Naalakkersuisooqatigiit nalunaaquttat ingerlaaqatigiiffiinik allanngueqqikkusuttut

Naalakkersuisut siulittaasuata Inatsisartut oqaluttarfianniit oqaatigaa piffissaq UTC-3-mut utertinneqarnerani, aasaaneranilu nalunaaqutaq atorunnaarsinneqarpat inuussutissarsiortunut aningaasatigut tamanna kingunerlutsitsissasoq.

AAMMA ATUARUK

Naalakkersuisut nalunaaquttap allanngortinnissaa pillugu nipaarluusut

Taamaakkaluartoq IA, Demokraatit aamma Atassut UTC-3-mut utertitinissamut akuersissapput. Naalakkersuisoqatigiit partiivisa ataatsimut nalunaarutaanni, Bo Martinsen (D), oqarpoq.

- Inuit tusarniaanermut akissuteqaaterpassuit tunngavigalugit aalajangerpugut piffissaq UTC-3-mut utertinneqassasoq, taamaattumillu siunnersuutip akuerinissaa innersuussutigaarput.

Innuttaasunit nalunaaquttap allanngortinneqarnissaanik annertuumik kissaateqarneq tunngavilersuutigineqarpoq. Nalunaaquttap allanngortinneqarnissaanik kissaateqarneq atsiornernik katersinermi 4142-nit atsiorneqarpoq.

Inatsisissatut siunnersuut Siumumit siullermik siunnersuutigineqarpoq, Inatsisinulli Atuutsitsinermut Ataatsimiisitaliamit allannguutissatut siunnersuut naalakkersuisooqatigiit taperserpaat.

Aappaagumiit aasaanerani nalunaaqutaq atorunnaarsinneqassaaq, 2028-milu UTC-3 nalunaaqutaq utertinneqassalluni.

- Naalakkersuisooqatigiit nalunaarput nalunaaqutaq allanngorteqqinneqassasoq, tamannalu qujamasuutigaarput, Siumumi ilaasortaq Erik Jensen oqarpoq.

18-it akuersipput, akerliusoqanngilaq, arfinillillu taaseqataanngillat.

Inatsisartut Allattoqarfiata Sermitsiamut ilisimatitsissutigaa, siunnersuut oktobarip 21-ani pingajussaaneerneqarumaartoq, tassanilu inaarutaasumik akuerineqassaaq.

Naleqqap siunnersuutaa itigartinneqarpoq

Piffissaq UTC-3-mut utertinniarlugu aasaaneranilu nalunaaqutaq atorunnaarsinniarlugu, Siumut Nalerarlu inatsisissatut siunnersuutinik assigiingajalluinnartunik marlunnik saqqummiussipput. Siunnersuutit taakkua assigiinngissutaat tassaavoq Naleqqap siunnersuutaani piumasarineqarmat piffissamik allannguinissaq aalajangiiffigineqartinnagu, Qaanaami, Tasiilami Ittoqqortoormiunilu innuttaasut tusarniaaffigineqassasut.

Naleqqap siunnersuutaa ullumikkut oqaluuserineqarpoq, tassanili partiit naalakkersuisooqatigiit siunnersuut itigartinniarlugu innersuussuteqarput.

Tamanna Naleqqap isornartorsiorpaa, paasiuminaatsippaami sooq partiit allat isorliunerusuni innuttaasut tusarniaaffiginissaat orniginnginneraat.

- Kangia Avannaalu ataqqineqannginnerat tusarniaanerit piumasarineqartut itigartinneqarnerat uggornarpoq, Aki-Matilda Høegh-Dam (N) ataatsimiittarfimmiit oqarpoq.

Erik Jensenip Siumumeersup erseqqissarpaa siunnersuutiminni allassimammat Naalakkersuisut aalajangersinnaagaat sumiiffinni aalajangersimasuni nalunaaquttap assigiinngitsut atuutsinnissaa.

Naleqqap nuannaarutigaa aasaanerani nalunaaqutaq atorunnaarsinneqarnissaa piffissallu immikkoortuisa allanngortinneqarnissaat maannakkut isumaqarfigineqartoq, paasisinnaanaguli sooq marloriarluni taamaaliortoqartariaqarnersoq.

Naleqqap siunnersuutaa arfinilinnik taperserneqarpoq, 17-it akerliullutik marlunnillu taasisoqarani.