Kommunefogedit pillugit misissuisoqareersoq politiit pisortaat: – Tamanna pillugu ajuusaarutigeqaara

Kommunefogedit arlallit politiit aqutsisuisa peqataanerunissaat maqaasivaat, isornartorsiullu tamanna politimesterip Bjørn Tegner Bayip akuersaarlugulu akisussaaffittut tiguaa.

- Tamanna pillugu ajuusaarutigeqaara, oqarpoq.

Isornartorsiuineq kommunefogedit sulinerminni atugaannik misissuinermit, Ilisimatusarfiup Kalaallit Nunaanni Politiit isumaqatigiissuteqarfiginerisigut suliarisaanit, aallaaveqarpoq.

Kommunefogedit tassaapput inoqarfimmi innuttaasut sumiiffinni politiinik ulluinnarni najuuffigineqanngitsuni, politiit suliassaannik saniatigooralugu suliaqartartut.

Politiit pisortaata isornartorsiuineq akissuteqarfigerusuppaa:

– Isumaqarpunga nalunaarusiaq pitsaasoq, kommunefogedit sulinerminni misigisartagaat pillugit piviusorsiortumik takutitsisoq. Qularinngilara kommunefogedit ilinniagaqarnissamik amigaateqarneraraangamik eqqortumik oqartartut, Bjørn Tegner Bay oqarpoq.

Nalunaarusiami aamma ajunngitsunik allassimasoqarpoq. Kommunefogedinit 29-usunit apersorneqartunit 24-t isumaqarput Kalaallit Nunaanni Politiinit sulinerminnik tapersersorneqarlutik.

Taamaakkaluartoq kommunefogedinit 29-usunit 28-t pikkorissartinneqarnissamik ilinniagaqarnissamilluunniit amigaateqarsoripput.

Pingaaruteqarnerpaaq

Misissuinermik suliaqartut allapput maannakkut pissutsit, "imminut siulersornermut“ assingusut, innersuussutigaallu Kalaallit Nunaanni Politiit kommunefogedit siulersornerannik nukittorsaasoqassasoq.

Ilisimatuut naapertorlugit kommunefogedit politiinut ilaapput, taakkununngalu aqutsisussaatigaaginnaratik, aammali nakkutilliisussaatitaapput sulisullu avatangiisiinut akisussaallutik.

AAMMA ATUARUK

Misissuineq nutaaq: Kommunefogedinit aperineqartunit 29-nit 28-t pikkorissaanerit sungiusarnerillu amigaatigigaat

Misissuinermik suliaqartup Najaaraq Demant-Poortip Sermitsiamut septembarimi oqaatigaa, kommunefogedit ilaat sumiginnarneqartutut misigisimasut:

– Pisortarisat tungaannit tamanna sulinermi akuliutinngikkaangata nersualaarutitut eqqarsaataasinnaavoq. Tamannali kommunefogedit pisortaminnit tusagaqarneq ajoraangamik tamatigut nersualaarneqarnertut misigineq ajoraat, taanna oqaluttuarpoq, Najaaraq Demant-Poort oqarpoq.

Nalunaarusiami erseqqissarneqarpoq politiit immikkoortortaqarfiini arfiniliusuni marlunni qanimut suleqatigiinneq attaveqaqatigiilluarnerlu pisariaqartut. Sumiiffinnilu allani ilisimatuut tikkuarpaat kommunefogedit taakkualu suleqataat suleqatigiinnerulertariaqartut.

Isornartorsiuineq tamanna tunngavissaqarluartoq, politiit pisortaata nassuerutigiumavaa.

- Isumaqarpunga tamanna ilumoortoq, tamanna nalunaarusiami pingaarnerpaatut isigaara. Tamanna kommunefogedinik oqaloqateqartarnermi misigisannut naapertuuppoq – taakkua peqataanerunissarput maqaasivaat, Bjørn Tegner Bay oqarpoq.

Sulisut aalajangersimasut ataavartumillu attaveqaateqarneq

Taamaattumik politiit pisortaata kommunefogedit politiitut ilinniarsimasunik attaveqarnerulernissaat qulakkeerniarpaa. Tamanna ilaatigut aalajangersimasunik attaveqaasersuinikkut pissaaq.

