KL

DK

Kommuni ukioq atuarfiusup aallartinnginnerani ilinniartitsisut inissaannik amigaateqartoq

Ilinniartitsisunik pisariaqartitsineq pillugu misissueqqissaarnerup nutaap takutippaa ilinniartitsisunik amerlanerusunik pisariaqartitsisoqartoq, aamma Nuummi ilinniartitsisutut atorfinitsinneqartut ilaannut inissaqarniarneq suli ajornartorsiutigineqartoq.

Atuartut amerliartorput, Kommuneqarfik Sermersuumi ilinniartitsisut pisariaqartinneqarput. Ilinniartitsisulli atorfissaqartinneqartut inissannik pisariaqartitsipput.
KASSAALUK KRISTENSEN Digitalimik aaqqissuisoq
Saqqummersinneqarpoq

Ukioq atuarfiusoq 2026/2027 qaammat ataaseq qaangiutinngitsoq aallartissaaq. Kommuneqarfik Sermersuumi ukiumi atuarfiusumi nutaami klassinik 154-inik pilersitsisoqarnissaa naatsorsuutigineqarpoq, taakkunannga 40-t immikkut ittumik atuartitsiviussapput.

Atuarfik 154-inik klasseqassaaq, ukiup atuarfiusup naaneranit klassinik pingasunik amerlanerusunik.

Atuarfeqarnermi ilinniartitsisunik amerlanerusunik pisariaqartitsisoqassasoq, ukiumut atuarfiusumut 2026/2027-mut ilinniartitsisunik pisariaqartitsineq pillugu misissueqqissaarnerup tamanna takutippaa. Tamatuma saniatigut Meeqqanut Atuarfeqarnermullu Ingerlatsivimmit allakkiami, Nuummi ilinniartitsisut inissaqartinniarneri suli ajornartorsiutaasoq atuarneqarsinnaavoq. Ilinniartitsisunik pisariaqartitsinermik misissuineq kommunalbestyrelsip juunip 17-ani ataatsimiinnerani saqqummiunneqarpoq.

Misissueqqissaarnerup takutippaa ukiumi atuarfiusumi aggersumi illoqarfinni nunaqarfinnilu atuarfinni 16-ini atuartut 2.882-it atuariartornissaat naatsorsuutigineqartoq, tassa siornarnit 126-nik amerlanerusut.

Misissueqqissaarneq aallaavigalugu ilinniartitsisunik tallimanik amerlanerusunik atorfinitsitsinissamut aningaasaliisoqartariaqartoq, ingerlatsivik naliliivoq.

Ilinniartitsisut inissaannik amigaateqarneq

Maanna Nuummi ilinniartitsisut 30-it amigaatigineqarnerat, taakkununngalu ilanngullugit ilinniartitsisut atorfii tallimat 2026-mi juunip qulingiluaani AIA-p ataatsimiinnerani akuerineqartut, Meeqqanut Atuarfeqarnermullu Ingerlatsivimmit allakkiami aamma atuarneqarsinnaavoq,.

Ilinniartitsisunut inissiat 25-t pilersinneqarput septembarillu aallaqqaataani 2026-mi iserterfigineqarsinnaalissapput. Taamaakkaluartoq utaqqisut allattorsimaffianni ilinniartitsisut tallimat inissaqartinneqanngitsut naatsorsuutigineqarpoq, tamanna allakkiami kommunalbestyrelsip ataatsimiinnerani saqqummiunneqartumi atuarneqarsinnaavoq.

Allakkiaq naapertorlugu ilinniartitsisut nammineerlutik inissarsiussanngippata, ilinniartitsisullu inissamik pisariaqartitsinerat matussuserneqassappat, ilinniartitsisunut inissiat tllimat pilersinneqartariaqarput.

atuarfeqarneq ilinniartitsisut ilinniartitsisunut inissiat nuuk inuiaqatigiit kommuneqarfik sermersooq

Atorfiit tamaasa takukkit

PODCASTI

Powered by Labrador CMS