Naalakkersuisut nalunaaquttap allanngortinnissaa pillugu nipaarluusut

Inatsisartuni Inatsisinut Atuutsitsinermut Ataatsimiititaliap allannguutissatut siunnersuutaa akuerineqarpat, 2027-mi aasaanerani nalunaaqutaq atuutilersissanngilarput, 2028-milu aasaanerani nalunaaqutaq atorunnaarsillugu UTC-3-mut utissaagut. Tamanna Danmarkimut nalunaaquttap nikinneranut seqernullu qaqugu nuinissaanut sunniuteqassaaq.

AAMMA ATUARUK

Ataatsimiititaliaq innersuussivoq: Nalunaaqutaq nikiseqqinneqassaaq

Ullaakkut qaamanerusalissaaq Europamullu nalunaaquttap nikinnera annertusissasoq.

Tamanna Inatsisartut Inatsisinut Atuutsitinermut Ataatsimiititaliaata piffissap aalajangersarneqarneranut tunngasunik isumaliutissiissummini ullumi oqallisigisassami sammineqarpoq.

Aappaagumiit aasaanerani nalunaaqutaq atorunnaarsinniarlugulu 2028-mi UTC-3-mut utertinniarpaat.

Inatsisinut Atuutsitsinermut Ataatsimiititaliami amerlanerussuteqartut – partiit naalakkersuisooqatigiit – Demokraatit, IA aamma Atassut – allannguutissatut siunnersuutaasumik taama inassuteqaraluarput, Naalakkersuisulli tunuarsimaarput.

“Inatsisinut Atuutsitsinermut Ataatsimiititaliap innersuussutaa Naalakkersuisut tusaatissatut tiguaat, kisiannili inassuteqaatip tamatuma kingunerisinnaasai ajortut tikkuarnissaannut pissutissaqarsorivoq,” Naalakkersuisut siulittaasuata Jens-Frederik Nielsenip akissuteqaataani allassimavoq.

Taassuma tikkuarpaa Kalaallit Nunaata niuernikkut qanimut suleqatigisai Europamiittut, allannguutissatullu siunnersuutip kingunerissavaa taakkua suleqatiginerinut akisunerulernissaat, attatiinnarnissaallu ajornakusoornerulernissaa.

Ingammik ernummatigaa allannguut tamanna pissutigalugu peqqinnissaqarfiup Danmarkimi immikkut ilisimasalinnut attaveqartarnerata sivikillinissaa, taamaalillunilu napparsimasut ataasiakkaat sivisunerusumik utaqqisariaqarnissaat.

Ukiumut 19 millionit koruuninik akeqassaaq

Aamma aningaasatigut isumakuluutit eqqarsaatigineqartariaqarput.

“Allannguinerit akeqanngitsumik piunnanngillat, aningaasalli inuiaqatigiinnut iluaqutaasussaagaluartut atorlugit aningaasaliisoqartariaqarpoq,” siulittaasoq allappoq.

Taassuma akissutaani allassimavoq aningaasaqarnermut naalakkersuisoqarfiup siornatigut missingersimagaa, nalunaaquttap allanngortinneqarnera ukiumut 19 million koruuninik aningaasanut inatsimmut ataavartumik ajortumik sunniuteqassasoq.

"Inuiaqatigiinnut aningaasartuutit suli annerulissapput, inuussutissarsiortut ilimagaat nunatta aningaasaqarneranut ajoqutaasumik kinguneqarnissaa, Danmark Europalu pilersuisutut tuniniaasullu pingaarnerit pineqarmata.“

Aammattaaq nalunaaquttap allanngortinneqarnerata kingunerisaanik Europamut timmisartukkut attaveqarneq ajornerulerumaarpoq.

Tusarniaanermi akissutit amerlasuut ajortumik kinguneqarnissaanik oqariartuuteqarput, Jens-Frederik Nielsenilu allappoq Inatsisinut Atuutsitsinermut Ataatsimiititaliap tamanna naliliinermini pingaartinnerusariaqaraa.

Naggasiivorlu Naalakkersuisut soorunami Inatsisartut aalajangiinerat malikkumaaraat.

Naleraq Siumullu piffissap allanngortinneqarnissaa pillugu siunnersuuteqarput.

Inatsisinut Atuutsitsinermut Ataatsimiititaliap siunnersuut itigartippaa Siumullu siunnersuutaanut allannguutissatut siunnersuuteqarluni. Siunnersuutit taakku marluk assigiinngissutaat tassaavoq Naleqqap piumasarimmagu Qaanaami, Tasiilami Ittoqqortoormiunilu innuttaasut tusarniaaffigineqassasut sumiiffinni taakkunani nalunaaqutaq allanngortinnagu aalajangiisoqartinnagu.