Naalakkersuisoq: Meeqqat angerlarsimaffiup avataanut inissitat illoqarfigisaminniittariaqaraluarput

- Meeqqanik angerlarsimaffiup avataanut inissiisarnermi equngasoqartorujussuuvoq, Meeqqanut Inuusuttunullu Naalakkersuisoq, Mariane Paviasen Jensenip (IA), Sermitsiamut oqarpoq.

Naalakkersuisup meeqqat inuusuttuaqqallu angerlarsimaffiup avataanut inissinneqartussanngoraangamik illoqarfigisaminni inissinneqartarnissaat kissaatigigaluarpaa. 

AAMMA ATUARUK:

Naalakkersuisoq imminut naqqittoq: Ersarluttumik saqqummiussinera ajuusaarutigaara

Tamannali kissaat ullumikkut pissusiviusut naapertorlugit allarluinnarmik isikkoqarpoq. Naalakkersuisup assersuusiornera naapertorlugu soorlu Narsami Nanortalimmilu ulloq unnuarlu angerlarsimaffeqanngilaq. Meeqqat inuusuttuaqqallu illoqarfinni taakkunani angerlarsimaffiup avataanut inissitassat illoqarfitsik, ilaatigullu kommunerisartik, qimallugit inissiivissaminnukartariaqartarput.  

- Meeqqat angerlarsimaffiup avataanut inissinneqaraangamik assut naakkinartarput avatangiisinut allarluinnarnut inissinneqaraangamik. Uanga paasinnittaatsinni pillaatitut taaneqarsinnaavoq angerlarsimaffiup avataanut inissinneqarnermi kommunimut allarujussuarmut, oqaatsit allat, sungiusimanngisanut sunut tamanut nuunneqariasaarneq. Peqqinnanngitsuuvoq meeqqanut, taanna oqarpoq.

Naalakkersuisoq: Kommunit namminerisaminnik peqarusunnerupput

Meeqqanut inuusuttunullu angerlarsimaffiup avataanut inissiisarnermi periutsit assigiinngillat. Ilaat angerlarsimaffinni ilaqutariit akornanni akuulertarput, ilaat pisortat soorlu kommunit Namminersorlutillu Oqartussat ingerlataannut inissinneqartarput ilaallu aamma namminersorlutik ingerlataqartut pigisaannut inissinneqartarlutik. 

Naalakkersuisup kommunit aasaq juunip qaammataani ataatsimeeqatigisimallugit Sermitsiamut oqaluttuaraa. Kommunit namminneq aqutaminnik meeqqanut inuusuttuaqqanullu ulloq unnuarlu amerlanerusunik paaqqinnittarfiuteqarnissartik kissaatigigaat, ataatsimiinnermi ilaatigut inerniliussaavoq. Tamanna Naalakkersuisup isumaqatigaa.

- Naalakkersuisunit isumaqarpugut meeqqamut ajunnginnerpaamik kinguneqassappat kommunerisami, illoqarfigisami, inissinneqarneq. Tassa taannaasussaavoq immikkorluinnaq pisoqarsimatinnagu meeqqamut ikiliineq annikinnerpaaq. Angajoqqaanut, aanaakkunnut atsakkunnullu attaveqarnissaq pingaaruteqaqimmat, Mariane Paviasen Jensen oqarpoq.

- Tamanna pinngitsoortinneqarsinnaavoq kommunit tamarmik namminneq peqalertuugaluarunik, Naalakkersuisoq oqarpoq.

Namminersortut aallartisartut mattukkallaraat

Naalakkersuisut namminersorlutik inuussutissarsiortut, meeqqanut inuusuttuaqqanullu ulloq unnuarlu angerlarsiffiutitaarusuttut, qinnuteqaataannik suliaqartarunnaarallarneq aalajangeraat pillugu, Sermitsiaq sapaatit akunnerisa siulianni allaaserisaqarpoq.

Tassani inissat 22-it atorneqannginnerat peqqutaasoq Naalakkersuisoq tunngavilersuivoq. Kommunilli qinnuteqarnissaminnut suli periarfissaqartut, Naalakkersuisoq Sermitsiap allaaserisaqareernerata kingorna imminnut naqqilluni nalunaaruteqaqqippoq. Tamannalu assigiingisitsisoqarneranik paasineqassappat Naalakkersuisup paasisinnaanerarpaa.

- Namminersorlutik ulloq unnuarlu paaqqinnittarfiutitaarusuttut kommunillu atugassaannik assigiinngitsumik periarfissiisugut oqartoqarsinnaavoq. Taanna ilumoortortaqarsinnaavoq, Naalakkersuisoq oqarpoq.

Ulloq unnuarlu paaqqinnittarfiutitaarusunnermik qinnuteqartut qinnuteqaataat 90-it 100-llu akornani amerlassusseqartut, Naalakkersuisoq oqarpoq. Kisitsisinit taakkunannga qassit pisortanit, qassillu namminersortunit qinnuteqaataanersut Sermitsiap apersuinerani Naalakkersuisumit immikkoortillugit ilisimaneqanngillat.