Mette Frederiksen naalakkersuisunngortitsivoq: Naalakkersuisut tunngaviat marlunngornermi saqqummiunneqassaaq
Mette Frederiksenip (S) S, SF, M aamma R-nik ilaasortalinnik naalakkersuisunngortitsisinnaanini kunngimut ataasinngornermi unnukkut nalunaarutigaa.
Ministeriugallartup Mette Frederiksenip (S) sapaatip-akunnerini arlalinni isumaqatiginninniareerluni Socialdemokraatit, SF, Moderaterne aamma Radikale naalakkersuisunngortinnissaat iluatsippaa. Kunngi Odensemi ataasinngornermi unnukkut paasitippaa.
Assi: Sebastian Elias Uth/Ritzau Scanpix
Mette Frederiksenip (S), Pia Olsen Dyhrip (SF), Lars Løkke Rasmussenip (M) aamma Martin Lidegaardip (R) marlunngornermi nalunaaqutaq 16.00 (nunatsinni nalunaaqutaq malillugu 13.00) naalakkersuisunngortussat toqqammavissaat saqqummiutissavaat.
Tamanna ministeriunerup allaffianit tusagassiuutinut nalunaarummi ilisimatitsissutigineqarpoq.
Mette Frederiksenip Socialdemokratit, SF, Moderaterne aamma Radikale naalakkersuisunngortitsisinnaanerat kunngi Frederikimut ataasinngornermi unnukkut paasissutissiissutigaa.
Naalakkersuisut toqqammavissaat Folketingimut qinersisoqarneranit sapaatip-akunneri qulit qaangiuttut saqqummiunneqassaaq, taamaalillutillu isumaqatigiinniarnerit aatsaat taama sivisutigaat.
Naalakkersuisoqatigiit ministerinngortussallu pingasunngornermi ilisaritinneqassapput.
Frederiksen ministeriunertut ingerlaqqissasoq
Mette Frederiksen ministeriuneruinnassasoq tassa paasinarsivoq. Taanna 2019-imili ministeriuneruvoq.
Mette Frederiksen Marienborgimiit, ministeriunerup atorfimminut atatillugu najugaqarfianit Lyngbymiittumit Odensemut, kunngikkormiunut kunngip umiarsuaani Dannebrogimiittunut, ataasinngormat unnukkut angallanneqarpoq.
- Sivisuumik isumaqatigiinniareerluta naalakkersuisoqatigiittoqarsinnaanngornera nalunaarutigaara, Mette Frederiksen kunngi Frederik pulaareerlugu tusagassiortunut oqarpoq.
- Danmarkimi naalakkersuisut toqqammavissaat inunnut Danmarkimiittunut, kinguaariinnut tulliuttunut - aamma uumasunut pitsaasuuvoq, taanna nangilluni oqarpoq.
Naalakkersuisunngortut Folketingimi amerlanerussuteqartunit tapersersorneqartut Kunngikkormiut tusagassiuutinut ataasinngornermi unnukkut nalunaarutaanni allassimavoq. Kikkulli amerlanerussuteqarnissamut tunngaviliinermut paasissutissiissutigineqanngillat.
82-inik ilaasortallit
Socialdemokratit, SF, Moderaterne aamma De Radikale katillugit 82-inik ilaasortaatitaqarput.
Taamaattumik partiit amerlanerussuteqartunit akerlilerneqassanngikkunik, assersuutigalugu Enhedslistenip ilaasortaatitaanit aqqanilinnit, tapersersorneqartariaqarput.
Enhedslistenip gruppiani siulittaasup Peder Hvelplundip Enhedslisten naalakkersuisoqatigiinngortussanut tunngaviliisoq oqarpoq.
- Kiffaanngissuseqarlutalu attuumassuteqanngitsuujumavugut, aamma isumaqatiginngisatsinnik itigartitsisinnaarusulluta. Anguniagarli tamakkiisumik isigalugu isumaqataaffigaarput politikkikkullu malunnaatilimmik sunniuteqarpugut, Hvelplund P4 Nordjyllandimut marlunnngornermi ullaakkut oqarpoq.
Partii Alternativet aamma naalakkersuisoqatigiinnissamik isumaqatiginninniarnernut naggatissaa tikillugu peqataavoq, naalakkersuisunullu tunngavileeqataanissaa naatsorsuutigineqarpoq. Partii taanna tallimanik ilaasortaatitaqarpoq.
Aatsaat taama sivisutigisumik isumaqatigiinniartoqartoq
Naalakkersuisoqatigiilernissamut isumaqatigiinniarnerit aatsaat taama sivisutigaat, kunngimullu katillugit pingasoriarluni nalunaaruteqartoqarluni. Venstrep siulittaasua Troels Lund Poulsen isumaqatigiinniarnerit ingerlaneranni, kunngikkormiut sinnerlugit sapaatit-akunnerani marlunni misissuisuuvoq, VLAK-illi naalakkersuisoqatigiilernissaannut tapersersuisut ikippallaarput.
2022-mi isumaqatigiinniarneq sivisunerpaanikuugaluarpoq, tassani qinersinerup kingorna ullut 42-t qaangiuttullu Mette Frederiksen naalakkersuisunngortitsisinnaanini nalunaarutigaa. SVM taamani naalakkersuisoqatigiilerput.
Naalakkersuisunngortut toqqammaviat ullut marluk qaangiuttut saqqummiunneqarpoq, tassalu qinersinermiit ullut 44-t qaangiuttut.
/ritzau/
