Kujataani atuarfik saaluallaqarmat matuneqartoq
Nanortallip Atuarfiani saaluallaqarpallaarnera pissutigalugu atuarfik ukiortaap tungaanut matoqqassasoq, pisortat aalajangerput.
Nanortalimmi atuarfik saaluallaqarpallaarnera pissutaalluni juullinngitsiartoq matuneqarpoq.
Assi: Kommune Kujalleq
Nanortallip Atuarfia juullimi atuanngiffeqarnissap tungaanut matuneqarpoq.
Tamanna Nanortallip Atuarfiata angajoqqaanut allagaani Facebookimi quppernermini saqqummersinneqartumi atuarneqarsinnaavoq.
Atuarfiup saaluallaqarnera ajornartorsiutaammat matuneqarpoq. Atuarfimmiilli amerlisimannginnerat erseqqissaatigineqarpoq. Atuarfik ukioq manna siusinnerusukkut oqummik aamma ajornartorsiuteqarpoq, januarimilu matuneqartoq, KNR-ip allaaseraa. Aasaanerani atuanngiffeqarnerup kingorna ammaqqippoq.
Sumiiffiit tamanit atorneqartartut unnuiffiuneq ajoramik saaluallaqarujussualernissaa ilimanaateqarpiarneq ajortoq, ilisimasallit maanna pisumi atuarfiup pisortaanut nassuiaapput. Saaluallaat inunnik sinittunik kiisisaramik.
Saaluallaalli inuit ataatsimoorfiini siaruaassinnaanerisa aarlerinaataat annertusinnaavoq. Atisaniissinnaasarput taskini assigisaanilu, inuillu attuukkaangata siaruarsinnaasarlutik.
- Pingaaruteqarnerpaaq tassaavoq siaruaannerat annikitsut sumiissuserseriarlugit akiornissaa, atuarfimmi siaruaaterujussuarnissaa ilimanaateqarpiannginnami, Nanortallip Atuarfia allappoq.
Ammaqqinnissaanut piareersarneq
Taamaattumik iliuuseqapallallutik juullimi atuanngiffeqarnissap tungaanut atuarfik matuneqarpoq.
- Atuartut ilinniartitsisullu toqqissisimanissaat anguniarlugu aamma saaluallaat siaruaannaveersaartinniarlugit aalajangertoqarpoq.
Atuarfiup matoqqanerata nalaani atuartut ilinniartitsisullu atisatik, taskitik assigisaallu qanoq iliornissaannut ersarissumik ilitsersuisoqarpoq. Pisariaqalissagaluarpat angerlarsimaffimmi suliassanik piareersaasoqassaaq. Saaluallaat akiorniarlugit akiuussutissanik aalamillu saliutinik piniartoqarpoq.
- Saaluallaat peqqissutsimik akornutaasuunnginnerat erseqqissaassutigissavarput, atuarfimmiit allapput.
Atuarfiup meeqqat juullimi atuanngiffeqareernerisa kingorna januaarip tallimaani ammaqqinnissaa naatsorsuutigineqarpoq. Klubbeeraq pisarnertut ullaakkut ammartassaaq.
