Mette F.: USA-p Kalaallit Nunaat saassussappagu suut tamarmik unissapput
Mette Frederiksenip Trumpip Kalaallit Nunaat pillugu oqaasii ilumooruppai, Kalaallit Nunaannullu saassussisoqarnissaa mianersoqqussutigalugu.
Ministeriuneq Mette Frederiksen (S) oqarpoq Donald Trumpimik oqaloqateqarnissamut piffissanngoqqippasittoq. (Arkivfoto).
Assi: Mads Claus Rasmussen/Ritzau Scanpix
USA Kalaallit Nunaannik saassussissappat „suut tamarmik“ unitsinneqassapput.
Ministeriuneq Mette Frederiksen taama oqarpoq.
USA-p Venezuelami aqutsisoq sakkortuumik sakkutuulersorneq atorlugu peersimmagu, kingornalu Trumpip Kalaallit Nunaannik aqutsilerniarnini pillug uppernarsaareersorlu, taama oqaaseqarpoq.
- Nuna Natomut ilaasortap nuna alla Nato-mut ilaasortaasoq saassuppagu, taava suut tamarmik atorunnaassapput, Danmarkimi ministeriuneq oqarpoq.
USA-p Venezuelami præsidenti Nicolás Maduro illoqarfiit pingaarnersaanni Caracasimi arfininngornermi saassussinermi tigusaraa parnaarullugulu.
Trumpip nunallu taassuma præsidentia piffissami sivitsortumi ersarissumik aaqqiagiinngereersullu saassussineq pivoq.
Sakkutuulersorluni iliuuseqartoqareernerata kinguninngua Donald Trump Amerikamiut tusagassiorfiinit aperineqarpoq Kalaallit Nunaanni pissutsit qanoq isumaqarfiginerai.
Tassani præsidentip uteqqippaa USA-p isumannaallisaanermut tunngatillugu Kalaallit Nunaat pisariaqartikkaa.
Ilanngullugu oqaatigaa sammisaq kingusinnerusukkut sammeqqinneqartariaqartoq — qaammatit marluk ullulluunniit 20-t qaangiuppata. Piffissarli qanoq sivisutigissanersoq erseqqissarneqanngilaq.
Oqaatsit taakku pissutigalugit Mette Frederiksenip erseqqissarpaa Danmarkip kunngeqarfianut pissutsit ilungersunartut.
Donald Trumpip oqaasii pimoorussassaasut isumaqarpoq nangillunilu:
- Amerikami præsidentip oqaatsini pimooruppagit pissutsit maanna atuuttut ilungersunartorujussuupput, oqarpoq.
Nato illersornissami iligiit peqatigiffigisassaattut pilersinneqarnikuuvoq, nunallu ilaasortaasut soqutigisaqaqatigiinnerni allani aamma peqatigiipput.
Taamaattumik nuna Natomut ilaasortaq, soorlu USA, nunamik allamik Natomut ilaasortaasumik, soorlu Kalaallit Nunaannik, saassussissappat silarsuarmi isumannaallisaanerup aaqqissuussaanera tamarmi atorunnaarluinnassasoq ilimanaateqarpoq, Mette Frederiksen oqarpoq.
Danmarkip USA diplomatii aqqutigalugu ataavartumik suleqatigigaa aamma oqarpoq.
Mette Frederiksenip Donald Trump ukioq ataaseq matuma siorna ataasiaannarluni oqarasuaatikkut oqaloqatigaa.
Maannali immaqa nutaamik oqaloqatiginissaanut piffissanngortoq, oqarpoq.
Naatsorsuutiginngilaali oqaloqatigiinnermi pissutsit allanngortinneqarsinnaasut.
- Isumaqassanngilagut iliuuseqarnerit oqaloqatigiinnerilluunniit ataasiakkaat pissutsit allanngortissinnaassagaat, oqarpoq.
/ritzau/
