Mette Frederiksen USA aarlerisaareqqunagu qinnuigaa – nunat avannarliit tapersiipput
Ministeriuneq Mette Frederiksen USA qinnuigaa Danmarkimut Kalaallit Nunaannullu aarlerisaarinini unitsissagai. Nunat avannarliit arlallit tapersiipput.
- USA-p pisinnaatitaaffiginngilaa naalagaaffeqatigiit pingasuusut ilaat naalagaaffinngortissallugu. Danmarkip kunngeqarfiata Nato-mi ilaasortaaffia pissutigalugu illersornissamut isumaqatigiissummut ilanngussimavoq, Mette Frederiksenip oqarnera naapertorlugu.
Assi: Trine Juncher Jørgensen
Ministeriunerup Mette Frederiksenip (Soc.) sapaatiummat unnukkut USA-mut qinnuigimmagu Danmarkimut Kalaallit Nunaannullu sioorasaarineq unitseqqullugu, Sverigep, Norgep Finlandillu Danmark tapersersorpaat.
Sverigemi ministeriuneq Ulf Kristersson, Norgemi ministeriuneq Jonas Gahr Støre Finlandimilu præsidenti Alexander Stubb sapaatiummat unnukkut X-imi taama allapput.
- Danmarkimut Kalaallit Nunaannullu tunngasut Danmarkip Kalaallillu Nunaata kisimi aalajangiiffigisussaavaat. Sverigep nuna sanilerisani tapersersorpaa, Ulf Kristersson allappoq.
- Kalaallit Nunaat Danmarkip kunngeqarfianut ilaavoq. Norgep Danmark tamakkiisumik tapersersorpaa, Jonas Gahr Støre allappoq.
Frederiksenip USA itigartippaa
Alexander Stubbip, X-imi allaaserisamigut Mette Frederiksenip oqaasii ingerlateqqippai imalu allalluni:
- Kalaallit Nunaat Danmarkilu sinnerlugit allat aalajangiissanngillat, Kalaallit Nunaat Danmarkilu kisimik namminneq aalajangiissapput.
Mette Frederiksenip sapaatiummat USA-mut Danmarkimut Kalaallillu Nunaannut sioorasaarisarunnaarnissamik sakkortuumik kaammattuinermi saniatigut aamma allappoq USA-p Kalaallit Nunaannik tiguaanissaanik pisariaqartitsinermik oqalunnera isumaqanngilluinnartoq.
- USA-p naalagaaffeqatigiinnermi nunat pingasuusut arlaannaalluunniit tiguarsinnaanngilaa. Kunngeqarfik Danmark Nato-mut ilaavoq taamaalillunilu Nato-p isumannaallisaanermut qularnaveeqqutaanik atuivoq, danskit ministeriunerat allappoq.
USA-p præsidentiata Donald Trumpip sapaatiummat The Atlanticimit apersorneqarnermini uteqqippaa USA-p Kalaallit Nunaat pisariaqartikkaa, tamannalu pillugu Frederiksen qisuariaateqarpoq.
Trumpip 2019-imi siullerpaamik Kalaallit Nunaata Amerikamiut pigilertariaqaraat eqqartorpaa. Novemberimi 2024-imi qinigaaqqereernermi kingorna tamanna uteqattaartarpaa.
