Naalakkersuisoq imminut naqqittoq: Ersarluttumik saqqummiussinera ajuusaarutigaara

Avannaata Kommuniani qinikkat amerlanerussutillit Ilulissani meeqqanut inuusuttuaqqanullu ulloq unnuarlu angerlarsimaffissamik pilersitsiniassallutik kommunalbestyrelsip septembarip 25-ani ataatsimiinnerani aalajangerput.

AAMMA ATUARUK:

Kommuni ulloq unnuarlu paaqqinnittarfittaarusuppoq – Taakkuali naammattut Naalakkersuisut isumaqarput

Meeqqanut, Inuusuttunut Inatsisinut Atuutsinneqarnerannut Naligiissitaanermullu Naalakkersuisoqarfik, Avannaata Kommuniani qinikkat aalajangernerannit ullut sisamat qaangiuttut, tusagassiorfinnut nalunaarput. Nalunaarummi Naalakkersuisup aalajangernera oqaluttuarineqarpoq. Tassa "Ulloq unnuarlu paaqqinniffinnik nutaanik qinnuteqarnermut ingerlariaatsip unitsikkallarneqarnera".

Nalunaarummi tassani qinnuteqaatit unitsikkallarneqarnerannut tunngasumi kommunit qinnuteqarnissaminnut suli periarfissaqarnerat erseqqissuliuutigisimanagu, Naalakkersuisup Sermitsiamut maanna nassuerutigaa.

- Septembarip 29-ani ersarluttumik saqqummiussisimagama ajuusaarutigaara.

- Tassani pineqarami namminersortutut meeqqanut inuusuttuaqqanullu angerlarsimaffiutitaarusuttunut qinnuteqaatit suliarineqartarnerannut unititsigallarneq. Tassunga peqqutaavoq ulloq unnuarlu angerlarsimaffinni inissat inoqanngitsut katillugit piffissami tassani 22-mmata, Mariane Paviasen Jensen (IA) oqarpoq.

Naalakkersuisoq: Kommunit eqqarsaatiginngitsoorpakka

Sermitsiaq Avannaata Kommuniata naalakkersuisullu aalajangerneri tunuliaqutaralugit ataasinngornermi oktobarip aqqaneq-aappaanni allaaserisaqarpoq. Allaaserisap saqqummereernerata kinguninngua Naalakkersuisoqarfik tusagassiorfinnut nalunaaqqippoq. Ima qulequtalimmik: "Naalakkersuisut erseqqissaapput: Kommunit ulloq unnuarlu paaqqinniffinnik nutaanik qinnuteqarlutillu pilersitsisinnaapput" Nalunaarummi tassani naalakkersuisoq imminut naqqippoq. 

Sooruna nalunaarummi siullermili erseqqissuliornerusimanngitsutit?

- Qinnuteqaatinik unitsitsigallarnissamik aalajangerama kommunit eqqarsaatiginngitsoorpakka. Assut ajuusaarutigivara erseqqissuliunnginnera. Nalunaarninni siullermili nalunaarutigisussaagaluarpara kommunit uani pineqanngitsut, taakkualu pilersitsinissaat pineqanngitsoq.

- Kommunip aalajangernera ilissi tusagassiarsi ilisimasaqarfiginngilara. Aatsaat ilissi tusagassiarigassiuk paasivara, naalakkersuisoq oqarpoq. 

Atuartut angerlarsimaffiat ulloq unnuarlu angerlarsimaffinngorusukkaat

Avannaata Kommuniani suleqatigiit borgmesteriutitaqartut, Siumup Naleqqallu, Ilulissani atuartut angerlarsimaffiat meeqqanut inuusuttuaqqanullu ulloq unnuarlu angerlarsimaffinngussasoq ataatsimiinnerminni aalajangerpaat. 

Illuatungiliuttut, Demokraatit, Atassut Inuit Ataqatigiillu borgmesteriutitaqartut aalajangernerannut isumaqataanngillat. Atuartut angerlarsimaffiat innarluutilinnut angerlarsimaffittut atorneqassasoq, taakkua kissaatigigaluarpaat. Amerlanerussuteqarfiginnginnamikkuli tamanna pissanngilaq.

Meeqqat Ilulissat eqqaani nunaqarfinnit Ilulissanut ukiuni tulliuttuni atuariartorsinnaasut ikilissasut, taakkualu tamarmik Ilulissaniinnatik Uummannami inissaqassasut, kommunimi ingerlatsiviup qinikkat aalajangernissaannut tunngavissamik suliaqarnermini ilisimatitsissutigaa.

- Siunissami atuartut amerlassusissaannik naatsorsuinermi Ilulissani inissat 21-t tamarmik atuartut angerlarsimaffiattut atorneqarnissaat pisariaqartinneqanngitsoq takuneqarsinnaavoq. Paasissutissat maanna pigineqartut naapertorlugit atuartut angerlarsimaffianni inissaqarnissamik pisariaqartitsisut amerlanerpaamik 21-t Uummannami inissaqartinneqarsinnaapput, ilaqutareeqarnermut ingerlatsivik allappoq.

Qinikkat amerlanerussutillit aalajangernerat naammassiniarlugu atorfillit suliamik ingerlatsissasut, Ilaqutareeqarnermut Ingerlatsivik Sermitsiamut siusinnerusukkut ilisimatitsivoq. Ulloq unnuarlu angerlarsimaffittaarnissamut qinnuteqarneq suliassat ilagissavaat.

Meeqqat qulit, qulinit 18-it tungaanut ukiullit, angerlarsimaffissami kommunimit ingerlanneqartussatut pilersaarutigineqartumi angerlarsimaffeqarsinnaanissaat, Avannaata Kommuniata pilersaarutigaa.