi 2023-mi najukkami
eqqartuussivimmut tunniunneqarput. Tamatuma kingorna ukiut
marlungajaat ingerlareersut najukkami eqqartuussivimmit
suliarineqarpoq, tassa Nunatta eqqartuussisuuneqarfianit
naammassillugu suliarineqarnnissaanut qaammatit arlallit
ingerlareersut.
Taamaalilluni
piffissap sivikitsup ingerlanerani Nunatta Eqqartuussisuuneqarfiani politiinut nakuusersimasumik pinerluuteqaqqittoqassappat
pineqaatissiisoqarnissaanik aappassaannik aalajangiisoqarpoq.
Nuummi
assingusumik pisoqarmat tassa arnap politiimut februaarimi
nakuusernera kiisisimaneralu aamma suliarineqarput. Aamma tamatumani
pineqaatissiineq sivikinnerulersinneqarpoq, suliap suliarineqarnerata
sivisuallaarnera pissutigalugu.
Kalaallit
Nunaanni Politiinit unnerluussisussaatitaasunillu Sermitsiap
oqaaseqartitsiniaraluarnera iluatsinngilaq. Siusinnerusukkut
ilisimatinneqarpugut oqartussat suliat ataasiakkaat aamma sooq taama
sivisutigisumik suliarineqartanerat itisiliiffigineq ajoraat.
Sermitsiap
pinerluffigineqartoq taassumalu inuunera eqqarsaatigalugit sumi
pinerluttoqarsimanersoq ilanngutinngilaa. Tassami nunaqarfimmik
taasaqartoqarpat kommunefogedip kinaanera paasinarsissammat.
