Kommuni inissianut inoqanngitsunut nuunniartoq
Kommunalbestyrelsip Aasianni Svendborgtårnit kommunip allaffiattut utaqqiisaasumik ukiuni tallimani atorneqarnissaat akueraa.
Kommunip inissiaataasa quleriit ilaat attartorneqanngitsut allaffeqarfittut atorneqarsinnaanersut eqqarsaatigineqartoq Kommune Qeqertalik Sermitsiamut ilisimatitsivoq. Illorsuaq quleriinnik inissialik aappalaartoq Namminersorlutik Oqartussanit attartortitakkatut inissiaavoq. Illorsuup aappaluttup saniani Kommune Qeqertaliup inissiaatileqatigiiffik aqqutigalugu pigisaanik allanik marlunnik illorsuaqarpoq.
Toqqorsivimmit assi: Inissianik sanaartortitsisut, Kommune Qeqertalik aamma Namminersorlutik Oqartussat
Ilaatigut ineqarnermut akiliutit aalajangersarneqarnerat pillugu nalornissuteqarneq pissutigalugu Kommune Qeqertallip Aasianni inissiat sanaartorneqaqqammersut 40-t missaanniittut Svendborgip Aqqutaaniittut ilarpassui piffissami sivisuumi attartortissinnaasimanngilai.
Maannali inissiat nutaat qanoq atorneqarsinnaanerat paasisimavaat — tassa kommunip allaffiisut.
“Svendborgtårnene” ukiuni tallimani Kommune Qeqertalimmi aamma Aasianni Sullissivimmi allaffittut atugassatut piffissami killilimmi atorneqarsinnaanerat Kommunalbestyrelsip marsip 19-ani ataatsimiinnermini akueraa.
Kommunip allaffii oqoqartut
Sooq taama alloriartoqarnersoq Sermitsiap kommuni aperaa. Aasianni kommunip allaffia oqoqarmat sulisut illumit nuunneqarallaartariaqarsimasut Kommunip allakkatigut akissuteqarnermini oqaatigaa.
Sulisut maanna Aasianni sumiiffinni allani sulisartut, aamma sulisut ilaat angerlarsimaffimminni sulisartut kommunimit ilisimatitsissutigineqarpoq.
“Aaqqiissutissatut utaqqiisaasumik aaqqiissutaasinnaasutut kommunip illutaasa ilaat, maanna attartorneqanngitsut, allaffeqarfittut atorneqarsinnaanersut eqqarsaatigineqarsimavoq,” kommuni Sermitsiamut allappoq.
Inaarutaasumik kingusinnerusukkut aatsaat aalajangiisoqassasoq
Atuinermut nutaamut tunngatillugu inaarutaasumik aalajangiisoqarnissaa siunertaralugu siunnersuut maajimi aningaasaqarnermut ataatsimiititaliamut saqqummiunneqassasoq kommunip naatsorsuutigaa. Inaarutaasumik aalajangiinertaaq kommunalbestyrelsimit akuerineqaqqaassaaq.
Sulisut pissutsit iluarsineqareerpata utersinnaaniassammata oquiaasoqarnissaa pilersaarusiortoqarnissaalu siunertaralugu kommunip allaffia oqoqartoq pillugu kommunip misissortinniarlugu sulissutigilerpaa, Kommune Qeqertalik ilisimatitsivoq.