Aammattaaq taassuma tikkuarpaa suleqatigiinnermi oqaatsit pingaaruteqassusai.

– Paasivarput sumiiffiit amerlasuut pitsaasumik ingerlasut tassaasut sumiiffiup kommunefogedii qallunaatut oqalussinnaasut imaluunniit politeeqarfimmi kalaallisut oqaasilinni amerlanerusumik sulisullit. Oqaatsilli kommunefogedip ajornartorsiutigisariaqanngilaat — uagut ajornartorsiutigaavut, Bjørn Tegner Bay erseqqissaavoq.

Taavami qanoq iliussavit?

– Attaveqaqatigiinnermik aalajangersimasumik siullermik pilersitsivugut. Sulisut aalajangersimasut, oqaatsit marluk atorlugit oqalussinnaasut pisariaqartumillu ilisimasallit ulluinnarni kommunefogedimut attaveqarneq isumagissavaat. Aammattaaq politiit tikisitat kommunefogedinik suleqateqarsinnaaqqullugit sapinngisatsinnik ilinniartinniartarpavut, politiit pisortaat nangippoq.

- Attaveqaqatigiinneq pitsaasoq ulluinnarni atorneqalerpat, angusaqarluarnerusinnaanissarput upperaara.

Angusat allaanerungaanngitsut

Politiilli pisortaata oqaatigiuminaatsippaa kommunefogedit misissuinermut akissuteqarneranniilli pissutsit allaanerulersimanersut.

– Tamakkiisumik isigissagaanni allanngortoqarsimanera neriorsuutigisinnaanngilara. Sumiiffiit ilaanni pisoqarpoq. Tasiilami najukkami suliniuteqarpugut, suleqatigiisitaliorpugullu tamakkiisumik isiginnittaaseqarnissamik suliaqartunik. Oqarsinnaanngilangali ullumikkut misissuisoqarpat, allaanerulluinnartumik inerneqarumaartoq, Bjørn Tegner Bay oqarpoq.

Bjørn Tegner Bayip nassuerutigaa ilinniartitaaneq aaqqiivigiuminaatsuusoq. Kommunefogdip allamik ulluinnarni suliaqartarnerata, aaqqissuussinissamut ajornakusoornerulersitsisoq, politimesteri oqarpoq.

– Kommunefogedit aamma innuttaasunut sullissisariaqarnerat eqqarsaatigalugu, sammisat tamaasa ilinniartitsissutiginissaanut aaqqissuussinissaq ajornakusoorpoq. Tamassuma aaqqiissutissartaanik suli nassaanngilagut.

Oqaloqatigiinneq iluaqutaavoq

Misissuinerup aamma ersersippaa ajornartorsiutit allat aaqqinneqarsinnaasut. Kommunefogedit anaatanik, serparsaatinillu qasilittunik allarpassuarnillu atortulersorneqartariaqarput, taamaattorli piffissaq eqqorlugu, atortussaminnik tamarmik pissarsineq ajorput.

Atortussanut tunngatillugu arlaatigut ajortoqartoq, politiit pisortaata nassuerutigaa.

– Tassani suut ajornartorsiutaanersut maannakkut misissuleruttorpavut. Kommunefogedip atortussaannut tunngatillugu aalajangersimalluinnartumik periuseqartoqarpoq – soorunami taakku ajunngitsumik inissinneqassapput. Uagut kommunefogedillu akornanni suleqatigiinnermi ilaannikkut unamminartoqarpoq. Aaqqissuussineq Maanna aaqqissuutileruttorparput, atortut pisariaqanngitsumik utaqqineqaqqunagit, Bjørn Tegner Bay oqarpoq.

Bjørn Tegner Bayli sukkasuumik siuariartortoqarnissaa neriorsuutiginngilaa, aamma aningaasat pisariaqartinneqarput, politimesteri oqarpoq.

– Nunaqarfimmi ajortorujussuarmik pisoqareeraangat kommunefogedi kaffisoqatigisinnaanerujumallugu piffissaqarnerorusuppunga. Piffissamili pisut annertuut pissutigalugit nukivut atortariaqaraangatsigik, ajoraluartumik tamakkua amerlanertigut akisusarput, Bjørn Tegner Bay oqarpoq.