Kommunip naatsorsuutaasa suliarineqarnissaat kinguaattooqqittoq

Avannaata Kommuniata 2025-mut naatsorsuutaasa qinikkanit suliarineqarnissaat kinguaattooqqippoq. Tamanna kommunalbestyrelsip tallimanngornermi aggustip 28-ani ataatsimiissutissaani, qinikkanut ilisimatitsissutini allaqqavoq.

- Siusinnerusukkut ilisimatitsissutigineqareersoq naatsorsuutit ukiumoortut 2025 aggustimi politikkikkut suliarineqarnissaat naatsorsuutigineqartoq. Sulialli suli naammassineqanngillat, naatsorsuutinik naligiissaarinerit kiisalu kukkunersiuisunik ingerlaavartumik suleqatigiinneq suli ingerlammata, ingerlatsivik qinikkanut allappoq.

AAMMA ATUARUK:

Avannaata Kommuniata naatsorsuutai kinguaattoortut

Qinikkat kommunip naatsorsuutaanik suliaqarnissaat aatsaat kinguaattoorfiunngilaq. Naatsorsuutit siornamoortut, kommunalbestyrelsip aasaq manna juunip 26-ani ataatsimiinnermini, pilersaarutaasut malillugit suliarisussaanikuugaluarpaat. Suliaqarnissarli aggustip naaneranut kinguartinneqartoq taamanikkut ilisimatitsissutaavoq. 

Sermitsiap paasissutissaatai juunimeersut naapertorlugit naatsorsuutit naammassineqarnissaannut kukkunersiuisut nalunaarutaat kisimi amigaataanikuuvoq, tassa kommunip atorfilittaasa suliaqarnerat piareereerluni. Maannali kommunip atorfilittai suli naatsorsuutini suliassaqarlutillu suliaqartut nalunaarutaavoq.

- Ingerlatsiviup naatsorsuutit ukiumoortut kukkunersiuinerlu naammassiniarlugit sulinerup ingerlaannarnissaa sulissutigaa, ilisimatitsissutini allaqqavoq.

Ulluliussaq nutaaq

Inatsisartut missingersuusiortarneq naatsorsuutillu pillugit inatsisaat naapertorlugu kommunit naatsorsuutitik septembarip 15-at nallertinnagu suliarisussaavaat. Tamannalu naammassisinnaanngikkunikku aningaasaqarnermut ataatsimiititaliap siulittaasua, tassa borgmesteri, Naalakkersuisunut kingusinnerpaamik aggutsip 15-ani piffissaagallartillugu naammassisinnaannginnerminnik nalunaaruteqassaq. Borgmesterilu Lars Erik Gabrielsen (S), taama iliorsimavoq.

- Kommuni kommunalbestyrelsip akuersissuteqarneranut killissarititap kinguartinneqarnissaanik qinnuteqarsimavoq akuersissutigineqarlunilu.

- Killissarititaq nutaaq ulloq 15. november 2026-mut aalajangersarneqarpoq, kommuni allappoq.

Naatsorsuutilli ulloq suna suliarineqarnissaat maanna naatsorsuutaalernersoq ilisimatitsinermi paasissutissiissutigineqanngilaq.

Sermitsiap naatsorsuutit kinguaattoornerat pillugu Avannaata Kommunia paasissutissanik noqqaaffigaa. Taakkua killiffimmik kingusinnerusukkut nassiussiumaarlutik neriorsuuteqarput. Allaaserisalli suliarineqarnerani killiffik pillugu ilisimatitsisoqanngilaq. 

Kommunimi qinikkat 2024-imi 2025-mut missingersuutit akuerigamikkit 2025-imi 56 millionit koruuninik sinneqartoornissartik missingersuutigaat. Naatsorsuutilli qanoq inerneqarumaarnerat suli paasinarsinngilaq.