Mette F.-ip spiralilersuisimanermut suliamut atatillugu nalunaarusiat suli piariinngitsut taarsiissuteqarnissap akuerineqarnera illersoraa

Arnat kalaallit akuersinatik naammaginartumilluunniit akuersinatik spiralilerneqarsimasut taarsiiffigineqarnissaat pillugu inatsisissatut siunnersuutip spiralilersuisimaneq pillugu nalunaarusiat marluk saqqummiunneqarnissaannut ulloq ataaseq sioqqullugu akuersissutigineqarnera "nalaatsornerinnaavoq".

Ministeriuneq Mette Frederiksen (S) Socialdemokratit Odensemi ataatsimiinneranni taama oqarpoq.

- Sivisunaanngitsoq uagutsinnut pingaaruteqarluinnarpoq, taamaammallu inatsisip tamatuma atuutilersinneqarnissaa pingaartipparput.

- Nalaatsornerinnakkulli ullut taakkua marluk imminnut tulleriipput.

Spiralilersuisimaneq pillugu nalunaarusiat marluk Naalakkersuisunit tallimanngorpat tamanut saqqummiunneqassapput, taakkulu niviarsiaqqanut arnanullu 1960-imiit 1991-imut ilisimanagu akuersinatillu spiralilersorneqarsimasunut tunngassuteqarput.

Nalunaarusiani taakkunani marlunni inatsisitigut akisussaaffiit inuiannillu toqoraasoqaratarsimasinnaanera eqqartorneqarput.

Inuiannik toqoraasoqarsimasoq nalunaarusiani allassimappat arnat 300.000 koruuninit amerlanerusunik taarsiiffigineqarsinnaanersut Mette Frederiksen tusagassiortunik katersortitsinermi aperineqarpoq.

Taanna "suli atuarnissaannut periarfissaqarsimanani" aallaqqaammut erseqqissaavoq.

- Taamaammat imarisaat ilisimanngilakka. Qanorluunniit imaqaraluarpata iliuuserisavut eqqortuusut isumaqarpunga, pisimasummi ilungersunarput, aamma kalaalerpassuit naalliussimanerat aliasuutigeqaara, Mette Frederiksen oqarpoq.

Pisortatigoortumik utoqqatsereersimalluni, taarsiissuteqarnissarlu „immikkuullarilluinnartoq“ aamma oqarpoq.

- Inatsisit maanna atuutilersinneqarmata pitsaasuuvoq, nalunaarutilli imarisaat takutinnagit oqaaseqaqqissinnaanngilanga.

RITZAU