Avannaata Kommuniata naatsorsuutai kinguaattoortut

Nunatsinni kommunit avannarlersaata, Avannaata Kommuniata, 2025-imut naatsorsuutini nammineq piffissaliuussani eqqorlugu saqqummiussinnaanngilai. Tamanna ingerlatsiviup qinikkanut juunip 26-ani ileqquusumik ataatsimiinnermi ilisimatitsissutigaa.

- Pilersaarutit malillugit naatsorsuutit ukiumoortut 2025-mut junimi Kommunalbestyrelsimut qaqinneqarlutik naammassineqartussaagaluarput.

- Naammassineqarnissaali kinguaattoorpoq, suli aaqqitassaqarmat, ingerlatsivik ilisimatitsissummini allappoq.

Naatsorsuutini suut aaqqitassaanersut ilisimatitsinermini itisilerneqanngilaq.

Sermitsiap paasisai naapertorlugit kukkunersiuisut nalunaarutaat amigaataavoq.

Ataatsimiinnerup tullianut kinguartut

Avannaata Kommuniata naatsorsuutini kinguaattoortut, kommunalbestyrelsip ileqquusumik tulliani ataatsimiinnissaani, tassa aggutsip naalernerani, suliarineqarnissaat naatsorsuutigaa.

- Naatsorsuutigineqarpoq aggustimi ileqquusumik ataatsimiineq ingerlalerpat naammassineqarlutik ingerlateqqinneqassasut, kukkunersiuisut nalunaarutaat ilanngullugu, ingerlatsivik allappoq.

Kommunimi qinikkat 2024-imi 2025-mut missingersuutit akuerigamikkit 2025-imi 56 millionit koruuninik sinneqartoornissartik missingersuutigaat.

Inatsisartut missingersuusiortarneq naatsorsuutillu pillugit inatsisaat naapertorlugu kommunit naatsorsuutitik septembarip 15-at nallertinnagu akuerisussaavaat. Tamannalu naammassisinnaanngikkunikku aningaasaqarnermut ataatsimiititaliap siulittaasua, tassa borgmesteri, Naalakkersuisunut kingusinnerpaamik aggutsip 15-ani nalunaaruteqassaq.