Avannaata Kommuniani pisortaq soraartoq

Avannaata Kommuniani pisortat tallimaasut maanna ilanngarallartussanngorput. Aningaasaqarnermut inuussutissarsiornermullu pisortaq, Dorthe Løvstrøm Mathiassen, pisortatut suliunnaalerpoq. Tamanna Avannaata Kommuniani pisortaanerup Nick Nielsenip Sermitsiamut uppernarsarpaa. 

- Aningaasaqarnermut inuussutissarsiornermullu pisortaq, Dorthe Løvstrøm Mathiassen, Avannaata Kommuniani atorfimminit soraarniuteqarpoq, 2026-imi juulip 31-ni suliunnaassaaq, Nick Nielsen allappoq.

Dorthe Løvstrøm Mathiassen kommunimi maanna qimalikkamini misilittagarpassuaqarpoq. Qaasuitsup Kommunerisimasaani allattoqarfimmi pisortatut aamma siusinnerusukkut atorfeqarpoq.

Aningaasaqarnermut inuussutissarsiornermullu pisortap aalajangernera pisortaanerup uggorigaluarlugu ataqqivaa.

- Soorunami uggornartuuvoq Dorthe soraarniuteqarmat, kisiannili aalajangigaa ataqqivarput, nutaanik unammilligassaqarnissaminik ujarlersimanera pissutigalugu, siunissamilu ajunnginnerpaamik kissaapparput, Nick Nielsen allappoq.

Aningaasaqarnermut ataatsimiititaliaq ullumi ataatsimiissasoq

Dorthe Løvstrøm Mathiassen unippat akisussaaffii kimit akisussaaffigineqarallassanersut aningaasaqarnermut ataatsimiititaliap tallimanngornermi ataatsimiinnermini aalajangissagaa, Nick Nielsen aamma ilisimatitsivoq.

- Aningaasaqarnermut Ataatsimiititaliaq tassaavoq kommunip pisortartaasa atorfinitsinneqartarnerannut piginnaatitaasoq. Taamaattumik Aningaasaqarnermut Ataatsimiititaliaq ullumi tallimanngornermi immikkut ittumik ataatsimiissaaq, aalajangiiffiginiarlugu kina Aningaasarsiornermut Inuussutissarsiornermullu pisortatut inissikkallarneqassanersoq, pisortassap nutaap atorfinitsinneqarnissaata tungaanut, Nick Nielsen allappoq.