KL

DK

Kujataani illoqarfimmi saaluallaat siaruaattut

Kommune Kujallermi innuttaasut tamarmik saaluallaat siaruattaaliorneqarnissaannik qinnuigineqarput. Tamatuma malitsigisaanik ajornartorsiutip anigornissaanut pitsaasunik siunnersuuteqarput.

Angerlarsimaffimmi eqqiluisaannginneq pissutigalugu saaluallaqalerneq ajorpoq. Angerlarsimaffiit tamarmik atisatigut, nammattakkatigut, pisattanit inunnillu pigineqartut allat aqqutigalugit siammarsinnaapput.
Hanna Hviid Hanna Hviid Tusagassiortoq
Saqqummersinneqarpoq

Nanortalimmi saaluallaat annertuumik siammarsimaneri paasineqarpoq. Inuinnaat angerlarsimaffianni, suliffeqarfinni illoqarfimmilu illunilu allani ajornartorsiut piuvoq.

Taama Kommune Kujalleq nittartakkamini allappoq.

Aammattaaq kommunip iluani, Kalaallit Nunaatalu ilaanut saaluallaat siaruaassinnaanerat aarlerisaarutigineqarpoq.

Taamaattumik innuttaasut tamarmik kajumissaarneqarput siaruaattoqannginnissaanik pinaveersaartitsinermi ikiuuteqqullugit.

ALLAT ILLERSORNIARLUGIT IKIUIGIT

Saaluallaqalersimaguit imaluunniit saaluallaqalersimanissaanik pasitsaassaqaruit ima iliussaatit:

o Ilaquttatit, ikinngutitillu sanilitillu pulaarneqassanngillat.

o Pulaartoqarnaveersaarit

o Allat angerlarsimaffianni unnuineq ingalassimajuk.

o Illoqarfinnut nunaqarfinnullu allanut pisariaqanngitsumik angalanaveersaarit.

o Timersornermi aaqqissuussanut, aaqqissuussanut, pikkorissarnernut siammarterinissanut periarfissalinnut peqataanaveersaarit.

o Atisat, kamippaat, nammattakkat, kuffertinillu immikkut maluginiakkit

o Pequtit atornikut aqqutigalugit saaluallaat siaruaattarput.

o Pequtit atornikut allanit pisiarisat mianersuutigikkit.

o Pequtit atornikut eqqunneqannginnerani sukumiisumik misissorneqaqqaassapput.

o Pequtit saaluallaqarnerannik nalunaarsorneqartinnagit eqqarneqassanngillat.

Nalaasaarfik, siniffilluunniit ataaseq siaruaatsitsilernissamut aallarniutaasinnaapput.

Najoqqutaq: Kommune Kujalleq.

- Saaluallaat eqqiluisaartuunerit minguttuunerilluunniit soqutigineq ajorpaat. Angerlarsimaffinni tamani siaruaassinnaapput atisat, puussiat, kuffertit, pequtit pigisatillu allat aqqutigalugit siaruaassinnaapput.

- Siaruaanneq siusinnerusukkut paasineqarpat iliuuseqarfigineqarlunilu siaruaannerup unitsinnissaa ajornannginnerulissaaq, Kommune Kujalleq allappoq.

Angerlarsimaffimmi saaluallaqalersimappat, meeqqerivinnut, atuarfinnut, suliffeqarfinnut allanullu ataatsimoorfiusunut siaruaattoqalinnginnissaa anguniarlugu piaarnerpaamik tamanna iliuuseqarfigineqartariaqarpoq.

Saaluallanik nassaarnermi qanoq iliortoqassava?

Saaluallaat pillugit qanoq isumagineqarnissaannik Kommune Kujalleq arfinilinnik siunnersuuteqarpoq.

1. Ingerlaannaq iliuuseqarit. Ajornartorsiut piaarnerpaamik iliuuseqarfigineqarpat, siaruaannissaannut periarfissaq annikinnerussaaq.

2. Allanik attaveqarnerit killilersimaaruk. Ajornartorsiutip aaqqinnissaata tungaanut allanut pulaarnaveersaarit, kateriffiusunullu peqataanaveersaarit.

3. Angalaneq ingalassimajuk: Timersornermi aaqqissuussanut, aaqqissuussanut, pikkorissarnernut siammarterinissanut periarfissalinnut peqataanaveersaarit.

4. Pequtit pigisatilluunniit nutserneqassanngillat: Madrassit, siniffiit, sofat, atisat allalluunniit angerlarsimaffinnut allanut nutserneqassanngillat.

5. Attartortitseqatigiiffik attartorfigisat ajornartorsiut pillugu attavigiuk. INI-p inissiaataani najugaqaruit INI-p oqarasuaataanut 70 10 00 saaffiginnigit.

6. Ilitsersuutit maleruartakkit: Eqqiaaneq, errorsisarneq mingutsitsinermullu akiuiniarneq pillugit ilitsersuutit maleruaqqissaakkit.

- Saaluallaat inuit pisatallu malittaralugit ingerlasarput. Taamaattumik tamatta piaartumik iliuuseqarnissarput akisussaaffigisariaqarparput, maleruagassallu pingaarutillit malittariaqarlutigit.

- Akisussaassuseqarluta iliuuseqarnitsigut ilaquttavut, sanilitta suliffittalu Kalaallit Nunaatalu sinnerata avatangiisii illersorsinnaavavut, Kommune Kujalleq allappoq.

Nanortallip Atuarfia saaluallaqalersimanera pissutigalugu 2025-mi decembarimi matugallarneqarpoq.

kommune kujalleq nanortallip atuarfia inuiaqatigiit kalaallit nunaat saaluallaat nanortalik

Atorfiit tamaasa takukkit

PODCASTI

Powered by Labrador CMS