Meeqqat pillugit oqaaseqartartoq soraarsinneqarsimalluni uppernarsarpaa

- Matumuuna aliasungaarlunga nalunaarutigisariaqarpara, Meeqqat Pillugit Oqaaseqartartutut soraarsitaasimagama, atorfik nuannarilluinnagara uummateqarfigisimaqisaralu, Stina Sværd Facebook-imi quppernermini allappoq.

AAMMA ATUARUK

Naalakkersuisoq suli aalajangiisoqanngitsoq: MIO-mi aningaasanik atornerluisoqarnera akuerinngilara

Nutaarsiassaqartitsiviup KNR-ip arlaleriarluni allaaserereeraalu meeqqat pillugit oqaaseqartartoq angerlartinneqarsimasoq kingornalu soraarsinneqarsimasoq, taama nalunaaruteqarluni allappoq.

Stina Sværd peqquserlussimanani imaluunniit suliniaqatigiiffiup aningaasaataanik atornerluisimanani allappoq.

- Paarlattuanik nukikka atorlugit suliniaqatigiiffiup sulisullu soqutigisaat, minnerunngitsumillu meeqqat pisinnaatitaaffii illersorlugit isumagisimavakka. Peqatigitillugu aningaasanik annertuumik atornerluisoqarsimanera qulaajarniarlugu sulisimavunga, isumaqarama ilumoortoq saqqummertariaqartoq, meeqqanullu akisussaaffipput tamatigut salliutinneqartariaqartoq.

Taama oqariartornermini innersuutigaa MIO-p sulisorisimasami ilaat aningaasatigut peqquserlussimasutut aammalu allakkanik uppernarsaatinik peqquserluttutut pasilliullugu politiinut aggustimi nalunaarutigimmagu.

Meeqqat illersuisuat allappoq neriuutigalugu piffissap ilaani pisut tamaasa qulaajarneqarsinnaassasut, qanoq pisoqarsimanera aamma sooq pisoqarsimanera paasineqarniassammata.

Suleqatinut, sulisunut innuttaasunullu qujasoq

Stina Sværdip allagaani soraarsitaasimanerminut suna pissutaanersoq oqaaseqarfiginngilaa. Taamaattoq suliniaqatigiiffimmi atorfeqarnermini suleqatigisimasani, sulisut innuttaasullu tamaasa qujassuteqarfigai.

- Minnerunngitsumillu sulininni meeqqat naapissimasakka, tusarnaassallugit periarfissaqarfigisimasakka, tapersersorsimasakkalu immikkut ittumik tamaasa qutsavigerusuppakka. Qujanaq eqqarsaatissinnik apuussivigisarassinga, taamattaarlu misigisassinnik neriuutissinnillu avitseqatigisarassinga. Uannut immikkut illuinnartuusimavoq ilisserpiaat nipersi aallaavigalugu sullissinera, pisinnaatitaaffisi, pisariaqartitasi aammalu isiginneriaaserisarsi pimoorullugit tiguneqartarnissaannut sullissininni. Ilissi sulininni pingaarnerpaajusimavusi, tamatigullu sulininni pingaarnerpaajujuassaasi.

- Piffissami suliffigisimasannut qujamasungaarlunga suliassaq qimappara, upperilluinnarlugulu meeqqat pisinnaatitaaffii nipaallu tamatigut qitiutinneqartarumaartut.