Kommuneqarfik Sermersooq annertusaavoq najukkami pisortanik

Kommuneqarfik Sermersooq siammarterinermi ingerlanneqartumi alloriaateqaqqippoq, kommuni nittartakkamigut nutaarsiassaleriffimmini taamak allappoq.

Maanna kommunimit najukkami pisortat pingasut nutaat toqqarneqarput, taakku isorliunerusortatsinni siuttuussapput najukkamilu peqataanermik pitsanngorsaassallutik.

• Hjørdis Viberg Tasiilami nunap immikkoortuani pisortanngorpoq, illoqarfimmut nunaqarfiinullu akisussaasuussalluni. 
• Heidi Jeremiassen Paamiuni nunap immikkoortuani pisortatut toqqarneqarpoq, illoqarfimmi nunaqarfimmilu sulinermik aqutsisuussalluni. 
• Charlotte Pike Ittoqqortoormiini illoqarfimmi pisortanngorpoq.

Kommune ilisimatitsivoq pisortat nutaat pingasuusut kommunip aqutsisoqatigiivini qullersanut ilanngutissasut massakkumiillu pisortaqatigiit ataatsimiinneranni peqataasassallutik.

– Najukkami pisortanik toqqaanermi siammarterinitsinni pingaarutilimmik alloriaateqaqqippugut. Najukkami aqutsinerup nukittunerulernissaa pineqarpoq, matumani aalajangiinerit pineqartunut qaninnerusumik aalajangerneqartarniassammata aamma innuttaasut kommunip qanilaartuneranik tusarnaartuuneranillu misiginiassammata, borgmesteri Avaaraq Olsen oqarpoq nangillunilu:

Isorliunerusut tamarmik aqutsisoqatigiinnut toqqaannartumik attaveqarsinnaasutut aamma pisariaqartitaat siunnersuutaallu pimoorunneqartutut misiginissaat kissaatigaarput. Tamanna tatiginninnermik, peqataatitsinermik kommunimilu assigiinngitsuni suleqatigiinnermik pitsaanerulersitsineruvoq.

Kommuni ersarinnerusoq, qaninnerusoq najukkamiinnerusorlu

Siammarterineq immaqa massakkut annikitsuinnarmik misigineqarsinnaavoq kisianni najukkami pisortanik toqqaaneq kommunip ersarinnerusumik, qaninnerusumik najukkamiinnerusumillu ingerlanneqalerneranut aallarniutaavoq.

Charlotte Pikep oqaatigaa, siammarterineq innuttaasut aalajangiisartullu akornanni qaninnerusumik attaveqalersitsinermut tunngassuteqartoq:

- Siammarterineq nuannaarutigeqaara, pissutigalugu kommunimit najukkamiittuusugut tatigineqarnitsinnik takutitsinerummat. Sumiiffitsinnut ilusilersuisuusunik aalajangiinerni ilaatinneqartarpugut peqataatinneqarlutalu – tamanna allannguuterujussuuvoq. Maani Ittoqqortoormiini innuttaasunut qaninnerulernerput aamma suleqatigiinnerup nukittunerulernera malugisinnaalereerparput, Charlotte Pike oqarpoq.

Siammarterinermik atuutsitsilerneq ingerlaavartumik ingerlaqqissaaq najukkamilu ingerlatsinerup pitsaaneruleriartornera ilutigalugu innuttaasut allannguutinik aalajangersimasuik misigisaqartassapput.