Kommuni pisortaasimasumik pisortaagallartunngortitsisoq

Avannaata Kommuniani kina aningaasaqarnermut inuussutissarsiornermullu pisortaagallassanersoq, aningaasaqarnermut ataatsimiititaliap, borgmesterimit, Lars Erik Gabrielsenimit (S), siuttuuffigineqartup, aalajangeqqammerpaa.

Karl Kristian Kristoffersen juulip 21-at aallarnerfigalugu kommunimi pisortaqatigiinnut ilanngukkallarpoq. Avannaata Kommunia nittartakkamini allappoq.

AAMMA ATUARUK:

Avannaata Kommuniani pisortaq soraartoq

- Karl Kristian Kristoffersen siusinnerusukkut kommunimi aningaasaqarnermut suliassaqarfimmi sulereersimavoq, pisortallu aningaasaataannik aqutsinermut kommunillu aaqqissuussaanerannut ilisimasaqarluarluni. Tamanna piffissami aggersumi suliassamik isumaginninnissaanut pitsaasumik tunngavissiivoq, kommuni allappoq.

Karl Kristian Kristoffersen Avannata Kommuniani siusinnerusukkut aamma atorfeqareerpoq. Aningaasaqarnermut inuussutissarsiornermullu maanna pisortaajunnaartup, Dorthe L. Mathiesenip, 2023-imi aasakkut pisortanngornissaa sioqqullugu Karl Kristian Kristoffersen kommunimi qaammatini arlalialunni aningaasaqarnermut pisortaavoq.

Qinnuteqartitsissasut

Karl Kristian Kristoffersenip pisortaagallarnera ukiap tungaanut atuutissaaq. Aningaasaqarnermummi ataatsimiititaliaq aalajangerpoq atorfik inuttassarsiorneqassasoq, qinnuteqarfissarlu oktobarip aallaqqaataannut killeqassasoq. Taassuma kingorna atorfinititsinissaq pilersaarutaavoq.

Dorthe Løvstrøm Mathiesen Avannaata Kommuniani soraarniuteqartoq Sermitsiap juulip qulingani allaaseraa. Taassuma kingorna Qeqqata Kommunia nalunaarpoq Dorthe Løvstrøm Mathiesen aningaasaqarnermut ilinniartitaanermullu aggustip aallaqqaataanit pisortatut atorfinitsinneqartoq.