Mette F.: Oqartussaaneq isumaqatiginninniutigineqanngilaq
Nato-p Kunngeqarfiup Kalaallit Nunaannut tunngatillugu inissisimaffia ilisimavaa, ministeriunerlu Mette Frederiksen Nato-p generalsekretæriata Mark Ruttep USA-llu præsidentiata Donald Trumpip Davosimi ataatsimiinnerminni nunap namminersorluni oqartussaassusia isumaqatigiinniutigineqarsimanngitsoq ilisimatinneqarpoq.
Naalakkersuisut siulittaasuata Jens-Frederik Nielsenip ministeriunerullu Mette Frederiksenip Kalaallit Nunaat tuniniarneqanngitsoq tusagassiortunik sapaatip-akunnerata siuliani katersortitsinerminni oqariartuutigaat.
Foto: Trine Juncher Jørgensen
Ministeriunerup Mette Frederiksenip Nato-p generalsekretæria Mark Rutte ataavartumik attaveqarfigisarlugu, Davosimilu aningaasaqarneq pillugu ataatsimeersuarnermi Kunngeqarfiup taamatullu Kalaallit Nunaata oqartussaassusia isumaqatigiinniutigineqarsimanngitsoq sisamanngornermi allakkatigut nalunaarutigaa:
- NATO-p Kunngeqarfiup Danmarkip qanoq inissisimanera nalunngilaa. Politikkikkut suut tamaasa isumaqatigiinniutigisinnaavavut; isumannaallisaaneq, aningaasaliinerit aningaasaqarnerlu. Oqartussaassuserpulli isumaqatiginninniutigisinnaanngilarput, ministeriuneq oqarpoq, naqissusiillunilu:
- Aamma taamaaliortoqarsimanngitsoq ilisimatinneqarpunga. Danmarki Kalaallit Nunaallu soorunami kisimik Danmarkimut Kalaallit Nunaannullu tunngasunik aalajangiisinnaapput.
Trump akitsuusersuiniarunnaartoq
Kalaallit Nunaat pillugu siunissami isumaqatigiissusiornissamut sinaakkusiisoqarsimasoq USA-p præsidentiata Donald Trumpip pingasunngornermi unnukkut oqareernerata kingorna ministeriuneq taama nalunaaruteqarpoq. Præsindetip akitsuusersuinialersaarnini aamma taamaatippaa.
Trumpip Nato-llu generalsekretæriata Mark Ruttep ataatsimeeqatigiinnerisa kingorna taama nalunaaruteqarpoq.
Præsidenti suna pillugu taama oqarnersoq kingorna isumaliuutersuutigineqarpoq, Trumpimullu Kalaallit Nunaata USA-mit pigineqarnissaanik kissaateqartumut nassuerutiginnittoqarsimanersoq.
Trumpip Davosimi isumaqatigiissutip imarisaa erseqqissumik oqaatiginngilaa, isumaqatigiissulli "kissaatigisatsinnik tamanik naammassinnittoq" ilaatigut oqarpoq. Naalagaaffimmut nunallu tamalaat sillimaniarnerat ilanngullugu.
Isumannaallisaaneq pillugu oqaloqatigiinneq pitsaasoq
Donald Trumpip Kalaallit Nunaat USA-p isumannaatsuunissaanut pingaaruteqartoq arlaleriarluni oqaatiginikuuaa, Trumpillu Ruttellu taanna oqaloqatigiissutigisimagaat pitsaasoq ministeriunerlu sisamanngornermi oqaaseqarnermini oqarpoq:
- Issittumi isumannaatsuuneq NATO-mi iligiinnnut tamanut attuumassuteqarpoq. Taamaattumik tamanna NATO-p generalsekretæriata USA-llu præsidentiata oqaloqatigiissutigimmassuk pitsaallunilu pissusissamisoorpoq.
Golden Dome pillugu oqaloqatigiinnissamut piareersimasoq
Kunngeqarfiup Danmarkip killeqarfii ataqqineqassappata, Issittumi isumannaallisaanerup pitsanngorsarnissaa, ilaatigut USA-p missilit atorlugit illersuinissamut suliniutaa Golden Dome-mik taaguutilik pillugu, iligisat pitsaasumik oqaloqatiginissaat ministeriunerup aamma kissaatigaa.
Qallunaat naalakkersuisuisa suliap ingerlanerani Naalakkersuisut suleqatigisimagaat taassuma naqissuserpaa.
- NATO qanimut oqaloqatigaarput, uangalu NATO-p generalsekretæria Mark Rutte ataavartumik oqaloqatigisarpara, ilaatigut Davosimi præsident Trumpimik ataatsimeeqateqarnissaa sioqqullugu kingornalu, ministeriuneq oqarpoq.
Naalakkersuisut qanoq isumaqarnersut nalunaaqutaq marlunut paasinarsissaaq, tassa Naalakkersuisut siulittaasuata Jens-Frederik Nielsenip (D) tusagassiortunik katersortitsissagami.
