Margrethe Thårup Andersen: Suila-tapisisoqarsimatillugu suliartunngitsoortorpassuusarput

Margrethe Thårup Andersen Inatsisartunut ilaasortaagami innuttaasunik naapitaqartarnermi saniatigut suliffeqarfinnut assigiinngitsunut paasisassarsiorluni pulaakulasarpoq.

Taakkunani Suila-tapit pillugit tusartakkani assigiiaartut Sermitsiamut oqaluttuaraa. Tassa qaammatit tamaasa marlunngornerit pingajuanni Suila-tapisisoqarsimatillugu aqaguani suliartunngitsoortartut ajornartorsiutaanerat.

- Ima ilungersunartigisarpoq ilaanni aalisakkerivinni sulisussaaleqisoqalertarluni, taamatuttaarlu allanik aamma oqariartortoqarnikuuvoq ajornartorsiuteqartarlutik. Utoqqaat illuini sulisussaaleqisarneq ilaatigut aamma Suila-tapisereernerup kingorna pisartoq assut isornartorsiorneqarpoq. Angajoqqaanillu aamma oqariartorfigineqarnikuuvunga ilaatigut meerartik aaginnartariaqartarlugu, tamannalu nalaatsornerinnakkut taanna Suila-tapisiffiit nalaanni pisartoq, Margrethe Thårup Andersen oqarpoq.

Imigassartortarneq peqqutaakkajuttartoq anngussisartut oqariartuutigisarpaat.

- Suila-tapisinerup aqaguani sulinngitsoortarneq nalaatsornerinnartut isigineqaqqaariarluni, taava kisianni imigassamik atuineq aallaavigalugu takkutinngitsoortarneq oqariartuutigineqaqattaarpoq, Margrethe Thårup Andersen oqarpoq. 

Suila-tapit akissarsiffinni tunniunneqartalissappata ajornartorsiut nuuinnarneqassanngila?  

- Inuit nammineq akisussaaffigigaluarpaat inuunertik inooriaasissartillu, taamaattorli inuiaqatigiinnut sullikkusutatsinnut eqquinerlussappat allaqqunneqarsinnaanngitsutut isigivara akissarsiffimmi tunniunneqartassasut, taanna oqarpoq. 

Akissarsiffimmi tunniunneqartalerlik

Taassuma erseqqissaatigaa Suila-tapit imminermini ajoriffissaqartinnagit.

- Sulinermi akissarsiagissaarnerunissaq, imaluunniit sulinerup akilersinnaaneruneranut aningaasat annertunerusut sulisartunut tunnissaat kissaatiginartorujussuuvoq. Taamaattorli eqqarsarluaqqittariaqarpugut qaqugukkut tunniunneqartarnissaat pillugu, Margrethe Thårup Andersen oqarpoq. 

AAMMA ATUARUK 

Innuttaasut 7.161-it Suila-tapisivallaarsimallutik akiliisussanngortut: – Paatsuunganarujussuarpoq

Taassuma ullormi akissarsiffimmi tunniunneqartalernissaat tulluarnerpaasoraa.  

- Aqqutissiuuttariaqaraluarparput akissarsianut ilanngutiinnarlugu, akissarsiat allagartaannut, taavalu akissarsinerup nalaani  aningaasat taakkua tunniunneqartassasut. Imaanngitsoq aningaasarsiffiunngitsumi, sapaatip-akunnerata qeqqani tunniunneqartassasut, taamaasilluni inuiaqatigiinnut, meerartatsinnut, utoqqartatsinnut, taavalu aamma namminersortunut suleqatinullu kingunerluuteqartumik, taanna oqarpoq.

Inatsisartut ukiaq manna ataatsimiinnissaannut aalajangiiffigisassatut siunnersuuteqarnissamut piffissaq qaangiutereerpoq. Suila-tapilli tunniunneqartarnerata ullua nikisinniarlugu aappaagumut siunnersuutigisinnaanera mattussinnaanagu, Margrethe Thårup Andersenip oqaatigaa.