Meeqqat illersuisuata soraarsitaanera pillugu Inuit Ataqatigiit pissutsinik erseqqissunik kissaateqartut

Naalakkersuisut erseqqissumik nalunaarutigisariaqarpaat sooq Stina Sværd meeqqat illersuisuattut soraarsitaanersoq, Mimi Karlsen (IA) tusagassiutitigut nalunaarummini taama allappoq.

AAMMA ATUARUK

Meeqqat pillugit oqaaseqartartoq soraarsinneqarsimalluni uppernarsarpaa

- Ataani atsiortugut piumasaraarput piffissaq eqqortoq nalleriarpat meeqqat oqaaseqartartuata suliunnaarsinneqarnera pillugu ammasumik Naalakkersuisuniit tunngavigineqartut inuiaqatigiinnut erseqqissaassutigineqarnissaat. Tamattami kissaatigaarput malitassat malillugit ingerlatsisoqarnissaa.

Mimi Karlsen Inuit Ataqatigiit Inatsisartuni eqimattaa sinnerlugu ima allappoq:

- Nalunngilarput MIO aningaasaqarnikkut sakkortuumik ilungersunartumik killiffeqartoq, oqaaseqartartuusimasorlu aningaasaqarnikkut ajornartorsiutaasut qulaajarneqarnissaat pillugu sulilluarsimasoq.

- Nalunngilarput naalakkersuinikkut sulianut tunngasunik apeqqusiisarsimanera tutsuiginartumillu sulisimanera nunatsinni meeqqat atugaannut pitsanngorsaanissaq siunertaralugu ingerlassimagai.

Stina Sværdip soraarsitaasimanini Facebookimi tallimanngormat paasisitsisiissutigaa. Meeqqat illersuisorisimaligaat aamma neriuppoq pisoq tamarmi qulaarneqarumaartoq, namminerli oqaluttuarusunnginnerarpoq:

- Qamannga pisumik neriungaarpunga suliaq, pissutsillu tassunga tunngasut tamarmik piffissap ingerlanerani qulaajarneqarumaartut, taamaasilluni qanoq pisoqarsimanera aammalu sooq taama pisoqarsimanera tamakkiisumik paasineqarniassammat. Tamanna suliassaqarfigaarput, suliniaqatigiiffimmut, minnerunngitsumillu meeqqanut, taakku illersorniarlugit nunarsuarmi pisinnaatitaaffiinik pilersitsiffigisimasatsinnut.