Innuttaasut 7.161-it Suila-tapisivallaarsimallutik akiliisussanngortut: - Paatsuunganarujussuarpoq

Trina P. Evaldsenip ukiumoortumik nalunaarut e-Boksikkut sisamanngornermi takkummat ammaramiuk, akileraarutinut akileeqqittussaannginnini paasillugu oqiliallaatigaa.

Allagarsianili atuarlualeramiuk tupaallaateqarpoq, Suila-tapisivallaarsimagamimi 2.974 koruuninik akiliisussanngorsimavoq.

- Paatsuunganarujussuarpoq, nammineerlutami naatsorsorsinnaanngilarput annertuallaamik pisimanerluta imaluunniit eqqortumik tunineqarnerluta, Trina P. Evaldsen oqarpoq. 

Taanna Suila-tapisisaleramili nikerartumik pissarsisarpoq, tapinillu pissarsitilluni inuussutissanut ulluinnarni iluaqutigisarlugit. Taamaammat tapisissutigisani, maannalu utertittariaqalikkani, atoreersimalerpai.     

- Inuussutissanut allanullu atoreerpagut, taavalu massakkut allagarsilluta akiligissanneqarluta. Qanoq ililluta taava taakkua naatsorsuutigisinnaavagut Suila-tapit ilumut eqqortuunersut. Tullianimi tunineqarutta qanoq ililluta nalussanngilarput eqqortumik tunineqarluta imaluunniit akiligassariumaakkatsinnik tunineqarnerluta? Tassaniinnartorujussuuvoq, Trina P. Evaldsen oqarpoq. 

Kisiartaanngilaq

Trina P. Evaldsen Suila-tapisivallaarsimasuni kisimeeqqajanngitsoq Akileraartarnermut Aqutsisoqarfiup kisitsisaataasa takutippaat. Innuttaasummi 7.161-it Suila-tapisivallaarsimasut katillugit 30,2 millionit koruuninik akiliisussanngorsimagamik. Illuatungaani innuttaasut 9.443-t tapisiakippallaarlutik utertoortussanngortut.

Akieleraartarnermut Aqutsisoqarfimmi attaveqatigiinnermut pisortap Søren Würtzip oqarnera naapertorlugu ukiumut isertitassatut naatsorsuutigineqartut aallaavigalugit Suila-tapisisoqartarpoq.

Innuttaasoq ukiuni marlunni kingullerni qanoq isertitaqarsimanersoq Akileraartarnernut Aqutsisoqarfiup naatsorsuinermi atortorissaarutaasa naatsorsortarpaat, taakkua saniatigut isertitat ataavartumik nalunaarutigineqartartut naatsorsuinermi atorneqartarlutik. Taamaaliornikkut innuttaasut ataasiakkaat qanoq Suila-tapisiassaqartigineri paasineqartarpoq.

Akileraartarnermut aqutsisoqarfimmi attaveqatigiinnermut pisortap Søren Würtzip oqaatigaa, Suila-tapit naatsorsuutigineqartumik ukiumut isertitaq tunngavigalugu ingerlaavartumik tunniunneqartarmat, taamaattumillu aningaasat utertillugit akilerneqartartut.

Akileraartarnermut aqutsisoqarfiup naatsorsuinermut aaqqissuussinerata ilaatigut innuttaasut ukiuni kingullerni marlunni isertitaat kiisalu ingerlaavartumik nalunaarutigineqartartut atorneqartarput. Taamaattumik aaqqissuussinerup naatsorsortarpaa innuttaasoq qanoq annertutigisumik Suila-tapit pisinnaatitaaffigisassangagaa.

Naatsorsuinerilli tamatigut eqquuttanngillat. 

- Tamatigut eqqoqqinnaartumik naatsorsuisinnaasanngilaq, Søren Würtz oqarpoq.

Paasissutissat ersarinnerulersikkusukkaat

Innuttaasut Suila-tapisivallaarsimagunik akiligassaneriataarsinnaanerat Akileraartarnermut Aqutsisoqarfiup naammaginartumik paasissutissiissutigisimanngikkaa Trina P. Evaldsen isumaqarpoq.

Suila-tapit unitsikkallarneqarsinnaaneri pillugit innuttaasunut ilisimatitsisimaallutik Søren Würtz erseqqissaatigaa. Innuttaasut Suila-tapisisitsisarneq pillugu ilisimasaqarneruniassammata paasissutissiinermik suliaqarsimallutik ilanngullugu eqqaavaa. 

Taamaattorli paasissutissat ersarinnerusimasinnaagaluarneri nassuerutigaa.

- Ersarinnerunissaat anguniarlugu iliuuseqalereerpugut, taamaaliornikkut akiligassaninnaveersaarniaraanni qanoq iliortoqarsinnaanera paasissutissiissutigerusupparput, Søren Würtz oqarpoq.

Naatsorsueriaatsip pitsanngorsarneqarnissaa anguniarlugu Akileraartarnermut Aqutsisoqarfimmiit nalilersuilereerput. Innuttaasut saaffiginninnissaminnut tikilluaqqusaasut, innuttaasullu saaffiginnissutaat pitsaanerusumik paasissutissiisalernissamut sakkussatut atorusuppaat.

Akiligassarserusunngikkuit imaaliussaatit

Trina P. Evaldsen Suila-tapisiivallaarsimalluni 3.000 koruuningajannik akiligassaqalersimagami siunissami Suila-tapisigaangami tigusassanerlugit qularaa.

- Iluaappoq, aamma nalorninarpoq. Tulliani tunineqaqqissagaluaruma nangaasutut misigivunga ilumut eqqortumik tunineqarnerlunga imaluunniit ilumut atussanerlugit, imaluunniit toqqussanerlugit, Trina P. Evaldsen oqarpoq.  

Isertitat annertuumik allannguuteqartillugit eqqumaffigisarnissaat Akileraartarnermut Aqutsisoqarfiup innersuussutigaa. Assersuutigalugu sulilernermi soraarnerussutisiaqalernermiluunniit, aamma isertitat qaffannerini apparneriniluunniit eqqumaffiginiarneqartassasut erseqqissaatigaat. 

- Siunnersuut pitsaasoq tassaavoq aningaasarsiat tassanngaannaq annertuumik allanngoraangata, tassa aningaasarsiat amerlanerujussuanngoraangata imaluunniit ikinnerujussuanngoraangata, assersuutigalugu suliffeqarnermik aallartikkaanni imaluunniit pensionisiaqaleraanni, tamanna aamma Suila-tapit-imut sunniuteqarsinnaavoq. Taamaattumik nalunaaruteqarsinnaavoq, imaluunniit nammineq aningaasat tunniunneqarnissaat unitsikkallarsinnaavaa, Søren Würtz oqarpoq.

- Isertitat allannguuteqarpata, soorlu qaffangaatsiarpata appangaatsiarpataluunniit Suila-tapisianut sunniuteqarsinnaanerat eqqumaffigeqquarput. Taama pisoqarnerani nammineerluni unitsinngikkaanni saaffiginnittoqarsinnaavoq, Søren Würtz oqarpoq.